•  Hvers vegna get ég ekki einbeitt mér?

•  Hvernig er hægt að bæta einbeitinguna?

•  Hvað segja jafnaldrarnir?

 „Ég les ekki bækur eins mikið og ég gerði áður. Ég nenni ekki einu sinni að lesa langar efnisgreinar lengur.“ – Elaine.

 „Ég hraðspóla myndbandi ef mér finnst það ganga hægt.“ – Miranda.

 „Ef ég er að gera eitthvað mikilvægt og það heyrist í símanum get ég ekki hugsað um annað en hver sé að senda mér skilaboð.“ – Jane.

 Getur tæknin gert okkur erfiðara fyrir að einbeita okkur? Sumir eru á því. „Eftir því sem við notum netið meira venjum við heilann við truflanir. Við tökum mjög fljótt og af skilvirkni við upplýsingum en höldum ekki einbeitingunni,“ skrifar rithöfundurinn og ráðgjafi í tímastjórnun, Nicholas Carr. a

 Skoðum þrenns konar aðstæður þar sem tæknin getur haft áhrif á einbeitingu okkar.

•   Þegar við tölum við aðra. Ung kona að nafni Maria bendir á að „jafnvel þegar fólk talar við aðra augliti til auglitis er það að senda skilaboð, spila tölvuleiki eða athuga samfélagsmiðla í símanum sínum og er þess vegna ekki með fulla athygli á þeim sem það er að ræða við“.

•   Í kennslustund. „Meirihluti nemenda segist nota snjalltæki í kennslustundum til að senda skilaboð, vafra á netinu eða skoða efni ótengt náminu,“ segir í bókinni Digital Kids.

•   Við heimalærdóminn. „Mér finnst mjög erfitt að kíkja ekki á símann í hvert skipti sem heyrist í honum,“ segir Chris 22 ára. Heimavinna sem ætti að taka klukkutíma getur tekið þrjá tíma eða meira ef þú lætur snjalltæki trufla þig.

 Kjarni málsins: Ef þú leyfir tækninni að trufla þig og stjórna þér áttu erfitt með að einbeita þér.

•   Í samræðum. Í Biblíunni segir: „Hugsið ekki aðeins um ykkar eigin hag heldur einnig hag annarra.“ (Filippíbréfið 2:4) Sýndu að þér sé annt um aðra með því að hlusta af athygli á þá. Haltu augnasambandi og ekki leyfa snjalltækjum að fanga athygli þína.

   „Þegar þú talar við aðra skaltu standast freistinguna að vera að kíkja á símann. Sýndu þeim sem þú ert að tala við virðingu með því að gefa honum alla athygli þína.“ – Thomas

   TILLAGA: Þegar þú talar við aðra skaltu hugleiða þann möguleika að geyma símann þinn þar sem þú sérð hann ekki. Rannsóknir sýna að það geti jafnvel truflað einbeitinguna að hafa síma í augsýn því að hugurinn er þá viðbúinn truflun.

•   Í kennslustund. Í Biblíunni segir: ,Gætið að hvernig þið hlustið.‘ (Lúkas 8:18) Ef það er leyft í skólanum þínum að vera á netinu í kennslustundum skaltu fylgja þessari meginreglu og sleppa því að athuga hvort þú hafir fengið skilaboð, spila tölvuleiki og vera að spjalla á netinu þegar þú ættir að vera með hugann við námið.

   „Reyndu að fylgjast betur með í kennslustundum. Skrifaðu glósur. Ef mögulegt er skaltu sitja framarlega í kennslustofunni til að forðast truflanir.“ – Karen.

   TILLAGA: Það er betra að skrifa glósur á blað en á tölvu. Rannsóknir sýna fram á að þannig verðir þú fyrir minni truflun og munir frekar það sem þú lærðir.

•   Við heimalærdóminn. Í Biblíunni segir: „Aflaðu þér visku, aflaðu þér hygginda.“ (Orðskviðirnir 4:5) Það kallar á meira en að renna snöggt yfir efnið til að ná prófi.

   „Þegar ég vinn heimavinnuna set ég spjaldtölvuna á flugstillingu og einbeiti mér að því sem ég er að gera. Ég fylgist ekki með skilaboðum. Ef eitthvað kemur upp í hugann sem ég þarf að muna skrifa ég það niður.“ – Chris.

   TILLAGA: Gakktu úr skugga um að umhverfið stuðli að því að þú getir einbeitt þér. Hafðu hreint og snyrtilegt í kringum þig.