LESN 03
Yu Kyan Biliiv Wa Di Baibl Se?
Di Baibl tel wi bout uol iip a gud sitn we wi kyan luk faawod tu, an it tel wi wa wi fi du fi mek wi laif beta. Yu mait-a waahn fi nuo muor bout di sitn dem we de iina di Baibl, bot yu mait-a a wanda ef yu kyan riili biliiv di sitn dem we de iina wan buk we de bout fram wie bak wen. Uol iip a piipl biliiv se ef wi du wa di Baibl se wi fi du, wi a-go api nou an fi eva. Yu tingk notn kyan go so fi chuu? Wi waahn yu fi fain out fi yuself ef yu kyan riili biliiv wa di Baibl se.
1. Yu tingk yu kyan riili biliiv di tuori dem we de iina di Baibl?
Di Baibl mek wi nuo se eniting we iina it, “a so it go.” (Iikliiziyastiiz 12:10) It tel wi bout riil piipl an tingz we apm tu dem. (Riid Luuk 1:3; 3:1, 2.) Piipl we stodi bout tingz we apm iina di paas an tingz we de bout fram wie bak wen se som big tingz we di Baibl tel wi bout, a so it did go fi chuu. So di diet dem, di piipl dem, an di plies dem we it tel wi bout, a so it go.
2. Wa mek wi nuo se di Baibl stil av yuus fi wi tide?
Di Baibl tel wi bout uol iip a tingz we wen it did dis rait dong, nof piipl neehn nuo notn bout dem ting de. Laik, wen it taak bout tingz we av fi du wid di ort, uol iip a piipl neehn biliiv wa it did a se. Nowadiez, piipl we stodi bout di ort an dem ting de fain out se wa di Baibl se bout dem ting de, a so it go fi chuu. Yu kyan ‘aalwiez biliiv wa it a se, nou an fi eva.’—Saam 111:8.
3. Wa mek wi kyan biliiv se wa di Baibl se a-go apm iina di fyuucha a-go apm fi chuu?
Di Baibl tel wi bout “tingz we a-go apm bifuo it apm.” (Aizaiya 46:10) It tel wi bout som tingz we did a-go apm lang bifuo dem apm. An it did tel wi bout di sitn dem we wudaana gwaan nowadiez. Iina da lesn ya, wi a-go luk pan som a di ting dem we di Baibl se wuda apm. Yu a-go fraitn fi si se wa di Baibl se wuda apm, a so it go fi chuu.
LORN SOM MUO
Wi a-go luk pan ou piipl we stodi bout di ort an dem ting de, ou wa dem fain out bout it mach op wid wa di Baibl se. An wi a-go luk pan som tingz we di Baibl se wuda apm fi si ou dem apm siem wie laik ou di Baibl se it wuda apm.
4. Tingz we dem fain out bout di ort mach op wid wa di Baibl se
Iina uol-taim diez, nof nof piipl did tingk se sitn did a uol op di ort. Plie di VIDIYO.
Luk pan wa di Baibl did se iina Juob bout 3,500 ier ago. Riid Juob 26:7, an den wi a-go taak bout da kwestiyan ya:
-
Wa mek piipl shak wen dem lorn se di Baibl se “notn naa uol op” di ort?
A neehn til bout 200 ier ago dem fain out wa mek wi aalwiez av waata pan di ort. Bot luk wa di Baibl did se lang lang bifuo dat. Riid Juob 36:27, 28, an den wi a-go taak bout dem kwestiyan ya:
-
Dis did rait dong iina di buk a Juob fram lang lang taim. Wa yu tingk bout dat?
-
Dem skripcha ya we yu jos riid, dem mek yu fiet iina di Baibl get chrangga?
5. Di Baibl did mek wi nuo bout som big tingz we wuda apm bifuo dem apm
Riid Aizaiya 44:27–45:2, an den wi a-go taak bout da kwestiyan ya:
-
Bout 200 ier bifuo Babilan did get mash dong, wa a som a di sitn dem we di Baibl did tel wi wuda apm tu it bifuo it apm?
Bies pan wa piipl we stodi bout tingz we apm fram lang taim se, wan king we niem Sairos we kom fram Porja, im an im aami did tek uova Babilan. Ou im did get fi du dat? Fos ting dem did du a dat dem jrien out di riva waata we did a protek di siti. An chuu di giet dem neehn lak da nait de, Sairos an im suoja dem kuda go iina di siti an tek it uova iizi iizi an neehn afi fait nobadi. So fram 2,500 ier ago til tide die, Babilan stil mash op. Mek wi luk pan wa di Baibl did se wuda apm.
Riid Aizaiya 13:19, 20, an den wi a-go taak bout da kwestiyan ya:
-
A wa did apm iina Babilan we mek wi nuo se wa di Baibl se wuda apm, a so it did go fi chuu?
Luk pan ou Babilan, we de iina Iraq, stil mash op
6. Di sitn dem we wi si a gwaan tide, di Baibl did mek wi nuo se a dem sitn ya wudaana gwaan
Iina 2 Timoti 3:1, di Baibl mek wi nuo se wi a liv iina di “laas die dem.” Mek wi luk pan som a di sitn dem we di Baibl did se wuda apm iina dem taim ya.
Riid Matyu 24:6, 7, an den wi a-go taak bout da kwestiyan ya:
-
Wa a som a di sitn dem we di Baibl se wuda apm iina di laas die dem?
Riid 2 Timoti 3:1-5, an den wi a-go taak bout dem kwestiyan ya:
-
Ou di Baibl did se piipl wuda a gwaan iina di laas die dem?
-
Wich wan a dem sitn ya yu si piipl a du?
SUMADI MAIT-A SE: “Di Baibl ful op a bie mek-op tuori.”
-
Outa aal a di sitn dem we wi did luk pan, wich wan a dem mek yu nuo se yu kyan riili biliiv wa di Baibl se?
DIS A WA YU FI MEMBA
Tingz we apm fram lang taim, tingz we dem fain out se bout di ort, an tingz we di Baibl se wuda apm bifuo it apm mek yu nuo se yu kyan riili biliiv wa di Baibl se.
Wa yu did lorn iina da lesn ya?
-
Yu tingk yu kyan riili biliiv di tuori dem we de iina di Baibl?
-
Ou di sitn dem we dem fain out bout di ort an dem ting de mach op wid wa di Baibl se?
-
Yu tingk di Baibl mek wi nuo wa a-go apm iina di fyuucha? Wa mek yu se so?
CHEK OUT SOM MUO SITN
Di Baibl tel wi som tingz bout di ort. Yu tingk piipl we stodi bout it fain out se notn no go laik wa it se?
“Yu Tingk Di Baibl Mach Op Wid Wa Di Saiyantis Dem Fain Out?” (Sitn we yu kyan get pan di websait)
Wa an wa riili a-go gwaan iina “di laas die dem”?
“6 Tingz We A Gwaan We Di Baibl Did Tel Wi Bout” (Di Wachtowa, Mie 1, 2011)
Di govament we did a ruul iina Greece wie bak wen, fain out ou wa di Baibl se wuda apm tu dem apm fi chuu.
Ou Di Sitn Dem We “Di Prafit Dem Did Se” Mek Wi Fiet Get Chrangga An Chrangga (5:22)
Fain out ou da man ya, wen im si se di sitn dem we di Baibl se wuda apm, apm fi chuu, staat fi biliiv wa di Baibl se.
