LESN 06
Ou Laif Kom Bout Pan Di Ort?
Saam 36:9 se: “A [Gad] gi laif.” Som piipl no biliiv dat. Dem tingk se wi jos kom bout so an nobadi neehn mek wi. Bot ef a no so it go an a Gad mek wi, den im no mos mek wi fi wan riizn, no chuu? a Kom mek wi luk pan wa di Baibl se bout ou laif did staat an wa mek wi kyan biliiv wa it a se.
1. A ou di ort an di staar dem kom bout?
Iina Jenisiz 1:1, di Baibl tel wi se: “Iina di fos plies, Gad mek di evn dem an di ort.” Uol iip a piipl we stodi bout di ort an di staar dem fain out se wa di Baibl se, a so it go. Aal a dem sitn de did av wan taim wen dem did staat. A ou Gad did mek aal a dem ting de? Im yuuz im uoli spirit—we a im powa—fi mek evriting, laik di ort, di staar dem, di planet dem, an dem ting de.—Jenisiz 1:2
2. Wa mek Gad mek di ort?
Jeuova “neehn mek di ort fi notn, bot im mek it fi piipl liv pan it.” (Aizaiya 45:18) Im did mek di ort nais kaaz im waahn piipl fi liv pan it fi eva. (Riid Aizaiya 40:28; 42:5) Di piipl dem we stodi bout di ort an dem ting de, mek wi si se di ort difrant fram aal a di ada planet dem. A di onggl wan we piipl kyan liv pan it.
3. Wa mek piipl difrant fram di animal dem?
Afta im don mek di ort, di fos ting we Jeuova du a put uol iip a chrii an flowaz an animal pan it. An afta dat, “Gad mek man wid di siem wiez dem we im av.” (Riid Jenisiz 1:27.) Dat a wa mek wi kyan av som gud wiez laik Gad. Das wai wi kyan lov piipl, an wi kyan du wa rait jos laik Gad. Im mek wi so dat wi kyan iivn lorn wan neda langwij, an im mek wi so dat wi lov fi si priti tingz, an wi lov fi ier myuuzik. Das wai wi no komiin laik di animal dem. Dem kyaahn worship di Wan we mek dem, bot wi kyan worship im.
LORN SOM MUO
Wi a-go luk pan ou wi kyan nuo se evriting we de pan di ort, a Sumadi mek it de ya, an wa mek wi kyan riili biliiv wa di Baibl se bout ou tingz kom bout. Wi a-go si ou di wiez dem we piipl av kyan mek wi nuo muor bout Gad.
4. Laif kom fram Sumadi
Piipl luk pan di sitn dem we de roun wi, dem mek sitn laik it, an a dem get di big op. So wa bout di Sumadi we mek it iina di fos plies? Plie di VIDIYO, an den wi a-go taak bout da kwestiyan ya:
-
Wen piipl luk pan di ting dem we de roun dem, wa’a som a di sitn dem we dem mek aafa dem?
Evri ous we de bout, a Sumadi kom op wid ou fi mek it. Bot a uu kom op wid ou fi mek di sitn dem we de roun wi? Riid Iibruu 3:4, an den wi a-go taak bout dem kwestiyan ya:
-
Wa’a som a di sitn dem we Gad mek we yu lov fi si?
-
Yu tingk it mek sens fi biliiv se di ort, di staar dem, an evriting els a Sumadi mek dem kom bout? Wa mek yu se so?
Yu did nuo se?
Yu kyan fain tingz we yu kyan riid an vidiyo we yu kyan wach pan da tapik ya we wi a taak bout pan jw.org. Luk pan di paat dem we niem “A Sumadi Did Mek It?” an “Som Piipl A Taak Bout Ou Laif Did Kom Bout.”
“Kaaz evri ous we de bout, a sumadi bil it, bot a Gad bil evriting”
5. Yu kyan biliiv se wa di Baibl se bout ou tingz kom bout, a so it go fi chuu
Wa di Baibl tel wi se iina Jenisiz chapta 1 bout ou di ort an laif pan it kom bout, a so it go fi chuu? Ar a jos wan mek-op stuori? Plie di VIDIYO, an den wi a-go taak bout dem kwestiyan ya:
-
Di die dem we wi av, av 24 owa iina dem. A riili siks a dem die ya Gad tek fi mek di ort an evriting we a liv pan it?
-
Yu tingk it mek sens fi piipl biliiv wa di Baibl se bout ou laif kom bout? Wa mek yu se so?
Riid Jenisiz 1:1, an den wi a-go taak bout da kwestiyan ya:
-
Piipl we stodi bout di ort an di staar dem se aal a dem sitn de av wan taim wen dem did staat. Ou wa dem se mach op wid wa yu jos riid iina di Baibl?
Som piipl wanda ef Gad did mek wan likl sopm we a liv, an den mek it ton iina som ada tingz we liv pan di ort. Riid Jenisiz 1:21, 25, 27, an den wi a-go taak bout dem kwestiyan ya:
-
Di Baibl riili se Gad mek wan likl sopm we a liv an mek it ton iina fish, som animal laik mongki an dem sitn de, an den dem ton iina piipl? Ar im did mek evri kain-a difrant difrant ting we liv pan di ort? b
6. Piipl difrant fram evri ada sitn we Gad mek pan di ort
Wi no komiin laik di animal dem we Jeuova mek. Riid Jenisiz 1:26, an den wi a-go taak bout da kwestiyan ya:
-
Kaa Gad mek wi fi av di siem kain-a wiez dem we im av, im mek wi kyan du tingz fi shuo piipl se wi lov dem an wi fiil it fi dem. Wa’a som a di wiez dem we dis mek wi si se Gad av?
SUMADI MAIT-A SE: “Di ting dem we di Baibl se bout ou laif did kom bout a jos mek-op stuori.”
-
Wa yu tingk bout dis? An wa mek yu se so?
DIS A WA YU FI MEMBA
Jeuova mek di ort, di staar dem, an evriting we a liv pan di ort.
Wa yu did lorn iina da lesn ya?
-
Ou di Baibl tel wi se di ort, di staar dem, an dem sitn de did kom bout?
-
Gad did mek di difrant difrant sitn dem we de pan di ort kom bout fram wan likl sitn we a liv ar im did mek aal a di difrant difrant sitn dem?
-
Wa mek piipl so difrant fram di ada ting dem we Gad mek?
CHEK OUT SOM MUO SITN
Fain out bout som a di sitn dem we piipl mek wen dem luk pan di sitn dem we de roun dem an mek sitn aafa dem.
“Wa Wi Kyan Lorn Fram Som A Di Sitn Dem We Gad Mek?” (Wiek Op!, Septemba 2006)
Wach da vidiyo ya an si ou wan faada elp im bwai pikni fi si wa di Baibl se bout ou Gad mek tingz.
Yu tingk we piipl se bout ou Gad did yuuz wan likl sitn we a liv fi mek aal a di ada sitn dem we liv pan di ort, a dat di Baibl riili se?
Fain out ef di lang taim ded animal buon dem, an ada tingz we dem dig op an fain, an ada saiyantifik tingz we dem stodi, shuo se a Sumadi mek evriting we a liv pan di ort, ar dem jos kom bout so.
Faiv Gud Kwestiyan We Wi Kyan Aks Bout We Laif Kom Fram (pamplet)
