LESN 16

Wa A Som A Di Sopm Dem We Jiizas Did Du Wen Im Did De Pan Di Ort?

PLIE

Wen som piipl tingk bout Jiizas, dem stil a tingk bout im az wan biebi, az sumadi we a ded, ar som tingk im a dis wan gud man. Bot wen wi luk pan di sitn dem we im did du wen im did de pan di ort, yu tingk wi kyan lorn muor bout im? Wi a-go luk pan som a di big ting dem we Jiizas did du an ou dem a-go elp yu.

1. Wa a di mien wok we Jiizas did du?

Jiizas mien wok did a fi go priich di ‘gud nyuuz bout Gad Kindom.’ (Riid Luuk 4:43.) Im priich se Gad wuda set op wan kindom, ar wan govament, we wuda get rid a aal a di prablem dem we piipl av. a An fi chrii an a aaf ier, Jiizas wok aad aad fi priich da gud nyuuz ya.—Matyu 9:35.

2. Wa mek Jiizas did wok mirikl?

Di Baibl tel wi bout di nof taim dem wen “Gad yuuz di mirikl, sain, an powaful sitn dem we im did mek Jiizas du.” (Aks 2:22) Jiizas kuda tel di briiz an dem sitn de fi sekl demself. Im kuda gi fuud tu nof nof piipl. Im kuda iil sik piipl, an im kuda mek ded piipl kom bak alaiv. (Matyu 8:23-27; 14:15-21; Maak 6:56; Luuk 7:11-17) Jiizas kuda du aal a dis kaaz Gad gi im di powa fi dwi’it. Di mirikl dem we Jiizas did wok mek it klier klier se a Gad did sen im kom a ort. An dem mirikl de mek wi nuo se Jeuova av di powa fi fiks aal a wi prablem dem.

3. Jiizas aalwiez du wa im Faada tel im fi du. Wa wi kyan lorn fram dat?

Iina evriting we Jiizas du, im lisn tu im Faada. (Riid Jan 8:29.) Fi di wol taim we Jiizas did de pan di ort fa, iivn duo nof piipl did a chrai tap im fram du wa im Faada waahn im fi du, im stil du evriting we im Faada tel im fi du. So im mek wi si se piipl kyan du wa Gad waahn dem fi du, aal wen it aad fi dem dwi’it. So wi si se Jiizas shuo wi ou fi bier di sofarieshan. Wi fi ‘du laik im an fala iina im fut step dem.’—1 Piita 2:21.

LORN SOM MUO

Wi a-go luk pan som a di mirikl dem we Jiizas did du an ou im did priich tu di piipl dem.

4. Jiizas priich di gud nyuuz tu piipl

Jiizas waak som wol iip a mail pan som dot ruod, so dat im kuda priich tu wol iip a piipl. Riid Luuk 8:1, an den wi a-go taak bout dem kwestiyan ya:

A onggl di piipl dem we kom fi lisn tu Jiizas im did priich tu?
Wa a som a di sitn dem we Jiizas did du so dat im kuda fain piipl fi priich tu?

Iina di Baibl, Gad did tel wi se di Mesaiya wuda priich di gud nyuuz. Riid Aizaiya 61:1, 2, an den wi a-go taak bout dem kwestiyan ya:

Ou wi nuo se Jiizas did du wa da skripcha ya se im wuda du?
Yu tingk se piipl stil niid fi ier da gud nyuuz ya?

5. Jiizas tiich wi bout ada tingz we kyan elp wi

A no onggl di gud nyuuz bout Gad Kindom Jiizas did tiich bout. Im tiich wi bout som ada tingz we kyan elp wi. Som a dem de iina di Sorman Pan Di Mountn we im did priich. Mek wi luk pan som a dem. Riid Matyu 6:14, 34 an 7:12, an den wi a-go taak bout dem kwestiyan ya:

Wa Jiizas did se iina dem vors ya we mek sens?
Yu tingk wa im se kyan stil elp wi tide, an it stil mek sens?

6. Jiizas wok wol iip a mirikl

A Jeuova gi Jiizas di powa fi wok aal a di mirikl dem we im did du. Fi lorn bout wan a dem mirikl ya, riid Maak 5:25-34 ar plie di VIDIYO. Den wi a-go taak bout di neks kwestiyan dem.

VIDIYO: Jiizas Iil Wan Sik Uman (5:10)

Iina da vidiyo ya, da uman ya we did sik, wa shi did shuor bout?
Wa yu lov bout da mirikl ya?

Riid Jan 5:36, an den wi a-go taak bout da kwestiyan ya:

Di mirikl dem we Jiizas did du, wa dem “shuo” wi se bout im?

Yu did nuo se?

Muos a wa wi nuo bout Jiizas rait dong iina di Baibl buk dem we niem Matyu, Maak, Luuk, an Jan. Di man dem we rait dem buk ya tel wi difrant difrant tingz bout Jiizas laif.

MATYU

Di buk we niem Matyu a di fos wan we did rait. A Matyu did rait it. A it a di mien wan we tel wi bout di sitn dem we Jiizas tiich, laik wa im tiich bout Gad Kindom.
MAAK

A fi im buk did a di liklis wan, bot it ful op a bier tingz. It no dedi-dedi.
LUUK

Muos a di sitn dem we im rait dong a tel wi bout Jiizas prieya dem an bout ou Jiizas chriit uman gud.
JAN

A im rait dong nof tingz we Jiizas taak bout wid im fren dem an ada piipl. A so wi get fi nuo di kain-a sumadi Jiizas bi.