LESN 46
Wa Mek Wi Fi Gi Wi Laif Tu Gad An Baptaiz?
Yu gi yu laif tu Jeuova wen yu prie an pramis im se a im wan yu a-go worship an wa im se yu fi du, a it a-go kom fos iina yu laif. (Saam 40:8) Afta yu du dat, den yu a-go baptaiz. Wen yu baptaiz, yu shuo ada piipl se yu prie tu Gad an pramis im se yu a-go gi yu laif tu im. Dis a-go bi di bigis ting yu eva du iina yu laif. Wa kyan push yu an elp yu fi mek op yu main fi du dis ya big sitn ya we a-go chienj yu laif fi eva?
1. Wa kyan push an elp sumadi fi gi dem laif tu Gad?
Wi pramis Jeuova fi gi wi laif tu im kaa wi lov im. (1 Jan 4:10, 19) Di Baibl se: “Yu fi lov di Laad we a yu Gad. Yu fi lov im wid aal a yu aat, yu fi lov im wid aal a yu suol, yu fi lov im wid aal a yu main, an yu fi lov im wid aal a yu chrent.” (Maak 12:30) Wi shuo se wi lov Gad wen wi du di ting dem an se di sitn dem we mek im api. Jos laik ou wen wan man an wan uman we lov dem wan aneda go marid, a siem so kaaz wi lov Jeuova wi gi wi laif tu im an go baptaiz.
2. Wa a som a di blesn dem we Jeuova gi tu im piipl dem we baptaiz?
Wen yu baptaiz, yu a-go bi paat a Jeuova fambili we api so til. A dem taim de yu a-go si umoch Jeuova lov yu, an yu a-go jraa nier im, an yu an im a-go ton gud gud fren. (Riid Malikai 3:16-18.) Jeuova a-go bi yu Faada, an pan tap a dat yu a-go get som uol iip a breda an sista fram aal uova di worl we lov Jeuova an lov yu tu. (Riid Maak 10:29, 30.) Si som sitn ya we yu fi du bifuo yu kyan baptaiz. Yu fi lorn bout Jeuova so yu kyan lov im, an yu afi chos iina im Son. An den afta dat yu fi prie tu Jeuova an tel im se yu a-go gi yu laif tu im. Den afta yu du aal a dem sitn ya, yu kyan go baptaiz. Den yu a-go a du di sitn dem we a-go mek yu api fi eva. Gad Wod tel wi se: ‘Baptizam . . . a siev wi ya nou.’—1 Piita 3:21.
LORN SOM MUO
Luk pan wa mek it impuotant fi gi yu laif tu Jeuova an go get baptaiz.
3. Aal a wi afi go disaid uu wi a-go sorv
Bak iina di diez a di Izrelait dem, som a dem did tingk se dem kuda worship Jeuova an wan faalz gad we niem Bieyal siem taim. Bot Jeuova sen wan a im prafit we niem Ilaija fi mek dem nuo se wa dem did a du rang. Riid 1 Kingz 18:21, an den wi a-go taak bout da kwestiyan ya:
-
Wa di Izrelait dem did afi mek op dem main bout?
Jos laik di Izrelait dem, wi afi disaid uu wi a-go worship. Riid Luuk 16:13, an den wi a-go taak bout dem kwestiyan ya:
-
Wa mek wi kyaahn sorv Jeuova an sumadi ar sitn els siem taim?
-
Wa wi kyan du fi shuo Jeuova se a im wan wi a sorv?
4. Tingk bout umoch Jeuova lov yu
Jeuova gi wi uol iip a nais sitn. Bot wa wi kyan gi tu im? Plie di VIDIYO.
Wa a som sitn we Jeuova du fi yu we mek yu si se im lov yu? Riid Saam 104:14, 15 an 1 Jan 4:9, 10, an den wi a-go taak bout dem kwestiyan ya:
-
Wa a som sitn we Jeuova gi yu we yu riili tangk im fa?
-
Dem nais sitn de we Jeuova gi yu, ou dem mek yu fiil bout im?
Wen wi get wan prezent we wi riili lov, wi waahn fi mek di sumadi we gi wi si se wi tangk dem fi it. Riid Dyuutaranami 16:17, an den wi a-go taak bout da kwestiyan ya:
-
Wen yu tingk bout aal a wa Jeuova du fi yu, wa dat mek yu waahn fi du fi im?
5. Yu a-go get uol iip a blesn wen yu gi yu laif tu Jeuova
Uol iip a piipl biliiv se ef evribadi nuo dem, ar ef dem iina wan big jab ar av uol iip a moni, dat a-go mek dem api. Bot yu tingk se a so it go? Plie di VIDIYO, an den wi a-go taak bout di neks kwestiyan dem.
-
Iivn duo di man iina di vidiyo did lov fi plie futbaal, wa mek im did tap dwi’it?
-
Im mek op im main fi liv fi Jeuova an no fi futbaal. Yu tingk a di rait ting im did du? Wa mek yu se so?
Di apasl Paal did iina wan tap-a-tap jab bifuo im ton wan Kristiyan. Im a did wan laaya fi di Juu dem an di sumadi we tiich im a did wan tap-a-tap tiicha. Bot im gi op aal a dat fi ton wan Kristiyan. Yu tingk Paal did sari se im did gi op aal a dat? Riid Filipiyan 3:8, an den wi a-go taak bout dem kwestiyan ya:
-
Wa mek Paal did se di sitn dem we im gi op wen im ton wan Kristiyan did “komiin laik gyaabij”?
-
Wa a som a di gud sitn dem we im did get kaaz a dat?
-
Yu tingk yu kyan du notn els beta wid yu laif dan fi sorv Jeuova?
Wen Paal did ton wan Kristiyan, im did get nof muor dan wa im did gi op
SUMADI MAIT-A SE: “Mi no tingk it fier fi wi gi di wol a wi laif tu Gad.”
-
Wa mek yu tingk it mek sens fi gi yu laif tu Jeuova?
DIS A WA YU FI MEMBA
Ef wi lov Jeuova, dat a-go mek wi waahn fi gi wi laif tu im an get baptaiz.
Wa yu did lorn iina da lesn ya?
-
Wa mek wi fi lov Jeuova an worship im wid aal a wi aat?
-
Wa a som gud sitn we Jeuova gi tu im piipl dem we baptaiz?
-
Yu wuda waahn fi gi yu laif tu Jeuova?
CHEK OUT SOM MUO SITN
Luk pan wa mek sumadi we sing an sumadi we plie spuot gi dem laif tu Jeuova.
Luk pan som ada riizn wa mek wi fi gi wi laif tu Gad.
“Wa Mek Yu Fi Gi Yu Laif Tu Jeuova?” (Di Wachtowa, Janiweri 15, 2010)
Iina da myuuzik vidiyo ya, yu a-go si ou di wan dem we gi dem laif tu Jeuova wel api.
Iina da tuori ya we niem “Fi Wol Iip A Ier Mi Did A Wanda, ‘Wa Mek Wi De Ya?’” luk pan wa elp wan uman fi si wa fi kom fos iina ar laif.
“Di Baibl Chienj Piipl Laif Fi Di Beta” (Di Wachtowa, Novemba 1, 2012)
