Iina Saam 133:1 Dievid did se: “It riili nais fi si wen di breda dem kom tugeda an liv az wan.” Jos laik Dievid, wi fiil gud wen wi de mongks wi breda an sista dem. Bot dis a no bok ops. Fi wi kom tugeda az wan, aal a wi afi wok aad fi mek dat apm.

1. Wa a wan gud sitn we a gwaan mongks Gad piipl?

Ef yu de iina wan neda konchri an yu go a wan miitn, yu mait-a fain se aal ef yu kyaahn chat di langwij we dem a taak, yu stil fiil gud fi de de. Wa mek? Kaaz eniwe wi go a di sed buk an pamplet dem wi a yuuz fi stodi di Baibl. An wi aalwiez a shuo se wi lov wi wan aneda. So it no mata wich paat wi liv, ‘di wan niem we aal a wi kaal pan a Jeuova niem an wi sorv im tugeda az wan.’​—Zefinaiya 3:9.

2. Wa yu fi du so dat yu kyan liv gud wid di breda an sista dem?

1 Piita 1:22 se: “Unu mos aalwiez riili lov unu wan aneda wid aal a unu aat.” So ou yu kyan du wa da vors ya se yu fi du? Wan ting we yu kyan du a fi no bada spen yu taim a luk pan aal a di sitn dem we rang wid yu breda an sista dem, an chrai fi si di gud wiez dem we dem av. An no jos spen aal a yu taim wid di breda an sista dem we tan jos laik yu. Chrai fi get fi nuo di wan dem we difrant fram yu tu. Ef wi fain se wi no laik sumadi kaaz a dem skin kola ar di konchri we dem kom fram ar eniting laka dat, wi fi chrai aad fi chienj dat.​—Riid 1 Piita 2:17. a

3. Wen yu av sitn wid sumadi iina di kanggrigieshan, wa yu a-go du?

Wi liv gud wid wi wan aneda, bot non a wi no porfek. An kaaz a dat wi a-go du tingz we mek wi wan aneda fiil a wie ar get beks. A dat mek di Baibl tel wi se wi fi ‘paadn wi wan aneda, jos laik ou di Laad did paadn wi.’ (Riid Koloshan 3:13.) A uol iip a taim wi du tingz fi ort Jeuova bot im stil figiv wi, so im waahn wi fi figiv wi breda an sista dem tu. Ef yu si se yu du sitn fi ort sumadi, yu fi tek di taim fi go mek tingz rait wid dem.​—Riid Matyu 5:23, 24. b

 LORN SOM MUO

4. Wok aad fi lov piipl, aal ef dem difrant fram yu

Wi nuo se wi fi lov aal a wi breda an sista dem. Bot it mait-a aad fi lov dem wen dem no tan laik wi. So wa kyan elp wi fi lov dem? Riid Aks 10:34, 35, an den wi a-go taak bout dem kwestiyan ya:

• A aal kain-a piipl Jeuova tek fi bi fi’im piipl. Wen yu tingk bout wa Jeuova du, ou yu tingk yu fi chriit piipl we difrant fram yu?

• Iina fi yu ieriya, wa a som bad tingz we piipl du tu piipl ar se bout dem kaaz dem difrant fram dem? Wa mek yu no waahn fi du laik dem?

Riid 2 Korintiyan 6:11-13, an den wi a-go taak bout da kwestiyan ya:

• Wa yu kyan du so dat yu kyan get fi riili lov aal a di breda an sista dem?

5. Wi fi paadn wi wan aneda an liv iina piis wid wi wan aneda

Jeuova neva eva a-go du notn we mek wi afi paadn im, bot im stil eva redi fi paadn wi. Riid Saam 86:5, an den wi a-go taak bout dem kwestiyan ya:

• Wa da vors ya shuo wi bout di wie ou Jeuova paadn piipl?

• Wa mek yu api fi nuo se Jeuova kwik fi paadn piipl?

• Wa a som tingz we mait-a mek it aad fi wi liv gud wid ada piipl?

Ou wi kyan du laik Jeuova an mek shuor se wi aalwiez a liv gud wid wi breda an sista dem? Riid Pravorbz 19:11, an den wi a-go taak bout da kwestiyan ya:

• Wen sumadi du ar se sitn we mek yu fiil a wie ar mek yu get beks, wa yu kyan du so dat tingz no get wos?

 Som a di taim a wi du tingz fi ort ada piipl. Wen dem tingz de gwaan, wa wi fi du? Plie di VIDIYO, an den wi a-go taak bout di neks kwestiyan.

• Iina di vidiyo, wa di sista did du fi mek tingz rait wid ar fren?

 DIS A WA YU FI MEMBA

Wen yu paadn yu breda an sista dem an shuo se yu riili lov dem fram yu aat, dat kyan elp evribadi iina di kanggrigieshan fi liv gud wid dem wan aneda.

Wa yu did lorn iina da lesn ya?

• Wa yu fi du so dat yu kyan lov evribadi, aal ef dem difrant fram yu?

• Ef yu av sitn wid wan a di breda ar sista dem, wa yu a-go du?

• Wen sumadi du yu sitn, wa mek yu waahn fi du laik Jeuova an paadn dem?