Wen sumadi get ponish, a fi jraa dem op an mek dem nuo wa dem du rang. Bot a no onggl dat; a fi tiich dem an mek dem nuo di rait ting fi du. Wen Jeuova ponish wi, a so dat wi kyan sorv im iina wan wie we im api wid. (Ruo 12:1; Iib 12:10, 11) Muo taim wen wi get ponish, it at bad, bot a fi wi uona gud kaa it elp wi fi sorv Jeuova beta an wi en op get nof blesn. (Pr 10:7) Ef yu ponish sumadi ar yu get ponish, wa a som a di sitn dem unu fi memba?

Di sumadi we a ponish sumadi. Di elda dem, di mada an faada dem, an di ada piipl we afi ponish ada piipl fi mek shuor se, jos laik Jeuova, wen dem a dwi’it, dem shuo se dem lov an kier bout di sumadi. ( Jer 46:28) Iivn ef dem afi karek dem aad aad bies pan wa dem du, wen dem a ponish dem, dem fi mek shuor se dem a dwi’it kaaz dem lov di sumadi.​—Tai 1:13.

Di sumadi we a get ponish. No mata di kain-a jraa-op we wi get, wi fi tek it an chrai fi du wa dem se wi fi du sed taim. (Pr 3:11, 12) Kaa wi no porfek, aal a wi niid fi get jraa-op somtaim. Wi kyan get jraa-op iina difrant difrant wie. Wi kyan get it wen wi a riid di Baibl ar wen wi de a wi miitn dem. Som a di taim, chrii elda mait-a afi sidong an taak wid di sumadi we du sitn rang fi si di kain-a jraa-op we dem fi get. Wen wi get ponish an wi tek it, a fi wi uona gud an it wi elp wi fi liv fi eva.​—Pr 10:17.

WACH DI VIDIYO JEUOVA PONISH UU IM LOV, AND DEN ANSA DEM KWESTIYAN YA:

• Wa a som a di ting dem Canon yuus tu du wen im did yongga, an ou tingz did chienj iina im laif?

• Ou di wie Jeuova jraa im op shuo im se Jeuova lov im?

• Wa wi kyan lorn fram aal a wa did apm tu im?