Likl fram dis wen Gad govament, we ruul fram evn, staat fi ruul uova di wol ort, evribadi a-go liv iina piis. Dem a-go api, an eni wok we dem a du dem a-go lov fi dwi’it. A Jiizas a di wan we Gad pik fi ruul uova di ort. Im naa go komiin laik nof a di piipl dem we a ruul nowadiez we no riili bizniz bout piipl. Im riili kier bout piipl. An wen im a ruul, im a-go bi wan King we lov di piipl dem. Im a-go gud an kain tu piipl, an im a-go fier.​—Aizaiya 11:4.

Di piipl dem we a-go liv pan di ort wen Gad a ruul, dem naa go plit op plit op bies pan dem kola ar wich konchri dem kom fram. Evribadi a-go liv az wan. (Revilieshan 7:9, 10) Evribadi we de pan di ort a-go lov Gad, an dem a-go lov dem nieba tu. Dem a-go wok tugeda fi tek kier a di ort, an a dat Gad did waahn fi wi iina di fos plies.​—Saam 115:16.

Wen Gad Kindom a ruul di ort, Gad a-go kanchuol di rien, di briiz an dem ting de, an im a-go mek shuor se evriting wok ou it fi wok. (Saam 24:1, 2) Wen im did de pan di ort an im tel di staam fi sekl dong, Jiizas did gi wi wan likl prips a di powa we Gad gi’im. (Maak 4:39, 41) Wen Krais Jiizas a ruul uova di ort, nobadi naa go fried a orikien an dem ting de. Wen Gad Kindom a ruul uova di ort, wi a-go liv iina piis wid di animal dem, an nobadi naa go de de a mash op di ort.​—Oziya 2:18.

Iina Paradais, evribadi a-go aati. Nobadi naa go get sik, get oul, ar ded. (Aizaiya 35:5, 6) Jos laik ou di ort did nais an kliin an priti wen Adam an Iiv did iina di gyaadn a Iidn, a siem so piipl a-go get fi liv iina wan worl we nais an priti an kliin. Jos laik ou iina Iidn di ort kuda gruo nof fuud, a siem so aal a di piipl dem we a liv iina di nyuu worl a-go kyan plaant wol iip a fuud fi nyam. (Jenisiz 2:9) Jos laik di Izrelait dem bak iina Baibl taim, evribadi iina Paradais a-go “nyam fuud til dem beli ful.”​—Livitikos 26:4, 5.

Wen Gad govament a ruul uova di wol ort, evribadi a-go liv iina piis an dem a-go chriit dem wan aneda gud. No muor waar naa go de bout. Di piipl dem we Gad put inchaaj, dem a-go fier an evribadi a-go av di sitn dem we dem niid fi liv. Di Baibl tel wi se: “Dem a-go sidong anda dem uona vain an anda dem uona fig chrii, an nobadi naa go mek dem fiil fried.”​—Maika 4:3, 4.

Evri fambili a-go av dem uona ous, an dem naa go fried se nobadi a-go tek it we fram dem ar ron dem out. Plos, aal a di wok we wi get fi du, wi a-go lov it. Jos laik wa di Baibl se, di piipl dem we a liv iina Paradais “dem naa go a wok aad fi notn.”​—Aizaiya 65:21-23.

Iina Aizaiya 11:9 di Baibl tel wi se: “Aal uova di ort evribadi a-go nuo bout Jeuova.” Di piipl dem we a-go liv pan di ort wen Gad Kindom a ruul a-go get fi lorn wol iip a tingz fram Jeuova. An dem a-go get fi lorn muor bout di sitn dem we im mek. Dem taim de, piipl naa go mek gon ar non a dem sitn de, an dem naa go du notn we a-go ort ada piipl. (Aizaiya 2:4) Insted-a dat, piipl a-go lorn fi liv iina piis wid dem wan aneda, an dem a-go tek kier a di ort.​—Saam 37:11.

Wen Gad did mek di ort, im did mek it so dat piipl kyan liv pan it an enjai dem laif evridie. Gad waahn piipl fi liv pan di ort fi eva. (Saam 37:29; Aizaiya 45:18) An kaaz a dat Gad waahn fi apm, im a-go mek it so dat det “naa go av no powa uova wi.” (Aizaiya 25:8) An Revilieshan 21:4 se: “Nobadi naa go ded agen, so nobadi naa go ala ar baal. An nobadi naa go fiil no pien.” Gad a-go mek evribadi get di chaans fi liv fi eva. Dat a di piipl dem we im gweehn siev wen da worl ya don, an di wol iip a piipl we im a-go mek kom bak alaiv iina Paradais.​—Jan 5:28, 29; Aks 24:15.

 Gad Kindom suun staat ruul uova di worl, an wol iip a piipl rait ya nou a get demself redi fi wen da Kindom de staat ruul. Iivn duo dem no porfek, dem a wok aad fi bi di kain-a piipl we Gad waahn iina im nyuu worl. Ou dem a du dat? Dem a lorn bout Jeuova Gad an Jiizas Krais, di wan we im sen kom.​—Jan 17:3.

Lorn som muor bout ou yu kyan get fi liv wen da worl ya don so yu kyan get fi de de iina di nyuu worl we suun kom. Fi du dat, aks wan a di Jeuova Witnis dem fi stodi di Baibl wid yu wid di buk we niem Yu Kyan Bi Api Nou An Fi Eva! It frii.