“So ier wa, mek shuor se unu eva redi an a luk out, kaa unu no nuo a wich die ar a wa taim di Man we Gad Pik a-go kom bak.”​—MATYU 25:13.

“So wach out! An kip gyaad kaaz unu no nuo wen di taim a kom.”​—MAAK 13:33.

So nobadi no nuo wen da worl ya a-go don. Bot Gad don set “di die an di taim” wen it a-go apm. (Matyu 24:36) So yu tingk dat miin se wi naa go kyan nuo wen da worl ya suun don? Nuo sa. Wi nuo dis kaaz Jiizas did tel im falara dem som sitn we wuda apm we wuda shuo se di en suun kom.

Dem sitn de a di sain we wuda mek wi nuo se “di worl suun don.” Jiizas did se: “Kaaz wan set a piipl a-go waar gens wan neks set a piipl, an kindom a-go fait gens kindom. Fuud a-go shaat iina nof nof plies an uol iip a piipl a-go staav, pan tap a dat ortkwiek a-go kom shiek op difrant difrant plies.” (Matyu 24:3, 7) An iina Luuk 21:11 im se: “Aal kain-a siknis a-go kil aaf piipl.” So dem sitn ya we Jiizas did se wuda apm, yu si dem a apm?

Wol iip a piipl a sofa kaaz a di waar dem we a gwaan roun di worl. Piipl a staav kaa dem kyaahn get no fuud fi nyam. Aal kain-a siknis a go roun we a kil aaf piipl, an ortkwiek a shiek op aal bout. Laik di big big ortkwiek we did apm iina di Indiyan Uoshan, we kaaz wan big uol wiev we kil aaf bout 225,000 piipl iina 2004. An iina jos chrii ier, bout 6.9 miliyan piipl ded aal uova di worl kaaz a COVID-19. So a dem sitn ya Jiizas did se wuda apm, we wuda mek wi nuo se di bad sitn dem we a gwaan iina da worl ya suun don.

Di taim jos bifuo di worl suun don, di Baibl mek wi nuo se dem taim de niem “di laas die dem.” (2 Piita 3:3, 4) Iina Sekan Timoti 3:1-5, it tel wi se iina di laas die dem piipl naa go du wa Gad se rait. (Luk pan di paat we niem “ Ou Piipl A-Go Tan Likl Bifuo Di Worl Don.”) So yu si piipl roun yu we onggl bizniz wid demself wan, piipl we waahnti-waahnti, piipl we gwaan laik wail daag, an na’av no lov fi nobadi? Dem sitn ya mek wi nuo se di worl suun don.

So a ou lang di laas die dem a-go de ya fa? Bies pan wa di Baibl se, di ‘taim a-go shaat.’ Den afta dat, Gad a-go “mash op di piipl dem we a mash op di ort.”​—Revilieshan 11:15-18; 12:12.

Gad don set di die an di taim wen aal a di wikid sitn dem we a gwaan iina da worl ya a-go don. (Matyu 24:36) Bot wi av som muo gud nyuuz. Iina Sekan Piita 3:9 it tel wi se Gad “no waahn nobadi fi sofa.” Im a gi evribadi we de pan di ort di chaans fi liv ou im waahn dem fi liv. Wa mek im a du dat? Kaaz wen di worl a don, im no waahn wi fi ded. An im waahn aal a wi fi de de wen im ton di ort iina wan paradais.

Kaaz Gad waahn piipl fi nuo ou fi liv iina di nyuu worl, im mek shuor se piipl aal uova di worl a tiich ada piipl bout di Baibl. An iina Matyu 24:14 Jiizas did se di gud nyuuz bout Gad Kindom a-go priich “aal uova di worl.” A uol iip an uol iip a owaz di Jeuova Witnis dem a yuuz fi priich tu piipl aal uova di worl an tiich dem bout di gud sitn dem we di Baibl se. A dis Jiizas did se wuda gwaan aal uova di worl bifuo di worl don.

A suun taim fi di govament dem tap ruul. Bot wi av som gud nyuuz fi yu. Yu na’afi ded wen da worl ya don. Yu kyan de de iina di Paradais we Gad pramis fi gi wi. Di neks paat a-go mek yu nuo ou yu kyan get fi de de.