1. A wa som piipl we worship Jeuova did redi fi du fi im?

 WI NUO se yu api se yu an Jeuova a fren. An a no yu wan fiil so, a so wol iip a piipl fiil fram lang taim tu. (Sa. 104:33, 34) Uol iip a dem gi op nof tingz so dat dem kyan worship Jeuova. An a dat di Nazarait dem we did iina Izrel fram bak iina di die did du. Bot a uu dem bi, an wa wi kyan lorn fram aal a wa dem du?

2. (a) A uu a did wan Nazarait? (Nombaz 6:1, 2) (b) Wa mek som a di Izrelait dem did ton wan Nazarait?

² Di wod “Nazarait” kom fram di Iibruu wod we miin tu se “Sumadi redi fi liv dem laif fi du sitn speshal.” Dis a mek wi si wa som a di Izrelait dem did redi fi gi op fi sorv Jeuova iina wan speshal wie. Di Laa we Gad did gi Muoziz did mek wan man ar wan uman kyan pramis Jeuova se dem a-go liv dem laif az wan Nazarait fi a taim. a (Riid Nombaz 6:1, 2.) Afta dem mek da pramis ya, di sitn dem we dem did afi du, di ada Izrelait dem neehn afi du dem tu. Bot wa mek wan Izrelait wuda waahn fi bi wan Nazarait? Dem wuda waahn bi wan Nazarait kaa dem riili lov Jeuova an dem tangk Jeuova fi aal a di blesn dem we im gi dem.​—Dyuu. 6:5; 16:17.

3. A ou Jeuova piipl dem a du laik wa di Nazarait dem did du?

³ Jeuova no ekspek nobadi fi ton Nazarait no muor kaa wi na’afi fala di Laa we im gi Muoziz, wi a du ‘di sitn dem  we Krais Jiizas se wi fi du.’ (Gya. 6:2; Ruo. 10:4) Bot jos laik di Nazarait dem, Jeuova piipl wel waahn fi sorv im wid aal a dem aat, suol, main an chrent. (Maak 12:30) Wen wi prie an gi wi laif tu Jeuova, wi pramis im se wi a-go liv wi laif fi im. Dat miin tu se wi a-go redi fi gi op eniting fi Jeuova an du wa im waahn wi fi du. Wen wi luk pan ou di Nazarait dem did du wa dem pramis Jeuova fi du, wi kyan si ou wi kyan du wa wi pramis Jeuova fi du tu. b (Mat. 16:24) Mek wi luk pan som a di sitn dem we di Nazarait dem did afi du.

YU FI REDI FI GI OP ENITING FI JEUOVA

4. Azkaadn tu Nombaz 6:3, 4, wa di Nazarait dem did redi fi gi op?

⁴ Riid Nombaz 6:3, 4. Di Nazarait dem neehn fi jringk no lika an dem neehn fi nyam tingz laik griep an riezn. Di ada Izrelait dem did aalwiez lov fi iit dem sitn ya, an notn neehn rang wid dat. An di Baibl se “wain we mek piipl fiil api” a wan prezent we kom fram Jeuova. (Sa. 104:14, 15) So aalduo dem fuud ya did nais, di Nazarait dem did aarait fi gi op dem ting ya. c

5. Wa Madián an Marcela did gi op, an wa mek?

⁵ Jos laik di Nazarait dem, wi afi gi op tingz so dat wi kyan du muor fi Jeuova. Luk pan wa did gwaan wid Madián an Marcela. d Dem did a liv wan nais laif kaa Madián did av wan nais wok, an dem did liv iina wan nais ous. Bot dem did waahn fi du muor fi Jeuova. Fi du dat dem did afi chienj op som tingz. Dem se: “Wi staat fi spen les moni. An wi muuv go iina wan likl plies an sel wi kyaar.” Madián an Marcela neehn afi du aal a dis, bot dem du dis kaa dem did waahn fi du muor fi Jeuova. An dem fiil api bout wa dem mek op dem main fi du.

6. Wa mek wi breda an sista dem gi op tingz fi sorv Jeuova? (Luk pan di picha tu.)

⁶ Di breda an sista dem api fi gi op tingz so dat dem kyan av muo taim fi du Jeuova wok. (1 Kor. 9:3-6) Bot a no laik se Jeuova naa go api wid wi ef wi no gi op dem sitn ya, an nof a dem sitn ya we wi gi  op no rang. Laik som a di breda an sista dem gi op wan wok we dem wuda lov fi du, ar fi liv iina wan nais ous, ar fi iivn av wan likl daag ar sitn laka dat. An nof a dem mek op dem main fi no get marid ya nou ar fi av no pikni. An yu av som ada breda an sista we muuv faar fram dem yaad an dem fambili fi go priich we dem niid muor elp fi du di priichin wok. Nof a wi gi op dem sitn ya kaa wi waahn fi gi Jeuova wi bes. So wi nuo fi shuor se Jeuova api wen im si se wi mek op wi main fi gi op dem sitn ya fi sorv im.​—Iib. 6:10.

YU NO FI FRIED FI DIFRANT FRAM ADA PIIPL

7. Wa mek it mait-a did aad fi di Nazarait dem du wa dem did pramis Jeuova fi du? (Nombaz 6:5) (Luk pan di picha tu.)

⁷ Riid Nombaz 6:5. Fi shuo se a Jeuova wan dem a-go lisn tu, di Nazarait dem did pramis Gad se dem wudn kot dem ier. An ef wan man a Nazarait fi wan lang taim, im ier wuda lang an piipl wuda si se im a wan Nazarait. So ef di piipl dem roun im did rispek we im a du, den it wuda iiziya fi im gwaan kip im pramis az wan Nazarait. Bot yu did av som taim wen di Izrel piipl dem neva lov an rispek wa di Nazarait dem a du. Laik iina di taim wen di prafit we niem Iemos did de bout, yu did av som Izrelait we did ton dem bak pan Jeuova an did a gi di Nazarait dem wain fi jringk kaa dem did waahn dem fi brok dem pramis fi no jringk no wain. (Iemos 2:12) It mos did aad som a di taim fi dem Nazarait ya gwaan du di sitn dem we dem pramis Jeuova se dem did a-go du, an fi du tingz difrant fram ou ada piipl wuda dwi’it.

8. Wa yu lov bout wa did gwaan wid Benjamin?

⁸ Yu si aal ef yu fried fi taak tu piipl, Jeuova kyan elp yu fi no fried fi difrant fram dem. Luk pan wa did gwaan wid wan ten-ier-uol bwai, we kom fram Naawie, we niem Benjamin. Im skuul did a kip sitn fi shuo se dem a sopuot di piipl dem iina Yuukrien we a sofa kaaz a di waar we a gwaan de, an dem did aks di pikni dem iina fi im klaas fi jres op iina di kola dem we de pan di Yuukrien flag wen dem a sing wan sang. So kaa Benjamin neehn waahn du dis, im neehn tan op nier wich paat di pikni dem did de. Bot im tiicha si im an baal out an se: “Kom uova ya-so an tan op wid wi, di wol a wi a wiet pan yu!” Bot Benjamin briev op imself an se tu di tiicha se: “Mi no tek  paat iina palitiks ar notn we av fi du wid palitiks Mis. An a nof Jeuova Witnis de a prizn ya nou Mis kaa dem no go a waar.” Di tiicha get wa im a se an se im no afi du wa dem a du den. Bot di pikni dem iina im klaas staat fi aks im wa mek im neehn kom sing wid dem. Benjamin se im did get so fried til im did fiil laik fi baal, bot im briev op imself an tel evribadi iina im klaas di siem ting we im did tel im tiicha se. Afta dat, Benjamin tel im mada an faada se im nuo se Jeuova did elp im fi tel dem di sitn dem we im biliiv iina.

9. Wa wi kyan du fi mek Jeuova api?

⁹ Kaa wi mek op wi main fi du wa Jeuova waahn wi fi du, dat mek wi difrant fram di piipl dem iina da worl ya. An a dat mek wi afi briev op wiself fi mek di piipl dem we wi wok wid, an di pikni dem we wi go a skuul wid, nuo se wi a wan Jeuova Witnis. An kaa di wie ou piipl gwaan an di ting dem we dem du a get wosa an wosa evridie, it a-go get aada an aada fi wi du di sitn dem we di Baibl se wi fi du an fi priich di gud nyuuz tu. (2 Tim. 1:8; 3:13) Bot wa wi fi aalwiez memba a dat wi “a-go mek [Jeuova] api” wen wi briev op wiself an shuo se wi difrant fram di piipl dem we naa worship im.​—Pr. 27:11; Mal. 3:18.

MEK WA JEUOVA WAAHN YU FI DU BI DI BIG TING IINA YU LAIF

10. Wa mek it wuda aad fi wan Nazarait du wa Nombaz 6:6, 7 se?

¹⁰ Riid Nombaz 6:6, 7. Wan Nazarait neehn fi go nier wan ded badi. Dis mait-a neehn luk laik sitn aad fi dem no du. Bot iina Baibl taim, wan Nazarait wuda fain dis aad fi du wen a dem uona fambili ded, kaa bak iina dem taim de wen yu av wan finaral, yu wuda naamali go nier di ded badi. (Jan 19:39, 40; Aks 9:36-40) So ef a wan a im fambili ded, im wuda afi riili chos iina Jeuova fi no go nier di ded badi so dat im kuda du wa im pramis Jeuova. Wi nuo se Jeuova did gi dem di chrent fi diil wid dem ting de.

11. Wen it kom aan tu ou wan Kristiyan diil wid dem fambili, wa dem afi mek op dem main se? (Luk pan di picha tu.)

¹¹ Wen wi prie tu Jeuova an gi wi laif tu im an ton wan Kristiyan, wi tek da pramis ya siiros. So aal wen it kom aan tu wi fambili dem, aalduo wi a-go du aal we wi kyan du fi tek kier a dem, wi naa go du  sortn tingz. So wi naa go put di sitn dem we wi fambili waahn wi fi du bifuo di sitn dem we Jeuova se wi fi du. (Mat. 10:35-37; 1 Tim. 5:8) So dis mait-a miin se som a di taim wi fambili naa go api wid di sitn dem we wi a du fi mek Jeuova api.

12. Wen Alexandru waif did waahn im fi tap stodi, wa im did du an wa im neva du?

¹² Luk pan wa did gwaan wid Alexandru an im waif, Dorina. Di tuu a dem did stodi di Baibl fi wan ier. An den Dorina tap fi ar stodi an waahn Alexandru fi tap tu. Bot Alexandru tel ar iina wan nais wie se im naa go tap, so shi neehn api bout dat an shi chrai aad fi mek im tap stodi. Alexandru se aalduo im did a chrai fi andastan wa mek shi a du wa shi a du, it neehn iizi fi im. Som a di taim dem, Dorina taak tu im rof an av prablem wid di sitn dem we im a du. Dis mek im fiil laik fi tap stodi. Bot im neehn tap du wa Jeuova waahn im fi du an im gwaan shuo im waif se im lov ar an rispek ar. An kaaz a wa im du, it mek ar staat fi stodi di Baibl agen til shi ton wan Jeuova Witnis tu.​—Go pan jw.org iina di paat we niem “Di Chuut We De Iina Gad Wod Mek Piipl Laif Beta” an wach di vidiyo we niem Alexandru an Dorina Văcar: “Wen Sumadi Av Lov Iina Dem Aat, Dem Kain Tu Piipl An Dem Tek Taim Wid Dem”

13. Wa wi fi du fi mek Jeuova an wi fambili si se wi lov dem?

¹³ Jeuova mek evribadi so dat dem kyan bi paat a wan fambili, an im waahn wi fi bi api iina wi fambili. (Ifii. 3:14, 15) So ef wi waahn fi bi api, wi afi du tingz di wie ou Jeuova waahn wi fi dwi’it. Jos nuo se Jeuova api wid yu wen yu gi op sortn tingz so dat yu kyan worship im an stil tek kier a yu fambili an gwaan du tingz fi mek dem si se yu lov dem an yu rispek dem.​—Ruo. 12:10.

PUSH UNU WAN ANEDA FI GWAAN LAIK DI NAZARAIT DEM

14. Uu an uu wi kyan luk out fa fi se sopm nais tu fi push dem fi go aan?

¹⁴ Evribadi we a worship Jeuova nou fi redi fi gi op tingz kaaz dem lov im. Dis naa go iizi fi du evritaim duo. So ou wi kyan elp wi wan aneda fi du dis? Wi kyan du dis wen wi se tingz fi push wi wan aneda fi redi fi gi op tingz fi Jeuova. (Juob 16:5) Yu si nobadi iina yu kanggrigieshan we a chrai fi gi op sortn tingz iina dem laif so dat dem kyan du muor fi Jeuova? Ar yu nuo no likl pikni we a go a skuul we a du tingz difrant fram di ada pikni dem  iivn duo it aad fi dem dwi’it? An wa bout di piipl dem we wi a stodi wid an som ada breda an sista we yu nuo se dem a fain it aad kaa dem fambili a fait gens dem kaaz a wa dem biliiv iina? Mek wi luk out fi si ou wi kyan taak tu dem wan ya an mek dem si se wi lov ou dem briev an redi fi gi op tingz fi Jeuova.​—Failii. 4, 5, 7.

15. Wa som breda an sista du fi elp out di wan dem we a yuuz muos a dem taim fi du Jeuova wok?

¹⁵ Som a di taim, wi mait-a kyan elp out som a di ada breda an sista dem we a yuuz muos a dem taim fi du Jeuova wok. (Pr. 19:17; Iib. 13:16) A dis wan sista, we op iina iej we liv iina Shri Langka, did waahn fi du. Shi did staat fi get likl muor moni pan ar penshan, so shi did waahn fi elp out tuu yong sista we did a paiyanier fi gwaan paiyanier kaa tingz did get aad fi dem. So shi mek op ar main fi elp dem pie dem fuon bil a mont taim. Da sista ya did nais, no chuu?

16. Wa wi kyan lorn fram wa Jeuova did mek di Nazarait dem du fi im?

¹⁶ So wi si se wi kyan lorn nof fram wa di Nazarait dem did du. An it mek wi si se Jeuova nuo se wi wel waahn fi du di ting dem we im waahn wi fi du, an wi redi fi gi op tingz fi sorv im beta so dat wi kyan du wa wi pramis im fi du wid wi laif. Wen im mek wi du dem sitn ya fi shuo se wi lov im, a big im a big wi op. (Pr. 23:15, 16; Maak 10:28-30; 1 Jan 4:19) Di ting dem we Jeuova mek di Nazarait dem gi op dem taim de, shuo se im si wen wi gi op tingz fi sorv im beta an im lov wi fi dat. So mek wi gwaan worship Jeuova an redi fi gi op eniting fi im.