Bot Jeuova stil waahn wi fi tek wi taim an wiet pan im fi du wa im a du, di taim wen im plan fi dwi’it. Wa mek im waahn wi fi du dat? An wa kyan elp wi fi api wen wi a wiet?

WA MEK JEUOVA WAAHN WI FI WIET?

Di Baibl se: “Jeuova jos a gwaan tek im taim an a wiet pan unu fi du sitn gud fi unu, an im a-go paadn unu. Kaa Jeuova a wan Gad we fier. An aal a unu we a gwaan wiet pan im a-go api so til.” (Aiz. 30:18) Wen Aizaiya rait dem wod ya, a di Juu piipl dem we neehn a lisn wa Jeuova a tel dem fi du im did a taak tu. (Aiz. 30:1) Bot yu did av som a dem we weehn a du wa Jeuova waahn dem fi du, an wa Aizaiya se wuda mek dem fiil se som nais sitn wuda gwaan iina di fyuucha. An a di siem ting dem wod ya kyan mek wi nuo.

Wi fi tek wi taim an wiet pan Jeuova kaa im a tek im taim an wiet tu. Kaa im av di taim set aredi wen im a-go get rid a da wikid worl ya an im a wiet pan da taim de fi kom tu. (Mat. 24:36) An da taim de evribadi a-go si se Sietan an di wan dem we a fala im did a tel bie lai pan Jeuova. An den im a-go get rid a Sietan an aal a uu did a fala im. Bot im a-go paadn di wan dem we a wiet pan im.

A no laik se wi naa go av no prablem ya nou, bot Jeuova mek wi nuo se wi kyan api aal wen wi a gwaan wiet pan im jos laik wa Aizaiya did se. (Aiz. 30:18) Si fuor sitn ya we wi kyan du we kyan mek wi api wen wi a gwaan wiet pan Jeuova.

WA WI KYAN DU FI API WEN WI A WIET?

Tingk bout di gud sitn dem we a apm iina yu laif. A uol iip a bad sitn Dievid did si iina im laif. (Sa. 37:35) Bot im did se: “Iizi yuself an wiet pan Jeuova, gwaan luk fi si wa im gweehn du. Ef it luk laik se sumadi a get we wid di bad sitn dem we im a du, no bada get beks bout dat.” (Sa. 37:7) A dat Dievid did du, im kip im main pan di gud sitn dem we im a-go get iina di fyuucha. An im tingk bout aal a di gud sitn dem we Jeuova did gi’im. (Sa. 40:5) Ef wi tingk bout di gud sitn dem we a apm iina wi laif, aal wen wi a go chuu wan rof taim insted-a tingk bout aal a di bad sitn dem we a gwaan roun wi, it a-go mek it iiziya fi wi gwaan wiet pan Jeuova.

 Du aal a wa yu kyan du fi gwaan big op Jeuova niem. A mait-a Dievid did rait Saam 71, we im tel Jeuova se: “Bot yu si mi, mi a-go jos gwaan wiet; mi a-go du aal we mi kyan du fi big yu op.” (Sa. 71:14) Bot a ou im wuda big op Jeuova? Im did du dis wen im tel ada piipl bout Jeuova an wen im sing sang fi big op Jeuova niem. (Sa. 71:16, 23) Jos laik Dievid, wi kyan api tu wen wi a gwaan wiet pan Jeuova. Wi kyan big op Jeuova niem wen wi priich an tel piipl bout im, ar wen wi taak bout im no mata we wi de ar wa wi a du, an wen wi sing wi sang dem we wi yuuz fi worship im. Di neks taim yu a sing wan a dem sang de tingk bout wa it riili a se.

Mek wi breda an sista dem elp wi fi gwaan tan op chrang. Wen Dievid did a go chuu som rof taim, im did mek Jeuova nuo se im wuda stie mongks di piipl dem we a stik tu Jeuova an se im a-go shuo se im chos iina Jeuova niem. (Sa. 52:9) A siem wie wi kyan mek di breda an sista dem elp wi fi tan op chrang, no onggl wen wi de a wi miitn dem an wen wi de iina fiil sorvis, bot wen wi a enjai wiself tu.​—Ruo. 1:11, 12.

Gwaan du di sitn dem we a-go mek wi shuor se wi a-go get di sitn dem we wi a luk faawod fi get. Saam 62:5 se: “Mi iizi miself an gwaan wiet pan Gad fi elp mi kaaz a im a-go gi mi aal a di gud sitn dem we mi a luk faawod fi get.” Wen wi nuo fi shuor se di sitn dem we wi a luk faawod fi apm a-go apm fi chuu, it a-go elp wi aal ef wi afi go chuu di sitn dem iina da worl ya langga dan wi did tingk. An wi afi nuo fi shuor se Jeuova a-go gi wi evriting we im did pramis wi no mata ou it luk laik se wi a wiet pan dem fi wan lang taim. Wi kyan du dat wen wi stodi di Baibl an stodi bout di sitn dem we di Baibl se a-go apm bifuo dem apm, an wen wi tingk bout ou evriting iina di Baibl kanek op wid dem wan aneda, an wen wi stodi evriting we Jeuova tel wi bout imself iina di Baibl. (Sa. 1:2, 3) Wan neda ting we wi fi du a mek Gad uoli spirit liid wi wen wi a prie, so das wi an Jeuova kyan kip kluos kluos wen wi gwaan tek wi taim an wiet pan im fi mek wi kyan liv fi eva.​—Juud 20, 21.

Jos laik Dievid we did a wan king, wi kyan nuo fi shuor se Jeuova a-go tek kier a di wan dem we a wiet pan im, an im a-go mek dem si se im lov dem an a stik tu dem no mata wa. (Sa. 33:18, 22) So mek wi gwaan wiet pan Jeuova an gwaan tingk bout di gud sitn dem we a gwaan iina wi laif, an big op im niem tu, an mek wi breda an sista dem gwaan push wi fi tan op chrang, an gwaan nuo fi shuor se di sitn dem we wi a luk faawod tu a-go apm fi chuu.