1. Wa Jeuova waahn fi a gwaan ya nou?

 A GAD waahn wi fi priich di gud nyuuz bout di Kindom tu evribadi. (Maak 13:10; 1 Tim. 2:3, 4) Di priichin wok we wi a du ya nou a Jeuova wok, an a wan big ting se a Jiizas Im put inchaaj a it. An wi nuo se Jiizas a-go dwi’it di wie ou Jeuova waahn im fi dwi’it bifuo di worl don.​—Mat. 24:14.

2. Wa wi a-go luk pan iina da lesn ya?

² Iina da lesn ya wi a-go si ou Jiizas a yuuz di “waiz sorvant” fi elp kip wi kluos tu Jeuova an fi lain op di priichin wok we a gwaan nou, so dat wi kyan gwaan priich aad bifuo di worl don. (Mat. 24:45) Den wi a-go si wa evri wan a wi kyan du fi shuo se wi a bak di wok we Jiizas an di waiz sorvant a du ya nou.

3. A wa Jiizas did inchaaj a?

³ Ou wi nuo se a Jiizas inchaaj a di priichin wok we a gwaan? Wi nuo kaa likl bifuo im did go bak a evn wen im did de pan wan moutn iina Gyalalii an a taak tu im falara dem, im tel dem se: “Gad gi mi powa uova evriting we a liv iina evn an pan ort.” An luk pan di neks ting we im se, im se: “So gwaan, yuuz fi mi powa, tiich mi mesij tu piipl evriwe, so dem kyan ton mi falara tu.” (Mat. 28:18, 19) So wi si se a Jiizas did inchaaj a di priichin wok tu.

4. Wa mek wi shuor se a Jiizas stil inchaaj a di priichin wok we a gwaan?

⁴ Jiizas se wi fi priich “tu piipl evriwe” so dat dem kyan ton im falara tu, an im mek wi nuo se im a-go di de fi elp  wi fi du di priichin wok “til taim don.” (Mat. 28:20) Dem wod ya mek wi si se Jiizas a-go inchaaj a di priichin wok rait dong tu fi wi taim.

5. Wa wi a du nou we shuo se wa Saam 110:3 se a kom chuu fi chuu?

⁵ Jiizas did nuo se wi wuda av inof piipl fi a priich di gud nyuuz, kaaz im nuo se wa did rait dong iina di buk a Saam wudaana apm iina fi wi taim. It se: “Di wan dem we a sorv yu a-go wel waahn fi wok fi yu pan di die wen yu aami a go a waar.” (Sa. 110:3) So ef yu a wan a dem we a priich di gud nyuuz nou, dat miin se yu a bak Jiizas an di waiz sorvant fi mek shuor se wa da skripcha ya se wuda apm a it a apm fi chuu. Bot iivn duo di priichin wok a gwaan gud, yu av som tingz we a mek it aad stil.

6. Wa a wan sitn we mek it aad fi di wan dem we a priich bout Gad Kindom?

⁶ Wan a ting dem we mek it aad fi di wan dem we a priich bout di Kindom a das piipl a fait gens dem. Som a dem piipl ya yuus tu worship wid dem, bot den staat fi fait gens Jeuova. Som a dem a choch liida an som a dem a palitishan. Dem tel lai pan wi an di wok we wi a du. So ef wi fambili dem, an piipl we wi nuo, an di wan dem we wi wok wid ier di lai dem we dem a tel pan wi an biliiv it, dem mait-a staat fi presha wi fi tap sorv Jeuova ar fi tap priich tu. Iina som a di konchri dem, dem mait-a chretn wi, ar lak wi op an put wi iina prizn, ar chrai fi mek wi fiil fried fi du di sitn dem we Gad waahn wi fi du. Bot wi nuo se dem wuda du dis kaaz Jiizas did don tel wi se: “Kaa unu a fala mi, piipl fram aal bout a-go iet unu.” (Mat. 24:9) Di fak se wi a go chuu dem sitn ya mek wi nuo se Jeuova aarait wid wa wi a du. (Mat. 5:11, 12) A di Devl mek dem a du aal a dem wikid sitn ya. Bot im kyaahn tes Jiizas! Kaa a Jiizas a elp wi wid di priichin wok we wi a du, piipl fram evriwe a ier di gud nyuuz bout Gad Kindom. Luk pan wa mek wi se so.

7. Wa wi si a gwaan ya nou we mek wi nuo se wa Revilieshan 14:6, 7 se a-go apm a apm fi chuu?

⁷ Wan neda ting we mait-a mek it aad fi wi du di priichin wok a kaa evribadi no taak di siem langwij. Jiizas did mek di apasl Jan nuo se dis wudn tap di priichin wok fram gwaan. (Riid Revilieshan 14:6, 7.) Wi nuo dis kaa piipl fram aal uova di worl kyan riid buk an pamplet we a tel wi bout di Baibl iina muor dan 1,000 difrant langwij pan wi jw.org websait. An di mien buk we wi yuuz fi tiich piipl bout di Baibl we niem Yu Kyan Bi Api Nou An Fi Eva!, di waiz sorvant mek wi kyan av it iina muor dan 700 difrant langwij. Aal piipl we def kyan get vidiyo fi wach an di wan dem we blain kyan get sitn we rait iina briel fi riid we kyan elp dem fi kip kluos tu Jeuova. Wi si aal a dem sitn ya we di Baibl se wudaana apm a apm ya nou, kaa piipl “we chat aal kain-a difrant langwij, we kom fram aal a di konchri dem,” a lorn di chuut fram di Baibl an dat komiin laka wan langwij. (Zak. 8:23; Zef. 3:9) Wi a du aal dem sitn ya kaaz a Jiizas Krais inchaaj a di wok we wi a du an im nuo wa im a du.

8. A wa an wa apm aredi kaa a di priichin wok we wi a du?

⁸ Iina Jeuova aaganaizieshan yu av muo dan 8,000,000 piipl iina 240 difrant difrant konchri. An evri ier wol iip a touzn a piipl a baptaiz siem wie! Di big ting a no di mount a piipl dem we a sorv  Jeuova nou, bot di big ting a di gud wiez dem we di piipl dem av kaa dem wok aad fi komiin laik wan “nyuu sumadi.” (Kol. 3:8-10) So dem tap du di doti sitn dem we dem yuus tu du. Laik di wan dem we yuus tu du aal kain-a seks sin an dem sitn de, ar we lov fait an biit op biit op ada piipl, an di wan dem we iet piipl kaaz a ou dem luk ar kaaz a wich paat dem kom fram, an di wan dem we onggl lov fi dem konchri wan; aal a dem tap du dem sitn de. So wa Aizaiya 2:4 se wuda apm a dat a apm; dem naa lorn fi fait waar no muor. Wen wi chienj op wi wiez dem it a-go komiin laik wi ton wan nyuu sumadi an a dat a-go mek piipl waahn fi bi paat a Jeuova aaganaizieshan. Pan tap a dat, it a-go shuo se wi a du wa wi liida Jiizas Krais tel wi fi du. (Jan 13:35; 1 Pii. 2:12) A no bok op kaaz aal a dem sitn ya fi apm. Dem a apm kaa a Jiizas a elp wi.

9. Azkaadn tu Matyu 24:45-47, wa di Baibl did se a-go apm iina di laas die dem?

⁹ Riid Matyu 24:45-47. Jiizas did tel im falara dem se iina di laas die dem im wuda pik wan “waiz sorvant” we wuda gi dem tingz fi elp dem kip kluos tu Jeuova; an wi si se dem a wok aad fi du dat. A no wol iip a man iina da gruup de, bot aal a di man dem iina da gruup de a man we get pik fi go a evn, an a dem Jiizas put inchaaj fi shier out im piipl dem “fuud wen a taim fi dem nyam.” Bot dem man de no tingk se dem a wi baas we a ruul wi an afi a tel wi wa fi biliiv. (2 Kor. 1:24) Kaa dem nuo se a Jiizas Krais a wi liida an a im a tel im piipl dem wa fi du.​—Aiz. 55:4.

10. A wich wan a dem buk ya iina di picha did mek yu nuo se, ye, a dis a di chuut?

¹⁰ Fram 1919 til nou, di waiz sorvant a  gi wi wol iip a buk an pamplet an dem ting de fi yuuz elp piipl fi nuo di chuut we iina Gad Wod. Iina 1921 di waiz sorvant gi wi di buk we niem The Harp of God fi elp piipl fi kom lorn wa di Baibl tiich. Afta dat wi get som ada buk an pamplet tu. A wich wan a dem buk ya did elp yu fi nuo Jeuova? Si dem ya “Let God Be True,” ar The Truth That Leads to Eternal Life, ar You Can Live Forever in Paradise on Earth, ar Knowledge That Leads to Everlasting Life, ar What Does the Bible Really Teach?, ar What Can the Bible Teach Us? ar a di wan we wi av nou we niem Yu Kyan Bi Api Nou An Fi Eva! Aal a dem buk ya did elp piipl fi kom sorv Jeuova iina di taim wen dem did mek fi yuuz.

11. Wa mek it impuotant se wi get di tingz dem we wi niid fi kip wi kluos tu Jeuova?

¹¹ A no onggl di piipl dem we jos staat fi stodi fi nuo nof tingz bout Jeuova an di Baibl. Aal a wi afi nuo tu. Di apasl Paal did mek wi nuo se “aad fuud a fi big piipl.” Im mek wi nuo se wen wi get fi nuo nof bout Jeuova it a-go elp wi “fi nuo wa rait fram rang, so [wi kyan] nuo ou fi luk pan tingz.” (Iib. 5:14) Iina dem taim ya wen tingz so aad an piipl a liv aal saat a wie, it kyan mek it aad fi wi du wa Jeuova waahn wi fi du. Bot Jiizas mek shuor se wi a lorn tingz fram di Baibl we a-go elp wi fi chos iina Gad muor. An a di waiz sorvant im yuuz fi gi wi di tingz dem we a-go elp fi wi chos iina Gad muor, an dem tingz de komiin laka fuud dem a gi wi.

12. Ou wi big op Jeuova niem laka ou Jiizas did big it op?

¹² Jos laka Jiizas, wi big op Jeuova niem kaa a dat Im fi get. (Jan 17:6, 26) Wan a di wie wi du dat a wen iina 1931 wi tek aan di niem Jeuova Witnis we kom  fram di Baibl, we shuo se a Jeuova a wi Faada. (Aiz. 43:10-12) An iina Aktuoba da siem ier de wi staat put Jeuova niem pan di kova a Di Wachtowa dem. Pan tap a dat, aalduo nof a di choch piipl dem tek out Jeuova niem outa dem Baibl, di New World Translation of the Holy Scriptures we wi av put bak Jeuova niem iina it we it fi de!

13. Wa mek yu nuo fi shuor se Jiizas a yuuz di waiz sorvant iina fi wi taim? (Jan 6:68)

¹³ Iina fi wi taim, Jiizas a yuuz di waiz sorvant fi aaganaiz op im falara dem fi worship Jeuova iina wan gud an kliin wie. So Jiizas Krais av wan aaganaizieshan pan ort nou we im a yuuz. Ou yu fiil bout it? Miebi yu wuda ansa laka ou Piita did ansa Jiizas wen im se: “Laad, a uu els wi mos go tu? A yu av di mesij we kaaz piipl fi liv fi eva.” (Jan 6:68) A wa wi wudaana gwaan wid ya nou ef wi neehn get fi bi paat a Jeuova aaganaizieshan, iihn? Yu eva tingk bout it? Kaa memba yu no, a it Jiizas a yuuz fi gi wi di sitn dem we wi niid fi kip kluos tu Jeuova. An im a yuuz it fi tiich wi di bes wie ou fi du di priichin wok. Pan tap a dat, im a elp wi fi bi laik “wan nyuu sumadi” we kyan mek Jeuova api wid wa wi a du.​—Ifii. 4:24.

14. Wen KUOVID a kip, wa gud it du yu fi bi paat a Jeuova aaganaizieshan?

¹⁴ Jiizas mek wi nuo di rait ting fi du wen di worl a go chuu wol iip a prablem. An wi kuda si dis wen KUOVID brok out. Kaa wen wol iip a piipl iina di worl neehn nuo wa fi du, Jiizas mek shuor se wi nuo wa fi du fi kip sief. Di waiz sorvant did mek wi nuo se di bes ting fi du a fi wier  wi maas an chrai no fi go tuu kluos tu nobadi wen wi go out. An dem mek di elda dem nuo se dem fi aalwiez chrai fi fain out fram di breda an sista dem ef dem aarait wid fuud an dem ting de, ar ef dem a get di sitn dem we dem niid fi kip kluos tu Jeuova. (Aiz. 32:1, 2) An pan tap a dat, di Govanin Badi tel wi som muo sitn we wi fi du fi kip sief, an dem gi wi di opdiet dem a mont taim fi push wi fi gwaan tan op chrang.

15. Iina KUOVID, ou di waiz sorvant did se wi fi kip wi miitn dem an du di priichin wok, an wa wi si apm kaa wi du wa dem se?

¹⁵ Wen KUOVID dis staat wi did get fi nuo ou wi a-go kip wi miitn dem an ou wi a-go gwaan du di priichin wok tu. Kwik kwik taim wi staat fi av wi miitn dem an wi sorkit miitn an kanvenshan dem pan Zoom an dem ting de. An fi du muos a wi priichin wi rait leta an yuuz di fuon. An wi si se Jeuova bles wa wi du kaa nof a di branch afis dem a fain se a wol iip muor piipl kom staat sorv Jeuova. Matarafak, wol iip a wi breda an sista dem tel wi som nais sitn we apm iina da taim ya.​—Luk pan di paat we niem “ Jeuova A Bles Di Priichin Wok We Wi A Du.”

16. A wa wi kyan shuor se?

¹⁶ Som piipl mait-a did a tingk se di aaganaizieshan a tek dis KUOVID ting tuu siiros. Bot bies pan wa gwaan, evribadi did get fi si se di sitn dem we dem did tel wi fi du an no fi du did mek sens fi chuu. (Mat. 11:19) An wen wi sidong an tingk bout ou Jiizas a liid im piipl dem iina wan nais wie we mek dem si se im lov dem, it no mata wa a-go gwaan tide ar tumaro, Jeuova an im wan dege-dege Bwai Pikni a-go de de wid wi fi elp wi.​—Riid Iibruu 13:5, 6.

17. Ou yu fiil fi nuo se a Jiizas inchaaj a di wok we yu a du?

¹⁷ Wi api fi nuo se a Jiizas inchaaj a wi. Wi iina wan aaganaizieshan we notn no tap wi fram du wa Jeuova waahn wi fi du. It no mata wich paat wi kom fram ar wa kain-a langwij wi chat, wi get evriting we wi niid fi du di priichin wok an wa wi niid fi kip kluos tu Jeuova. An Jeuova aaganaizieshan a elp evri wan a wi fi du tingz di wie ou Jeuova waahn wi fi dwi’it we mek wi komiin laik wan nyuu sumadi, an wi a lorn fi lov wi wan aneda tu. Ye man, wi av evri riizn fi buos se a Jiizas inchaaj a wi!