1. A wa a som a di blesn dem we wi get kaa wi de iina Jeuova aaganaizieshan?

 WI API se wi a paat a Jeuova aaganaizieshan iina dem laas die ya. An aal wen tingz get wos an wosa, Jeuova gi wi wi breda an sista dem we wi an dem a wok tugeda az wan. (Sa. 133:1) An im mek wi an wi fambili kluos kluos. (Ifii. 5:33–6:1) An im mek wi waiz so dat wi kyan diil wid di prablem dem we wi av an api stil.

2. Wa wi fi gwaan du, an wa mek?

² Wa mek wi stil afi wok aad fi sorv Jeuova di rait wie? Wi afi dwi’it kaa som a di taim dem wi breda an sista dem a-go du sitn we wi no laik kaa dem no porfek. An wi mait-a beks wid wiself tu, wos wen wi a mek di siem mistiek dem uova an uova agen. Bot wi fi stil go chuu an no gi op (1) wen wan a wi breda ar sista du sitn we bon wi, (2) wen di sumadi we wi marid tu du sitn bad we wi neehn nuo se dem wuda du, an (3) wen wi beks wid wiself kaaz a sitn we wi du. Iina da lesn ya, wi a-go luk pan dem chrii sitn ya, an wi a-go luk pan sumadi iina di Baibl we did go chuu an no gi op aal wen tingz neehn de gwaan gud.

GO CHUU AN NO GI OP WEN WAN A WI BREDA AR SISTA DU SITN WE BON WI

3. Wa mait-a mek it aad fi som a Jeuova piipl dem gwaan sorv im?

³ Wa mait-a mek it aad. Som a wi breda an sista dem mait-a av som wiez we wi no laik. Ar som mait-a du sitn we wi neehn ekspek se dem wuda du. Ar dem mait-a  chriit wi bad. Ar it mait-a aad fi wi wen wi si se di elda dem du sitn we dem neehn fi du. Dis mait-a mek som piipl staat fi wanda ef dis a riili Jeuova aaganaizieshan. So insted-a fi gwaan sorv Jeuova wid dem breda an sista dem “tugeda az wan,” dem mait-a tap taak tu di sumadi we du sitn we ort dem ar dem mait-a tap go a di miitn dem. (Zef. 3:9) Yu tingk dat mek sens? Nuo sa! Mek wi luk pan sumadi iina di Baibl we did go chuu sitn laka dat.

4. Wa a som sitn we Paal did go chuu?

⁴ Wan a di sumadi dem we di Baibl tel wi bout. Di apasl Paal did nuo se im breda an sista dem neehn porfek. Laik di breda an sista dem did staat fi joj im di rang wie wen im did ton wan Kristiyan. (Aks 9:26) An afta dat, dem aal chat im baka im bak an se tingz fi ort im. (2 Kor. 10:10) Im aal si wan a di breda dem we did a liid dem du sitn we im neehn fi du we kuda mek ada piipl sin. (Gya. 2:11, 12) An aal im gud fren Maak du sitn we im neehn ekspek im fi du. (Aks 15:37, 38) Paal kuda mek eni wan a dem sitn ya mek im tap diil wid di breda an sista dem. Bot im neehn du dat. Im gwaan tingk bout di gud sitn dem we dem did a du, an dat did mek Paal go chuu an gwaan du Jeuova wok.

5. Wa did mek Paal no gi op pan im breda an sista dem? (Koloshan 3:13, 14) (Luk pan di picha tu.)

⁵ Paal did lov di breda an sista dem. An dat did mek im gwaan tingk bout di gud sitn dem we dem did a du aalduo dem neehn porfek. An kaa im lov di breda an sista dem, it mek im du wa im se a Koloshan 3:13, 14. (Riid.) An wi si dat iina di wie ou im did diil wid Maak. Aalduo Maak did go we lef Paal di fos taim Paal did a go roun go priich, im stil neehn beks wid Maak fi lang. Kaa afta dat, Paal did rait wan leta tu di kanggrigieshan we de iina Kolasi an big op Maak an se Maak did wok aad an im ‘elp an push im wol iip.’ (Kol. 4:10, 11) An wen im did de a prizn iina Ruom, im aks dem fi mek Maak kom de kom elp im. (2 Tim. 4:11) So wi si se Paal neehn gi op pan im breda an sista dem. Wa wi kyan lorn fram dis?

6-7. Ou wi kyan gwaan shuo wi breda an sista dem se wi lov dem aalduo dem no porfek? (1 Jan 4:7)

⁶ Wa wi kyan lorn. Jeuova waahn wi fi go chuu an du tingz fi mek wi breda an  sista dem si se wi lov dem. (Riid 1 Jan 4:7.) Ef sumadi du sitn fi ort wi, wi no fi fiil se a kaa dem riili waahn fi ort wi, kaa dem a chrai fi du wa Jeuova se dem fi du tu. (Pr. 12:18) Memba se Jeuova lov dem tu aalduo dem no porfek. An im no kot wi aaf kaa wi du wan likl sopm rang. An im naa go aalwiez av wi op. (Sa. 103:9) So a wan gud sitn fi wi du laik Jeuova an paadn wi breda an sista dem!​—Ifii. 4:32–5:1.

⁷ Di kluosa an kluosa wi get tu di en a da worl ya, wi a-go niid wi breda an sista dem muor an muor. An a di muor piipl a-go fait gens wi kaaz a wa wi biliiv iina. An wi mait-a aal en op iina prizn kaaz a di sitn dem we wi biliiv iina. An ef dat apm, wi a-go niid wi breda an sista dem muor dan nou dem taim de. (Pr. 17:17) Tingk bout wa did apm tu wan breda we niem Josep a we a wan elda iina Spien. Kaa im an som ada breda neehn get miks op iina palitiks, dem lak dem op iina prizn. Im se: “Kaa di wol a wi liv tugeda iina prizn, it did iiziya fi wi get pan tap a wi wan aneda norvz. So wi did afi gwaan bier wid wi wan aneda an paadn wi wan aneda. An dis did elp wi fi tek kier a wi wan aneda an liv tugeda az wan, kaa iina prizn a wol iip a piipl di de we naa sorv Jeuova. Wan a di taim dem, mi did mash op mi an an it did iina kyaas so mi kudn du wol iip a tingz fi miself. Bot wan a di breda dem wash mi kluoz dem an du som ada tingz fi mi we mi kudn du fi miself. Mi breda dem did de de fi mi wen mi did riili niid dem.” So wi si wa mek wi fi saat out eni prablem we wi av wid wi breda an sista dem nou.

WI KYAN GO CHUU WEN DI SUMADI WE WI MARID TU DU SITN BAD WE WI NEEHN NUO SE DEM WUDA DU

8. Wa a som sitn we mait-a mek it aad fi piipl afta dem marid?

⁸ Wa mait-a mek it aad. Evribadi we marid a-go av prablem iina dem marid laif. Di Baibl did mek wi nuo se “dem a-go av nof chobl iina da laif ya.” (1 Kor. 7:28) An dis a kaa a tuu sumadi we no porfek kom tugeda an dem av difrant difrant tingz we dem laik an we dem no laik. An dem av difrant wiez tu, an dem gruo difrant. An somtaim a afta yu marid yu si som wiez we dem av we yu no laik. Aal a dem sitn ya kyan kaaz prablem. An wen dem prablem ya kom dem mait-a bliem dem wan aneda. Bot it gud fi riyalaiz se a no wan sumadi fi bliem fi di prablem dem, so di tuu a dem fi chrai fi fiks di prablem dem. An dem no fi fiil se ef dem gi dem wan aneda piepa we shuo se dem no marid agen ar ef dem lef dem wan aneda it a-go fiks di prablem. b Mek wi luk pan sumadi iina di Baibl we did a go chuu wan rof taim iina dem marid laif bot dem stil neehn lef di sumadi we dem did marid tu.

9. Wa kain-a ozban Abigiel did afi diil wid?

⁹ Wan a di sumadi dem we di Baibl tel wi bout. Abigiel did marid tu Niebal, an di Baibl mek wi nuo se im did a wan wikid  man we neehn av notn gud bout im. (1 Sam. 25:3) It mos did aad fi Abigiel liv wid im. Abigiel kuda did lef im wen Dievid, uu did a-go ton Izrel king, kom fi kil im kaaz im did dis di man dem we did a fala Dievid. (1 Sam. 25:9-13) Abigiel kuda ron we an mek Dievid kil im, bot shi taak op an mek Dievid no kil im. (1 Sam. 25:23-27) A wa did mek ar du dat?

10. Aalduo Niebal did tan bad, wa mek Abigiel neehn get op an lef im?

¹⁰ Abigiel lov Jeuova an shi did rispek wa im se fi apm wen wan man an wan uman marid. An shi mait-a did nuo wa Gad se wen im did gi Adam im waif, Iiv. (Jen. 2:24) So shi did nuo se wen wan man an wan uman marid, a wan siiros ting tu Jeuova. An shi did waahn fi mek Jeuova api, so shi did redi fi du eniting fi siev di piipl dem we did liv iina ar ous, aal ar ozban tu. So shi du sitn kwik kwik so dat Dievid no kil Niebal. Shi did aal redi fi se sari fi sitn we shi neva du. So wi si se shi did briev an shi neehn did a tingk bout arself wan. An Jeuova did lov ar fi dat. Wa di ozban an waif dem kyan lorn fram wa Abigiel did du?

11. (a) Wa Jeuova ekspek di piipl dem we marid fi du? (Ifiijan 5:33) (b) Wa wi kyan lorn fram wa Carmen did du fi mek ar marid laif no mash op? (Luk pan di picha tu.)

¹¹ Wa wi kyan lorn. Jeuova waahn wan ozban an waif fi tan wid dem wan aneda aal ef it aad fi liv wid wan a dem. Jeuova fiil gud wen im si wan ozban an waif a wok aad fi saat out dem prablem dem, an wen dem du tingz fi mek dem wan aneda si se dem lov an rispek dem wan aneda. (Riid Ifiijan 5:33.) Luk pan wa did apm tu Carmen. Bout siks ier afta shi marid, shi staat fi stodi di Baibl wid di Jeuova Witnis dem an get baptaiz. Shi se: “Mi ozban neehn laik dis. Im did staat fi groj Jeuova fi aal a di sitn dem we mi a du fi im. So im wuda se tingz fi mek mi fiil shiem an tel mi se im a-go lef mi.” Bot aalduo im du aal a dem sitn de, Carmen neehn lef im. Fi 50 ier shi chrai aad fi mek im si se shi lov an rispek im. Shi se: “Wa mi du a chrai fi andastan im beta, an mi chrai fi taak tu im iina wan nais wie. Yu si kaa mi nuo se Jeuova tek marid laif siiros, mi du evriting we mi kuda du fi tan wid mi ozban. Mi neehn gi op kaa mi lov Jeuova.” c So ef yu a av prablem iina  yu marid laif, jos nuo se Jeuova a-go de de fi elp yu go chuu.

STIL WOK AAD AN GO CHUU AAL WEN YU BEKS WID YUSELF KAAZ A SITN WE YU DU

12. Ou wi mait-a fiil ef wi sin bad?

¹² Wa mait-a mek it aad. Ef wi en op sin bad, wi mait-a fiil laik se wi fi tap chrai fi sorv Jeuova. Di Baibl mek wi nuo se Jeuova si se wen wi du sitn rang, wi mait-a fiil mash op an pap dong. (Sa. 51:17) Wan breda we niem Robert did wok aad fi wol iip a ier fi ton wan ministiiriyal sorvant. Bot afta dat, im en op sin bad an im si se a sel im sel out Jeuova. Im se: “Mi kanchens staat fi bada mi bad. An afta dat, kaa mi fiil so bad, mi baal an prie tu Jeuova. An mi memba se mi did fiil laik se Jeuova naa go lisn mi agen. Wa mek im wuda lisn tu mi afta mi du dat, iihn?” Ef wi fain se wi en op a sin bad tu, wi mait-a fiil laik wi fi tap sorv Jeuova kaa wi fiil so bad an wi fiil laik se Jeuova naa go av notn fi du wid wi agen. (Sa. 38:4) Ef a so yu fiil, mek wi luk pan sumadi iina di Baibl, we aalduo dem did sin bad, dem did stil go chuu an gwaan sorv Jeuova.

13. Wa a som a di sitn dem we Piita did du bifuo im sin bad, an wa im did du wen im sin bad?

¹³ Wan a di sumadi dem we di Baibl tel wi bout. Di nait bifuo dem kil Jiizas, di apasl Piita du som wol iip a sitn we mek im en op sin bad. Di fos ting Piita du a buos se aal ef di ada apasl dem lef Jiizas, im naa go lef Jiizas. (Maak 14:27-29) An wan neda ting a dat wen im de iina di plies we niem Getsemini im neehn a kip wach. (Maak 14:32, 37-41) An wen di kroud a piipl did waahn fi kil Jiizas, Piita lef im. (Maak 14:50) An pan tap a dat, a chrii taim im swier se im no nuo Jiizas. (Maak 14:66-71) So afta im riyalaiz se im sin bad, im pudong wan piis a baalin, miebi kaa im did fiil gilti bad. (Maak 14:72) Jos tingk ou im mos did fiil bad wen kopl owaz afta dat dem kil im fren Jiizas. Im mos did fiil laik se im no wot notn!

14. Wa did elp Piita fi go chuu an gwaan sorv Jeuova? (Luk pan di picha pan di kova.)

¹⁴ Piita kuda gwaan sorv Jeuova kaa im neehn kip we fram ada piipl an im go tu di ada falara dem we kuda tel im tingz we mek im fiil beta. (Luuk 24:33) An pan tap a dat, afta Jiizas kom bak alaiv, im go tu Piita an im push im fi go chuu an mek  im fiil beta tu. (Luuk 24:34; 1 Kor. 15:5) An afta dat, Jiizas neehn jraa op Piita kaaz a wa im did du. Bot im tel im fren Piita se im wuda gi im muor wok fi du. (Jan 21:15-17) Piita did nuo se im sin bad, bot im neehn gi op pan imself kaa im nuo se Jiizas neehn gi op pan im. An Jiizas ada falara dem did stil de de fi im. Wa wi kyan lorn fram wa apm wid Piita?

15. Wa Jeuova waahn wi fi nuo fi shuor? (Saam 86:5; Ruoman 8:38, 39) (Luk pan di picha tu.)

¹⁵ Wa wi kyan lorn. Jeuova waahn wi fi nuo se im lov wi an im redi fi paadn wi. (Riid Saam 86:5; Ruoman 8:38, 39.) Wen wi sin an wi fiil gilti, notn no rang wid dat. Bot wi no fi fiil se Jeuova kyaahn go lov wi agen an im naa go paadn wi. Wa wi fi du a get elp siem taim. Memba Robert we wi taak bout aredi? Im se: “Mi did en op sin kaa mi did a dipen pan miself fi no du wa rang.” Im si se im did afi go taak tu di elda dem. Im se: “Wans mi go taak tu dem, siem taim mi kuda si se Jeuova yuuz dem fi mek mi si se im lov mi. Di elda dem neehn gi op pan mi, an dem elp mi fi si se Jeuova neehn lef mi niida.” Wi kyan nuo fi shuor se Jeuova lov wi tu an im a-go paadn wi ef wi sari fi wa wi du, ef wi go mek di elda dem elp wi, an ef wi a chrai aad fi no du dem bad sitn de agen. (1 Jan 1:8, 9) Wen wi nuo fi shuor se Jeuova lov wi an im a-go paadn wi, aal ef wi sin bad, wi naa go tap sorv im.

16. Wa mek yu a-go mek op yu main fi gwaan sorv Jeuova no mata wa?

¹⁶ Jeuova lov it wen wi du aal a wa wi kyan du fi sorv im iina dem laas die ya wen tingz aad bad. Wid di elp we Jeuova a gi wi, wi kyan go chuu aalduo tingz mait-a apm. Wi kyan stil lov wi breda an sista dem an paadn dem aal ef dem du sitn we ort wi. An wi kyan shuo Jeuova umoch wi lov im an rispek wa im se bout marid laif wen wi du aal a wa wi kyan du fi saat out wi prablem dem. An ef wi sin bad, wi kyan mek Jeuova elp wi, an wi kyan nuo fi shuor se im lov wi an im a-go paadn wi, an wi fi gwaan du wa wi kyan du fi gwaan sorv im. “So mek wi no get taiyad fi du gud” kaaz ef wi no gi op wi nuo fi shuor se wi a-go get nof nof blesn.​—Gya. 6:9.