1-2. (a) Wa an wa di breda an sista dem we no marid yet fi tingk bout bifuo dem an sumadi staat taak? (b) Wen wi se “tuu sumadi a taak”, wa wi miin? (Luk pan di paat we niem “Dis Miin Se.”)

 YU A sumadi we waahn fi get marid? Aalduo yu na’afi marid fi api, nof a di breda an sista dem we no marid aredi waahn fi fain sumadi fi marid tu, no mata ef dem yong ar ef dem uol. Bot bifuo yu staat fi taak tu sumadi we yu wuda waahn fi marid tu, yu afi mek shuor se yu a-go av di moni fi tek kier a di sumadi we yu a-go marid tu, an yu a du di sitn dem we a-go kip yu kluos tu Jeuova, an yu nuo se yu kyan diil wid di sitn dem we mait-a kom op iina marid laif. a (1 Kor. 7:36) Wen yu mek shuor se yu du dem sitn ya, it a-go elp unu fi av wan gud marid laif.

² Bot it no aalwiez iizi fi fain wan gud sumadi fi marid tu. (Pr. 31:10) An aal wen it luk laik yu si sumadi we yu wuda waahn fi marid tu, it mait-a no so iizi fi yu an dem staat taak. b Iina da lesn ya, wi a-go luk pan wa kyan elp di breda an sista dem we waahn fi marid fi fain wan gud sumadi fi marid tu an ou dem kyan get fi staat taak. An wi a-go luk pan ou di breda an sista dem iina di kanggrigieshan kyan elp dem.

 WA YU KYAN DU FI FAIN SUMADI GUD FI MARID TU?

3. Wen yu a luk sumadi fi marid tu, wa a som a di sitn dem yu fi tingk bout?

³ Ef yu waahn fi marid, yu fi nuo wa yu a luk fa bifuo yu staat fi taak tu sumadi, ar els yu mait-a en op a luk di rang sumadi. Ar sumadi mait-a di de we gud fi yu we yu naa si. Bot wan ting yu fi mek shuor a, a se di sumadi we yu waahn fi marid tu baptaiz an a sorv Jeuova. (1 Kor. 7:39) Bot it no miin tu se jos kaa sumadi baptaiz a wan gud sumadi fi yu marid tu. Yu fi aks yuself dem kwestiyan ya: ‘Wa mi riili waahn outa laif? Wa a som a di wiez dem we mi waahn di sumadi we mi a-go marid tu fi av? Mi ches tuu ai?’

4. Wa a som a di sitn dem we som breda an sista prie bout?

⁴ Ef yu a sumadi we waahn fi marid, wi shuor se dis a sitn we yu prie bout aredi. (Fil. 4:6) Wi nuo se Jeuova no pramis fi fain no waif ar no ozban fi nobadi. Bot wa wi nuo se im a-go du a dat im a-go gi yu di sitn dem we yu niid, an im kier bout ou yu fiil, an im kyan elp yu wen yu a luk sumadi fi marid tu. So gwaan tel im ou yu fiil an di sitn dem we yu waahn. (Sa. 62:8) Aks Jeuova fi mek yu waiz an fi elp yu fi gwaan wiet. (Jmz. 1:5) Wan breda we niem Jan, c we kom fram Merika, tel wi som a di sitn dem we im prie bout. Im se: “Mi tel Jeuova di wiez dem we mi wuda waahn mi waif fi av, an fi elp mi fi fain wan uman wid dem kain-a wiez de. An mi aks Jeuova fi elp mi fi av di wiez dem we a-go mek mi bi wan gud ozban.” Wan sista we niem Tanya, we kom fram Shri Langka, se: “Mi aks Jeuova fi elp mi fi gwaan chos iina im an du wa im waahn mi fi du, an fi elp mi luk pan tingz iina  wan gud wie, an fi api iina di taim wen mi a gwaan luk sumadi fi marid tu.” Yu kyan shuor se aal ef yu no fain sumadi fi marid tu rait ya nou, Jeuova pramis se im a-go gwaan tek kier a yu an gi yu di sitn dem we yu niid so dat yu kyan gwaan api.​—Sa. 55:22.

5. Wich paat di wan dem we no marid kyan fain ada breda an sista we no marid we lov Jeuova tu? (1 Korintiyan 15:58) (Luk pan di picha tu.)

⁵ Di Baibl tel wi se wi fi “mek shuor se [wi] eva a du di Laad wok.” (Riid 1 Korintiyan 15:58.) Ef wi eva a du Jeuova wok an a spen taim wid difrant difrant breda an sista, wi a-go elp fi bil op wi wan aneda. Bot no onggl dat, yu a-go get di chaans fi miit op wid ada breda an sista we no marid we a yuuz dem laif fi sorv Jeuova laik yu. An wen yu du aal we yu kyan du fi mek Jeuova api, dat a-go mek yu api tu.

6. Wen yu a luk sumadi fi marid tu, wa yu fi memba se?

⁶ Bot memba dis: Jos kaa yu a chrai fain sumadi fi marid tu, dat no miin tu se it fi bi di big ting iina yu laif. (Fil. 1:10) Kaa yu na’afi marid fi api. Bot wa a-go mek yu api a wen yu an Jeuova a fren. (Mat. 5:3) An memba se ino, wen yu no marid yu a-go av muor taim fi du tingz fi Jeuova. (1 Kor. 7:32, 33) So mek gud yuus a di taim we yu av ya nou. Wan sista we niem Jessica, we liv iina Merika we marid wen shi a nieli 40, se: “Mi gwaan du nof tingz fi Jeuova an dat did elp mi fi aarait wid mi laif aalduo mi neehn marid.”

SIDONG AN TEK IIN DI SUMADI

7. Wa mek it wuda gud fi yu sidong an tek iin di sumadi bifuo yu mek dem nuo se yu laik dem? (Pravorbz 13:16)

⁷ Ef yu si sumadi we mait-a luk laik wan gud sumadi fi marid tu, yu tingk se yu shuda ron go tel dem se yu laik dem? Di Baibl tel wi se di sumadi we waiz chrai fi fain out tingz bifuo dem du notn. (Riid Pravorbz 13:16.) So it wuda gud fi yu chrai fi sidong an tek iin di sumadi fi a taim bifuo yu mek dem nuo se yu laik dem. Wan breda we niem Austin, we kom fram di Nedalanz, se: “Yu kyan staat fi laik sumadi kwik kwik, an den likl afta dat yu no laik dem agen. So ef yu tek di taim fi tek iin di sumadi, yu naa go jos ron an staat taak tu dem so, jos kaaz a ou yu fiil. An muo dan dat, ef yu tek di taim fi tek iin di sumadi, yu mait-a si se dat de sumadi de a no di rait sumadi fi yu.”

8. Wen yu a luk sumadi fi marid tu, ou yu kyan sidong an tek dem iin? (Luk pan di picha tu.)

⁸ Ou yu kyan sidong an gwaan tek iin di sumadi? Wel, wen yu go a di miitn dem ar wan likl paati wid di breda an sista dem, yu mait-a si tingz bout di sumadi, laik di kain-a wiez dem we dem av an ou kluos dem bi tu Jeuova. Wen yu a tek iin di sumadi, aks yuself dem kwestiyan ya: ‘A uu a im fren dem? An wa im lov fi taak bout?’ (Luuk 6:45) Yu an di sumadi waahn fi du di sed ting wid unu laif? Wan neda ting we yu kyan du a fi taak tu di elda dem iina dem kanggrigieshan ar taak tu sumadi we chrang iina wa dem biliiv iina we nuo dem gud gud. (Pr. 20:18) Yu kyan aks dem wa kain-a wiez di sumadi av an wa piipl tingk bout dem. (Ruut 2:11) Bot mek shuor se wen yu a tek iin di sumadi, yu naa wach-wach dem an a mek dem fiil no wie. An shuo se yu rispek ou di sumadi fiil an chrai fi no go iina dem bizniz tu moch, an no chrai an go evriwe yu nuo se di sumadi a-go de.

9. Bifuo yu go tu di sumadi we yu laik, a wa yu fi shuor bout?

 ⁹ A ou lang yu fi sidong an tek iin di sumadi fa bifuo yu mek dem nuo se yu laik dem? Yu si ef yu jomp go dwi’it tuu kwik, di sumadi mait-a fiil se yu tuu jompi. (Pr. 29:20) An ef yu tek tuu lang, di sumadi mait-a fiil se yu no nuo wa yu waahn, speshali wen dem nuo aredi se yu mait-a laik dem. (Iik. 11:4) Bot wa yu fi memba a se bifuo yu go tu sumadi an tel dem se yu laik dem, yu na’afi shuor se a da sumadi de yu a-go marid tu. Bot wa yu fi shuor se a dat yu redi fi marid an se di ada sumadi mait-a bi wan gud sumadi fi yu marid tu.

10. Wa yu no fi du ef yu fain out se sumadi laik yu bot yu no laik dem da wie de?

¹⁰ Ef yu fain se sumadi laik yu an wuda waahn fi marid tu yu, an yu no fiil da siem wie de bout dem, no du notn fi mek dem fiil se yu waahn dem kaa dat wudn nais.​—1 Kor. 10:24; Ifii. 4:25.

11. Ef yu a-go elp sumadi fi fain sumadi fi marid tu, wa a som sitn we yu fi tingk bout?

¹¹ Iina som konchri, a di mada an faada ar sumadi els iina di fambili pik di wan we dem waahn sumadi iina dem fambili fi marid tu. An iina som ada konchri, di sumadi we waahn fi marid, dem lou dem fren an fambili fi pik sumadi we dem tingk a wan gud sumadi fi dem marid tu, an den dem wuda set op tingz fi di tuu a dem miit op fi si ef dem laik dem wan aneda an waahn fi staat taak. Ef sumadi kom tu yu an aks yu fi fain sumadi fi dem, chrai an tingk bout wa gud fi di tuu a dem an chrai an fain out uu di sumadi riili bi, wa kain-a wiez dem av, an ef dem riili lov Jeuova. Kaa fi lov Jeuova muo impuotant dan fi av nof moni, ar fi av wol iip a skuulin, ar fi ai iina sosaiyati. An memba se a di breda an di sista we waahn fi get marid afi go mek op dem main ef dem a-go marid.​—Gya. 6:5.

WEN YU WAAHN FI STAAT TAAK TU SUMADI

12. Ef yu si sumadi we yu laik, ou yu kyan mek dem nuo?

¹² Ef yu si sumadi we yu laik an yu wuda waahn fi mek dem nuo, d yu kyan plan fi miit op wid dem iina wan plies we  nof piipl de, ar yu kyan yuuz di fuon fi kaal dem. An mek dem nuo egzakli wa yu bout. (1 Kor. 14:9) An no rosh dem, gi dem taim fi tingk bout wa dem waahn fi du. (Pr. 15:28) An ef di sumadi no laik yu da wie de, jos rispek ou dem fiil.

13. Wa yu kyan du ef sumadi mek yu nuo se dem laik yu? (Koloshan 4:6)

¹³ Bot sopuoz sumadi mek yu nuo se dem laik yu? Dem mos did afi briev op demself fi mek yu nuo. So no diil wid dem no wie, an shuo se yu rispek dem tu. (Riid Koloshan 4:6.) Ef yu niid som taim fi tingk bout wa yu a-go ansa dem se, mek dem nuo. Bot no tek tuu lang fi mek dem nuo ou yu fiil. (Pr. 13:12) Bot ef yu no laik di sumadi da wie de, mek dem nuo klier klier se yu no laik dem da wie de. Wan sista did go tu wan breda we niem Hans, we kom fram Aschriya, an tel im se shi laik im. Im se: “Mi tel ar iina wan nais wie ou mi fiil. An mi neehn ich fi tel ar niida, kaa mi neehn waahn ar fi fiil laik se sitn mait-a gwaan fi wi wan die. An kaa mi nuo ou shi did fiil, mi mek shuor se mi no du notn fi mek shi fiil se mi laik ar da wie de.” Bot ef yu laik di sumadi tu, mek dem nuo ou yu fiil an som a di ting dem we yu wuda waahn fi gwaan wen yu an sumadi a taak. Kaa wa yu waahn mait-a difrant fram wa di sumadi waahn kaaz a ou dem gruo an ada tingz.

OU DI ADA BREDA AN SISTA DEM KYAN SHUO SE DEM DI DE FI DI WAN DEM WE WAAHN FI MARID?

14. Wa wi no fi se fi shuo se wi de de fi di breda an sista dem we no marid?

¹⁴ Wa wi kyan du fi shuo se wi di de fi di breda an sista dem we no marid? Wan ting we wi kyan du a tingk bout wa wi a-go se bifuo wi se it. (Ifii. 4:29) Wi kyan aks wiself dem kwestiyan ya: ‘Mi lov fi chobl di wan dem we no marid? An ef mi si wan breda an sista we no marid a taak tu dem wan aneda, mi a-go fiil se a laik dem laik dem wan aneda?’ (1 Tim. 5:13) An wi no fi mek dem fiil laik sopm rang wid dem jos kaa dem no marid. Hans we wi did taak bout aredi se: “Somtaim som breda an sista wuda se tu mi se, ‘Wa mek yu no marid? Yu no yong agen ino.’ Wen dem se dem ting de, it mek di wan dem we no marid fiil laik se dem fi marid ar els dem no wot notn.” Insted-a dat, wa wi kyan du a luk fi som wiez fi big dem op.​—1 Tes. 5:11.

15. (a) Azkaadn tu Ruoman 15:2, wa wi fi tingk bout bifuo wi chrai fi set op sumadi? (Luk pan di picha tu.) (b) Wa yu laik di muos bout wa yu si iina di vidiyo?

 ¹⁵ Sopuoz yu tingk se it wuda gud fi wan breda an wan sista staat taak? Di Baibl mek wi nuo se wi fi du tingz we a-go mek wi breda an sista dem api. (Riid Ruoman 15:2.) Wi si se nof breda an sista we no marid no waahn nobadi fi set dem op wid nobadi. An wi fi rispek ou dem fiil. (2 Tes. 3:11) Bot som a dem no main ef wi set dem op. Bot wi no fi chrai fi dwi’it anles dem aks wi. e (Pr. 3:27) An som we no marid no waahn evribadi fi a si se sumadi a set dem op. Wan sista we niem Lydia, we kom fram Jormani, se: “Yu kyan jos invait di piipl dem we yu wuda waahn fi set op a wan get tugeda so dat dem kyan get fi miit dem wan aneda. An den mek dem du wa dem waahn fi du afta dat.”

16. Wa di wan dem we no marid yet fi memba se?

¹⁶ It no mata ef wi marid ar wi no marid, aal a wi kyan api wid di laif we wi a liv! (Sa. 128:1) Ef yu waahn fi marid an yu no fain nobadi fi marid tu yet, jos gwaan du nof tingz fi Jeuova. Wan sista we niem Chloe, we kom fram Makaa, se: “Wen yu tingk bout di mount a taim we yu kyan go spen wid di sumadi we yu marid tu iina Paradais, di taim wen yu no marid nou a no notn wen yu tingk bout it. Api fi di taim we yu av nou an yuuz it di bes wie.” Bot wa ef yu fain sumadi we yu wuda waahn fi marid tu an unu staat taak? Iina di neda lesn, wi a-go luk pan wa unu kyan du so dat tingz kyan wok out fi unu.