1. Sapa sing kuduné ngandhani awaké dhéwé bab ngibadah marang Gusti Allah?

AKÈH agama ngaku wis mulang sing bener bab Gusti Allah. Ning kuwi ora mungkin, merga wulangané akèh agama bab Gusti Allah lan carané ngibadah kuwi béda-béda. Piyé awaké dhéwé isa ngerti ibadah sing bener miturut Gusti Allah? Mung Yéhuwah sing isa ngandhani awaké dhéwé piyé kuduné ibadah sing bener kuwi.

2. Piyé carané panjenengan isa ngerti ibadah sing bener miturut Gusti Allah?

² Yéhuwah wis maringi Alkitab sing isa mbantu awaké dhéwé isa ngerti ibadah sing bener miturut Yéhuwah. Dadi, panjenengan kudu sinau Alkitab, lan Yéhuwah bakal mbantu panjenengan éntuk paédah saka wulangané, merga Yéhuwah tresna lan nggatèkké panjenengan.​—Yésaya 48:17.

3. Yéhuwah péngin awaké dhéwé nindakké apa?

³ Ana wong sing kandha nèk Gusti Allah nampa kabèh ibadah, ning kuwi béda karo sing diwulangké Yésus. Yésus ngendika, ”Kang bakal lumebu ing Kratoning Swarga iku dudu angger wong kang ngucap marang Aku: Gusti, Gusti, nanging mung wong kang nglakoni sakarsané RamaKu kang ana ing swarga.” Dadi, penting banget kanggo awaké dhéwé sinau bab kersané Gusti Allah lan nindakké kuwi. Yésus madhakké wong sing ora nindakké kersané Gusti Allah kaya wong jahat sing ”gawé duraka”.–Matéus 7:21-23.

4. Yésus ngélingké apa bab wong sing nindakké kersané Gusti Allah?

⁴ Yésus ngélingké nèk awaké dhéwé péngin nindakké  kersané Gusti Allah, awaké dhéwé bakal ngadhepi akèh masalah. Yésus ngendika, ”Padha lumebua metu liwat lawang kang ciyut, awit amba lawangé lan jembar dalané kang anjog ing karusakan, mangka akèh wong kang padha metu ing kono. Kosok baliné ciyut lawangé lan rupit dalané kang anjog ing urip, mangka mung sathithik wong kang nemu iku.” (Matéus 7:13, 14) Dalan sing rupit utawa ibadah sing bener miturut Gusti Allah, ngasilké urip saklawasé. Dalan sing jembar, utawa ibadah sing ora bener miturut Gusti Allah, ngasilké pati. Ning Yéhuwah ora péngin kabèh wong mati. Yéhuwah maringi kabèh wong kesempatan kanggo sinau bab Yéhuwah.​—2 Pétrus 3:9.

5. Piyé carané panjenengan isa ngerti sapa sing nindakké ibadah sing bener miturut Gusti Allah?

⁵ Yésus ngendika nèk awaké dhéwé isa ngerti sapa sing nindakké ibadah sing bener miturut Gusti Allah. Carané yaiku, nliti apa waé wulangané lan tumindaké wong-wong kuwi. Yésus ngendika, ”Iku bakalé padha katitik marang kowé saka wohé.” Banjur, Yésus ngendika manèh, ”Dadiné wit kang becik metokaké woh becik.” (Matéus 7:16, 17) Iki ora tegesé wong-wong sing ngibadah marang Gusti Allah kuwi wong sing sampurna. Ning, umaté Gusti Allah mesthi ngupaya nindakké apa sing bener. Awaké dhéwé saiki bakal ngrembug apa tandhané wong-wong sing nindakké ibadah sing bener miturut Gusti Allah.

6, 7. Apa sebabé ibadah sing bener kuwi dhasaré saka Alkitab? Saka contoné Yésus, awaké dhéwé isa sinau apa?

⁶ Ibadahé awaké dhéwé dhasaré kudu saka Alkitab. Alkitab kandha, ”Sakèhing tulisan kang diwangsitaké déning Gusti Allah iku pancèn migunani kanggo memulang, kanggo melèhaké, kanggo mbangun wewatekan tuwin kanggo nggulawenthah ing sajroning kayektèn. Marga saka mangkono saben wong kagungané Gusti Allah iku disamektani  kanggo nindakaké samubarang kang becik.” (2 Timotéus 3:16, 17) Rasul Paulus kandha karo wong-wong Kristen, ”Déné pangandikané Gusti Allah kang padha dakwartakaké marang kowé iku wus padha koktampani, ora kokanggep pituturing manungsa, nanging—lan iki pancèn iya nyata mangkono—kokanggep sabdaning Allah.” (1 Tésalonika 2:13) Ibadah sing bener dhasaré mung saka sabdané Gusti Allah, yaiku Alkitab. Dudu saka pikirané manungsa, tradhisi, utawa liyané.

⁷ Kabèh piwulangé Yésus dhasaré saka sabdané Gusti Allah. (Wacanen Yokanan 17:17.) Yésus kerep nyuplik ayat-ayat ing Alkitab. (Matéus 4:4, 7, 10) Umaté Gusti Allah niru contoné Yésus lan kabèh sing diwulangké dhasaré saka Alkitab.

8. Apa piwulangé Yésus kanggo awaké dhéwé bab ngibadah marang Yéhuwah?

⁸ Awaké dhéwé mung nyembah Yéhuwah. Jabur 83:19 kandha, ”Bilih namung Paduka ingkang asma Yéhuwah, Ingkang Mahaluhur tuwin misésani ing salumahing bumi.” Yésus péngin kabèh wong ngerti sapa Gusti Allah sing bener, lan mulang wong-wong bab asmané Gusti Allah. (Wacanen Yokanan 17:6.) Yésus ngendika, ”Pangéran Allahira kang kudu sira sembah lan Panjenengané Piyambak kang kudu sira abektèni.” (Matéus 4:10) Dadi, awaké dhéwé sing dadi umaté Gusti Allah kudu niru contoné Yésus. Awaké dhéwé mung nyembah Yéhuwah, nggunakké asmané lan mulang wong liya bab asmané lan kersané Gusti Allah kanggo manungsa.

9, 10. Piyé carané nduduhké katresnané awaké dhéwé karo siji lan sijiné?

⁹ Awaké dhéwé tresna karo kabèh wong. Yésus mulang murid-muridé kudu nresnani siji lan sijiné. (Wacanen Yokanan 13:35.) Senajan awaké dhéwé béda bangsa, béda kabudayan, mlarat utawa sugih, ning katresnan sing sejati ndadèkké awaké dhéwé kabèh dadi sedulur. (Kolosé 3:14) Dadi, awaké dhéwé ora mèlu perang lan matèni wong. Alkitab  kandha, ”Iki titikané para putraning Allah lan para anaké Iblis, sok wonga kang ora nindakaké kayektèn iku asalé ora saka ing Allah, mangkono uga kang ora tresna marang saduluré.” Lan ayat kuwi uga kandha, ”Iya iku supaya kita padha tresna-tinresnanana. Aja kaya Kain, kang asalé saka ing pangawak dursila sarta matèni saduluré.”​—1 Yokanan 3:10-12; 4:20, 21.

¹⁰ Awaké dhéwé nggunakké wektu, tenaga lan dhuwit kanggo mbantu lan nguwatké iman siji lan sjiné. (Ibrani 10:24, 25) Awaké dhéwé kudu ”gawé becik marang wong kabèh”.​—Galati 6:10.

11. Apa sebabé awaké dhéwé percaya nèk Yésus kuwi dalan marang Gusti Allah?

¹¹ Awaké dhéwé manut karo Yésus merga Yésus kuwi dalan marang Gusti Allah. Alkitab kandha, ”Keslametan kuwi tekané namung sangka Gusti Yésus, ora sangka wong liya. Awit nang sak ngisoré langit iki ora ènèng jeneng liyané pawèhé Gusti Allah marang manungsa, sing bisa nylametké awaké déwé.” (Lelakoné Para Rasul 4:12, BJS) Ing bab 5 buku iki, awaké dhéwé wis sinau nèk Yéhuwah ngutus Yésus kanggo nebus manungsa sing manut. (Matéus 20:28) Yéhuwah wis milih Yésus kanggo dadi Raja ing saklumahing bumi. Kuwi alesané Alkitab kandha nèk awaké dhéwé kudu manut karo Yésus bèn isa urip saklawasé.​—Wacanen Yokanan 3:36.

12. Apa sebabé awaké dhéwé ora mèlu-mèlu urusan politik?

¹² Awaké dhéwé ora mèlu-mèlu urusan politik. Yésus ora mèlu-mèlu urusan politik. Wektu Yésus diadili, Yésus ngendika karo panguwasa Roma sing jenengé Pilatus, ”Kraton Kula boten saking donya punika”. (Wacanen Yokanan 18:36.) Kaya Yésus, awaké dhéwé setya karo Kratoné Gusti Allah, dadi ora mèlu-mèlu urusan politik ing endi waé. Ning, Alkitab kandha nèk awaké dhéwé kudu manut karo ”panguwasa kang mbawahaké” yaiku pamréntah. (Rum 13:1) Awaké dhéwé manut karo hukum ing negarané awaké dhéwé. Ning,  nèk hukumé isa nyebabké awaké dhéwé nglanggar hukumé Gusti Allah, awaké dhéwé niru para rasul sing kandha, ”Kita kedah langkung mbangun turut dhumateng Gusti Allah katimbang dhateng manungsa”.​—Lelakoné Para Rasul 5:29; Markus 12:17.

13. Apa sebabé awaké dhéwé kudu martakké Kratoné Gusti Allah?

¹³ Awaké dhéwé percaya nèk mung Kratoné Gusti Allah sing isa ngrampungi masalah ing donya. Yésus kandha nèk ”Injiling Kraton” kudu diwartakké nganti saklumahing bumi. (Wacanen Matéus 24:14.) Ora ana pamréntahané manungsa sing isa nindakké apa sing bakal diwujudké Kratoné Gusti Allah. (Jabur 146:3) Yésus mulang awaké dhéwé kanggo ndonga bab Kratoné Gusti Allah, wektu Yésus ngendika, ”Kraton Paduka mugi rawuh. Karsa Paduka mugi kalampahan wonten ing bumi kadosdéné wonten ing swarga.” (Matéus 6:10) Alkitab kandha nèk Kratoné Gusti Allah bakal nyingkirké kabèh pamréntahané manungsa, lan ”karajan punika piyambak badhé madeg ing salami-laminipun”.​—Dhanièl 2:44.

14. Sapa sing nindakké ibadah sing bener miturut Gusti Allah?

¹⁴ Sakwisé awaké dhéwé ngrembug bab iki kabèh, coba panjenengan pikirké tenanan, ’Sapa sing kabèh wulangané dhasaré saka Alkitab? Sapa sing martakké karo wong-wong liya bab asmané Gusti Allah? Sapa sing nduduhké katresnan sing sejati karo siji lan sijiné, lan percaya nèk Gusti Allah ngutus Yésus kanggo nylametké manungsa? Sapa sing ora mèlu-mèlu urusan politik? Sapa sing martakké nèk mung Kratoné Gusti Allah sing isa ngrampungi kabèh masalahé manungsa?’ Mung Seksi-Seksi Yéhuwah sing nindakké kuwi kabèh.​—Yésaya 43:10-12.

15. Apa sing awaké dhéwé kudu tindakké bèn Gusti Allah nampa ibadahé awaké dhéwé?

¹⁵ Mung percaya nèk Gusti Allah kuwi ana durung cukup.  Para dhemit ya percaya nèk Gusti Allah kuwi ana, ning ora manut dhawuhé. (Yakobus 2:19) Nèk péngin Gusti Allah nampa ibadahé awaké dhéwé, awaké dhéwé ora mung percaya nèk Gusti Allah kuwi ana, ning kudu nindakké préntahé.

16. Apa sebabé awaké dhéwé nampik agama palsu?

¹⁶ Bèn Gusti Allah nampa ibadahé awaké dhéwé, awaké dhéwé kudu nampik agama palsu. Nabi Yésaya nulis, ”Padha metua saka ing satengahé, padha sesucia.” (Yésaya 52:11; 2 Korinta 6:17) Iku sebabé awaké dhéwé kudu nampik apa waé sing ana hubungané karo ibadah palsu.

17, 18. Apa kuwi ”Babil gedhé”, lan apa sebabé kudu cepet-cepet metu saka kono?

¹⁷ Apa kuwi agama palsu? Kuwi tegesé kabèh agama sing wulangané ora cocog karo dhawuhé Gusti Allah. Alkitab nyebut kabèh agama palsu kuwi ”Babil gedhé”. (Wahyu 17:5) Apa sebabé disebut ”Babil gedhé”? Sakwisé Banjir Gedhé jaman Nuh, akèh wulangan sing salah sing asalé saka kutha Babil. Akhiré, wulangané agama palsu nyebar ing saklumahing bumi. Contoné, wong-wong Babil nyembah allah sing cacahé telu ning dadi siji. Saiki, ana akèh agama palsu sing mulang nèk Gusti Allah kuwi Tritunggal utawa telu dadi siji. Ning, Alkitab kandha nèk mung ana siji Allah sing bener, sing asmané Yéhuwah lan Yésus kuwi Putrané. (Yokanan 17:3) Wong-wong Babil uga percaya nèk ana bagéan sing isih tetep urip sakwisé wong kuwi mati lan isa disiksa ing neraka. Kuwi wulangan sing salah.​—Deloken Cathetan 14, 17, lan 18.

¹⁸ Gusti Allah ngendika nèk kabèh agama palsu bakal disingkirké. (Wahyu 18:8) Apa panjenengan ngerti alesané kena apa kudu cepet-cepet metu saka agama palsu? Yéhuwah péngin panjenengan metu saka agama palsu mumpung isih ana wektu.​—Wahyu 18:4.

19. Pas mutuské ngabdi marang Yéhuwah, piyé Yéhuwah nduduhké nèk ora bakal ninggalké panjenengan?

¹⁹ Nèk panjenengan mutuské metu saka agama palsu lan ngabdi marang Yéhuwah, mbokmenawa kanca-kanca lan keluargané  panjenengan ora setuju lan isa sengit karo panjenengan. Ning, Yéhuwah ora bakal ninggalké panjenengan. Panjenengan bakal dadi bagéan saka keluarga sakdonya sing isiné wong-wong sing tenanan nresnani siji lan sijiné. Panjenengan ya bakal éntuk berkah urip saklawasé ing pirdus ing bumi. (Markus 10:28-30) Ning, isa waé kanca-kanca utawa keluargané panjenengan sing sakdurungé ora seneng panjenengan ngabdi marang Yéhuwah, malah akhiré dadi péngin sinau Alkitab.

20. Apa sebabé ngibadah marang Gusti Allah nganggo cara sing bener kuwi penting banget?

²⁰ Ora suwé manèh, Gusti Allah bakal nyingkirké kabèh tumindak ala lan Kratoné bakal mréntah ing saklumahing bumi. (2 Pétrus 3:9, 13) Awaké dhéwé mesthi seneng banget wektu kuwi kelakon. Kabèh wong bakal ngibadah marang Yéhuwah, nganggo cara sing Yéhuwah kersakké. Nindakké ibadah sing bener kuwi penting banget, dadi panjenengan kudu tumindak saiki.