1, 2. Masalah apa sing diadhepi Yéfta lan anaké?

ANA cah wédok mlayu nemoni bapaké. Dhèwèké seneng banget merga bapaké slamet mulih saka perang. Banjur, dhèwèké nyanyi lan njogèd. Ning, sing ditindakké lan dikandhakké bapaké ngagètké dhèwèké. Karo nyuwèk klambi lan nangis, bapaké kandha, ”Dhuh anakku enggèr. Kokjebul kowé sing gawé remuking atiku.” Bapaké banjur kandha nèk wis nggawé janji marang Yéhuwah. Janji kuwi bakal ngowahi uripé anaké sakterusé, merga anaké ora bakal nduwé bojo lan anak. Ning, tanggepané anaké béda lan nggedhèkké ati bapaké bèn isa netepi janjiné karo Yéhuwah. Tanggepané kuwi nduduhké nèk dhèwèké percaya tenan karo Yéhuwah, lan kersané Yéhuwah kuwi apik kanggo dhèwèké. (PH. 11:34-37, Basa Jawi Padintenan [BJP]) Wektu ngerti iman anaké kuwat, bapaké seneng merga tumindaké anaké kuwi nyenengké Yéhuwah.

 ² Yéfta lan anaké percaya tenan marang Yéhuwah lan carané Yéhuwah tumindak. Yéfta lan anaké tetep setya senajan kuwi ora gampang. Yéfta lan anaké péngin nyenengké Yéhuwah lan kuwi butuh pangurbanan.

3. Apa sebabé tuladhané Yéfta lan anaké ana paédahé kanggo awaké dhéwé?

³ Tetep setya karo Yéhuwah kuwi ora gampang. Awaké dhéwé kudu ’tetep perang mbélani iman’. (Yd. 3) Bèn isa nindakké kuwi, awaké dhéwé isa sinau saka tuladhané Yéfta lan anaké sing sabar ngadhepi masalah. Piyé carané bèn isa tetep setya karo Yéhuwah?

4, 5. (a) Ing Kanaan, bangsa Israèl dikon ngapa? (b) Nurut Jabur 106, apa akibaté merga bangsa Israèl ora setya?

⁴ Saben dina, Yéfta lan anaké kudu ngadhepi bangsa Israèl sing ora setya karo Yéhuwah. Kira-kira 300 taun sakdurungé, Yéhuwah ngongkon bangsa Israèl matèni kabèh sing nyembah allah palsu ing Kanaan. Ning, bangsa Israèl ora manut. (PT. 7:1-4) Ana wong-wong Israèl sing mulai niru-niru bangsa Kanaan, sing nyembah déwa-déwa lan laku jina.​—Wacanen Jabur 106:34-39.

⁵ Merga bangsa Israèl ora setya, Yéhuwah ora ngayomi bangsa kuwi saka mungsuh-mungsuhé. (PH. 2:1-3, 11-15; Ms. 106:40-43) Wektu kuwi, mesthiné ora gampang kanggo para keluarga sing nresnani Yéhuwah bèn isa tetep setya, senajan ngadhepi masalah abot. Ning, Alkitab nduduhké nèk ana wong-wong sing tetep setya kaya Yéfta lan anaké, contoné Èlkana, Hana, lan Samuèl. Wong-wong kuwi ngupaya nyenengké Yéhuwah.​—1 Sa. 1:20-28; 2:26.

6. Piyé tumindaké wong-wong ing jaman saiki? Lan, apa sing kudu diupayakké?

⁶ Saiki, wong-wong mikir lan tumindak kaya wong-wong Kanaan. Uripé mung mikirké sing saru-saru, kejem, lan mburu bandha. Ning, pengéling-élingé Yéhuwah cetha. Yéhuwah bakal ngayomi awaké dhéwé kaya Yéhuwah ngayomi bangsa Israèl saka pengaruh sing ala. Apa sing isa disinaoni saka pengalamané bangsa Israèl? (1 Kr. 10:6-11) Awaké dhéwé kudu ngupaya aja nganti dipengaruhi wong-wong ing donya iki. (Rm. 12:2) Apa kuwi wis ditindakké?

7. (a) Yéfta ngadhepi masalah apa saka bangsané dhéwé? (b) Piyé tanggepané Yéfta?

⁷ Ing jamané Yéfta, merga ora setya karo Yéhuwah, bangsa Israèl ditindhes karo bangsa Filisti lan Amon. (PH. 10:7, 8) Sakliyané ngadhepi mungsuh saka bangsa liya, Yéfta kudu ngadhepi masalah saka keluargané lan para pemimpin bangsa Israèl. Merga keluargané mèri lan sengit, Yéfta diusir saka tanah warisané. (PH. 11:1-3) Yéfta ora gelem dipengaruhi tumindak jahat mau. Apa buktiné? Wektu dijaluki tulung para pemimpin bangsa Israèl, Yéfta gelem  nulungi. (PH. 11:4-11) Apa sebabé Yéfta gelem nulungi?

8, 9. (a) Saka Hukum Musa, Yéfta ngerti pathokan bab apa? (b) Sing luwih penting kanggo Yéfta kuwi apa?

⁸ Yéfta kuwi prajurit sing gagah prakosa. Dhèwèké ngerti tenan sejarahé bangsa Israèl lan Hukum Musa. Dhèwèké uga ngerti pathokan sing bener lan salah saka tumindaké Yéhuwah kanggo umaté. (PH. 11:12-27) Yéfta ngetrapké pathokan kuwi saben nggawé keputusan. Yéfta ora mung ngerti tanggepané Yéhuwah bab wong sing nesu lan péngin mbales, ning uga ngerti nèk Yéhuwah péngin umaté nresnani siji lan sijiné. Saka Hukum Musa, Yéfta ngerti pathokan bab carané tumindak marang liyané, senajan dijahati.​—Wacanen Pangentasan 23:5; Kaimaman 19:17, 18.

⁹ Yéfta niru tuladhané Yusuf, sing gelem ngapura seduluré senajan dijahati. (Pd. 37:4; 45:4, 5) Conto kuwi mbokmenawa nggawé Yéfta nanggepi nganggo cara sing nyenengké Yéhuwah wektu dijahati seduluré. Sing luwih penting kanggo Yéfta kuwi mbéla Yéhuwah lan umaté, timbang mikirké perasaané dhéwé. (PH. 11:9) Yéfta ngupaya bèn isa tetep setya marang Yéhuwah. Mula, Yéhuwah mberkahi Yéfta lan bangsa Israèl.​—Ib. 11:32, 33.

10. Pathokan-pathokan Alkitab apa sing isa ditrapké bèn dadi wong Kristen sing apik?

¹⁰ Apa awaké dhéwé arep niru Yéfta? Awaké dhéwé arep tumindak apa wektu ana sedulur seiman sing nglarani ati, utawa tumindaké ora apik marang awaké dhéwé? Aja nganti rasa gela nggawé awaké dhéwé mandheg ngabdi marang Yéhuwah. Aja nganti ora teka ing pakumpulan ibadah, utawa ora srawung karo para sedulur ing jemaat. Tirunen Yéfta lan manuta karo Yéhuwah. Kuwi isa mbantu awaké dhéwé ngadhepi masalah sing abot, lan awaké dhéwé uga isa dadi tuladha kanggo liyané.​—Rm. 12:20, 21; Kl. 3:13.

11, 12. Apa janjiné Yéfta, lan apa maksudé?

¹¹ Yéfta percaya nèk dhèwèké butuh bantuané Gusti Allah kanggo mbébaské bangsa Israèl saka bangsa Amon. Nèk Yéhuwah mbantu dhèwèké menang perang, Yéfta janji arep ngekèkké marang Yéhuwah sapa waé sing sepisanan metu saka omah wektu bali saka perang. Kuwi sing disebut ”kurban obaran”. (PH. 11:30, 31) Apa maksudé?

¹² Yéhuwah ora seneng nèk ana wong diobong kanggo kurban. Maksudé Yéfta sakjané ora ngono.  (PT. 18:9, 10) Ing Hukum Musa, kurban obaran kuwi istiméwa merga wong ngekèkké kurban sing wutuh. Dadi, wong sing arep dikurbanké Yéfta kuwi bakal ngabdi ing Kémah Ibadah (Tabernakel) sakjegé urip. Yéhuwah ngrungokké Yéfta lan mbantu Yéfta menang perang. (PH. 11:32, 33) Ning, sapa sing bakal dikèkké marang Yéhuwah?

13, 14. Omongané Yéfta ing Para Hakim 11:35 mbuktèkké apa bab imané?

¹³ Bayangna crita ing paragraf siji. Wektu Yéfta bali saka perang, sing metu pisanan saka omah nemoni dhèwèké jebulé anaké wédok. Padhahal anaké mung siji thok. Apa Yéfta bakal netepi janjiné? Apa dhèwèké bakal ngekèkké anaké kanggo ngabdi marang Yéhuwah ing Kémah Ibadah sakjegé urip?

¹⁴ Sepisan manèh, Hukum Musa mbantu Yéfta nggawé keputusan sing bener. Mbokmenawa, dhèwèké kèlingan Pangentasan 23:19, sing kandha nèk umaté Yéhuwah kudu ngekèki sing paling apik kanggo Yéhuwah. Hukum Musa uga kandha wektu ana sing nggawé janji marang Yéhuwah, ”aja nganti nerak janjiné; apa kang wus diucapaké iku kudu ditetepi.” (Wi. 30:2) Yéfta kudu netepi janjiné senajan kuwi abot kanggo dhèwèké lan anaké. Kuwi uga ditindakké Hana sing setya, sing mbokmenawa urip ing jamané Yéfta. Merga bakal ngabdi ing Kémah Ibadah, anaké ora mungkin nduwé keturunan. Dadi, Yéfta ora isa nduwé keturunan sing neruské jenengé lan éntuk warisan. (PH. 11:34) Senajan ngono, Yéfta kandha, ”Aku wis  janji ing ngarsané Pangéran, sing ora bisa dakjabel [dicabut] menèh.” (PH. 11:35, BJP.) Yéhuwah nampa kurbané Yéfta lan mberkahi dhèwèké. Apa panjenengan isa setya kaya Yéfta?

15. Awaké dhéwé wis janji apa, lan piyé carané netepi janji kuwi?

¹⁵ Wektu ngabdi marang Yéhuwah, awaké dhéwé janji nèk bakal nindakké kersané ing kahanan apa waé. Awaké dhéwé ngerti nèk netepi janji mau ora gampang. Ning, piyé tanggepané awaké dhéwé nèk dikon nindakké tugas sing ora disenengi? Nèk rasa ora seneng kuwi isa diilangi lan lila manut karo Gusti Allah, awaké dhéwé mesthi bakal netepi janji kuwi. Mbokmenawa kuwi rekasa banget, ning Yéhuwah mesthi mberkahi. (Ml. 3:10) Terus, anaké Yéfta piyé? Piyé tanggepané bab janjiné bapaké?

16. Piyé tanggepané anaké Yéfta bab janjiné bapaké? (Deloken gambar ing kaca 3.)

¹⁶ Janjiné Yéfta béda karo janjiné Hana. Hana janji nèk arep ngekèkké anaké sing jenengé Samuèl, kanggo ngabdi ing Kémah Ibadah lan dadi wong Nazir, utawa wong sing dikususké kanggo Yéhuwah. (1 Sa. 1:11) Wong Nazir éntuk nduwé bojo lan keluarga. Ning, anaké Yéfta dikèkké kanggo ”kurban obaran,” dadi dhèwèké ora isa ngrasakké rasané nduwé bojo lan dadi ibu. (PH. 11:37-40) Coba pikiren, dhèwèké isa waé kawin karo wong lanang sing diajèni ing kono, merga bapaké pemimpiné bangsa Israèl. Ning, saiki dhèwèké bakal dadi abdi sing andhap asor ing Kémah Ibadah. Piyé tanggepané anaké Yéfta? Dhèwèké nduduhké nèk ngabdi marang Yéhuwah kuwi sing paling penting wektu kandha, ”Sumangga kula panjenengan punapakaken kémawon, ingkang laras kaliyan nadar [janji] panjenengan punika.” (PH. 11:36) Pangurbanan anaké Yéfta kuwi klebu ora nduwé bojo lan anak kanggo ngabdi marang Yéhuwah. Piyé carané niru pangurbanané?

17. (a) Piyé carané niru Yéfta lan anaké? (b) Piyé Ibrani 6:10-12 nggedhèkké ati bèn lila ngabdi?

 ¹⁷ Akèh wong Kristen enom, lanang utawa wédok, sing saiki lila ora kawin utawa ora nduwé anak. Apa sebabé? Merga péngin luwih tenanan ngabdi marang Yéhuwah lan ora keganggu liyané. Uga, akèh sedulur sing tuwa, lila ora nggunakké akèh wektu kanggo anak lan putuné, ning malah nggunakké wektu lan tenagané kanggo ngabdi. Ana sing mèlu mbangun bangunané Seksi Yéhuwah, utawa mèlu Sekolah Penginjlé Kratoné Allah, lan pindhah ing jemaat sing luwih mbutuhké penginjil. Ana sing nggawé rencana luwih akèh nginjil ing sasi Pèngetan. Yéhuwah ora bakal lali karo pangurbanan sing kaya ngono. (Wacanen Ibrani 6:10-12.) Nèk panjenengan piyé? Apa panjenengan uga isa ngono?

18, 19. Apa sing isa ditiru saka Yéfta lan anaké? Piyé carané?

¹⁸ Apa sing isa nggawé Yéfta setya senajan ngadhepi akèh masalah? Yéfta njaluk tuntunané Yéhuwah wektu nggawé keputusan, ora gelem dipengaruhi wong liya, lan tetep setya senajan ana sing nggawé gela. Yéhuwah mberkahi Yéfta lan anaké merga lila ngabdi, lan Yéhuwah nggunakké Yéfta lan anaké kanggo nduduhké ibadah sing sejati. Senajan liyané ora nindakké sing bener, Yéfta lan anaké tetep setya marang Yéhuwah.

¹⁹ Alkitab kandha, ”Padha nulada marang wong kang awit saka pracaya lan sabar mantep padha olèh panduman apa kang wus kaprasetyakaké déning Gusti Allah.” (Ib. 6:12) Ayo niru Yéfta lan anaké! Nèk terus setya, Yéhuwah mesthi bakal mberkahi awaké dhéwé.