1-2. Bèn isa ngerti piyé perasaané Yéhuwah wektu difitnah, ana perumpamaan apa?

 BAYANGNA piyé perasaané njenengan nèk difitnah kanca akrabé njenengan. Fitnah kuwi kesebar, terus akèh wong sing percaya. Sing luwih parah, akèh wong kuwi ya nyebarké lan luwih akèh manèh sing percaya. Njenengan mesthi sedhih soalé kuwi isa mempengaruhi réputasiné njenengan. Mungkin njenengan ya dadi kecéwa merga wong sing njenengan sayangi malah percaya karo fitnah kuwi.—WB. 22:1.

² Kuwi sing dirasakké Yéhuwah wektu difitnah malaékaté. Hawa sing krungu fitnah kuwi malah percaya. Sing luwih parah manèh, kuwi marakké Adam karo Hawa mbrontak nglawan Yéhuwah. Akibaté, kabèh keturunané dadi dosa lan mati. (PD. 3:​1-6; Rm. 5:12) Kabèh masalah saiki, misalé perang, kesusahan, lan kematian kuwi akibat saka fitnah sing disebarké Sétan. Kuwi mesthi marakké Yéhuwah sedhih lan lara ati. Tapi Yéhuwah ora dadi nesu. Ing Alkitab disebutké nèk Yéhuwah tetep dadi ”Gusti Allah sing bahagia”.—1 Tim. 1:11.

3. Awaké dhéwé nduwé kesempatan istiméwa apa?

 ³ Ing Alkitab ana préntah, ”Pujinen jenengé Yéhuwah.” (Mzm. 113:1) Kuwi sakjané kesempatan istiméwa kanggo mbuktèkké nèk fitnahé Sétan soal Yéhuwah kuwi ora bener. Carané muji piyé? Awaké dhéwé mesthi péngin nyritakké sing bener soal Yéhuwah. Nah, bèn isa tergerak kanggo muji Yéhuwah saktulusé ati, ana telu alesan sing isa dipikirké.

ISA NGGAWÉ YÉHUWAH SENENG

4. Ngapa kok Yéhuwah seneng nèk awaké dhéwé muji Dhèwèké? Kèkana perumpamaan. (Deloken gambar.)

⁴ Yéhuwah seneng nèk awaké dhéwé muji Dhèwèké. (Mzm. 119:108) Tapi, apa kuwi berarti Yéhuwah butuh pujian utawa ora percaya diri? Ora. Perumpamaané ngéné: Ana cah cilik sing ngerti-ngerti meluk bapaké, terus ngomong, ”Bapak kuwi Bapak sing paling apik sak donya.” Nah, nèk bapaké kuwi dadi seneng lan terharu, apa kuwi berarti dhèwèké butuh banget dipuji anaké? Ora. Bapak kuwi seneng merga anak sing dhèwèké sayangi kuwi menyayangi lan menghargai dhèwèké. Bapak kuwi ya bangga merga anaké nduwé sifat-sifat sing apik. Kaya bapak kuwi, Yéhuwah ya seneng nèk awaké dhéwé muji Dhèwèké.

5. Apa fitnahé Sétan sing terbukti salah nèk awaké dhéwé muji jeneng Yéhuwah?

⁵ Sétan ya mitnah manungsa. Dhèwèké ngomong nèk ora ana manungsa sing bakal terus setya mbéla jenengé Gusti Allah. Menurut Sétan, pas lagi susah utawa rumangsa ora diberkahi Gusti Allah, wong mesthi ora gelem nglayani Yéhuwah manèh. (Ayb. 1:​9-11; 2:4) Nah, Ayub wis mbuktèkké nèk fitnahé Sétan kuwi salah merga dhèwèké tetep setya karo Gusti Allah. Awaké dhéwé ya isa mbuktèkké nèk fitnahé Sétan kuwi salah, nèk awaké dhéwé muji jeneng Yéhuwah. Awaké dhéwé nduwé kesempatan istiméwa kanggo mbéla jeneng Yéhuwah lan nggawé Dhèwèké seneng nèk terus setya nglayani Dhèwèké.—WB. 27:11.

6. Apa sing isa ditiru saka Raja Daud lan wong Lèwi? (Néhémia 9:5)

⁶ Merga sayang Yéhuwah, awaké dhéwé dadi péngin muji jenengé saktulusé ati. Raja Daud nulis, ”Aku arep muji Yéhuwah. Aku arep muji jenengé sing suci sak tulusé atiku.” (Mzm. 103:1) Wektu krungu jeneng Yéhuwah, wong mesthi langsung terpikir sifat-sifat lan perbuatané  Yéhuwah. Makané, Daud ngerti nèk muji jeneng Yéhuwah kuwi padha karo muji Yéhuwah. Daud nganggep jeneng Yéhuwah kuwi suci lan péngin muji jeneng kuwi ’saktulusé atiné’. Wong Lèwi ya dadi conto sing apik soal muji Yéhuwah. Meréka rendah hati ngakoni nèk jeneng Yéhuwah kuwi mulya banget makané pantes dipuji lan diluhurké. (Wacanen Néhémia 9:5.) Pujian sing rendah hati lan tulus saka ati kuwi mesthi marakké Yéhuwah seneng.

7. Apa waé carané muji Yéhuwah?

⁷ Saiki, awaké dhéwé ya isa nggawé Yéhuwah seneng nèk muji Dhèwèké. Wektu nyritakké soal Yéhuwah, buktèkna nèk njenengan bersyukur lan sayang banget karo Yéhuwah. Wektu nginjil, awaké dhéwé péngin mbantu wong-wong bèn sayang lan cedhak karo Yéhuwah. (Yak. 4:8) Duduhna saka Alkitab nèk Yéhuwah kuwi sayang, adil, wicaksana, lan mahakuwasa. Terus, cara liyané kanggo muji lan nggawé Yéhuwah seneng kuwi nèk niru Dhèwèké. (Éf. 5:1) Nèk awaké dhéwé niru Yéhuwah, wong-wong mungkin dadi ndelok nèk awaké dhéwé kétok béda saka wong-wong liyané, terus dadi péngin ngerti alesané. (Mat. 5:​14-16) Kuwi kesempatan awaké dhéwé isa crita soal Yéhuwah. Hasilé, wong-wong sing tulus bakal péngin nyedhak karo Dhèwèké. Nèk muji Yéhuwah nganggo cara-cara kuwi, awaké dhéwé bakal nggawé Yéhuwah seneng.—1 Tim. 2:​3, 4.

ISA NGGAWÉ YÉSUS SENENG

8. Ngapa kok Yésus kuwi conto sing paling apik soal muji Yéhuwah?

⁸ Sing paling ngerti soal Yéhuwah kuwi Yésus. (Mat. 11:27) Yésus sayang karo Yéhuwah lan dhèwèké dadi conto sing paling apik soal muji Yéhuwah. (Yoh. 14:31) Kuwi sing diutamakké Yésus selama dhèwèké ing bumi. Makané sakdurungé mati, Yésus isa ngomong, ”Aku wis nduduhké jeneng-Mu.” (Yoh. 17:26) Maksudé apa?

9. Bèn wong-wong isa luwih mbayangké soal sifaté Yéhuwah, Yésus nyritakké perumpamaan apa?

⁹ Yésus ora mung ngandhani wong-wong nèk jenengé Gusti Allah kuwi Yéhuwah, soalé wong Yahudi wis ngerti jenengé Gusti Allah. Tapi, Yésus ya ”nerangké soal Gusti Allah” kuwi kaya apa. (Yoh. 1:​17, 18) Misalé, ing Kitab-Kitab Ibrani disebutké nèk Yéhuwah kuwi apikan lan gampang mesakké. (Pa. 34:​5-7) Bèn wong-wong isa luwih mbayangké sifaté Yéhuwah kuwi, Yésus nyritakké perumpamaan soal anak sing ilang lan bapaké. Saka kadohan, pas ndelok anaké sing mertobat bali mulih, bapaké langsung mlayu marani dhèwèké, meluk, lan bener-bener ngampuni dhèwèké. Ya kaya ngono kuwi sifaté Yéhuwah sing seneng ngampuni lan gampang mesakké.—Luk. 15:​11-32.

10. (a) Apa buktiné nèk Yésus nyebut lan péngin wong-wong ya nyebut jenengé Bapaké? (Markus 5:19) (Deloken gambar.) (b) Saiki, Yésus péngin awaké dhéwé ngapa?

¹⁰ Yésus ya péngin wong-wong nyebut jenengé Bapaké. Wektu kuwi, para pemimpin agama nganggep nèk nyebut jenengé Gusti Allah kuwi ora sopan. Tapi, Yésus tetep nyebut jenengé Gusti Allah. Misalé, wektu dhèwèké marèkké wong sing kesurupan ing Gérasa. Bar kuwi, wong-wong dadi padha wedi, terus ngongkon Yésus lunga. (Mrk. 5:​16, 17) Tapi, Yésus tetep péngin bèn jeneng  Yéhuwah dikenal karo wong-wong ing kono. Makané, dhèwèké ngongkon bèn wong sing bar kesurupan kuwi ngandhani wong-wong nèk Yéhuwah sing wis marèkké dhèwèké, dudu Yésus. (Wacanen Markus 5:19.) a Saiki, Yésus ya péngin bèn jenengé Bapaké dikenal wong sak donya. (Mat. 24:14; 28:​19, 20) Nèk awaké dhéwé mèlu nyritakké jeneng Yéhuwah, kuwi nggawé Yésus seneng.

11. (a) Yésus ngongkon murid-muridé ndongakké apa? (b) Menurut Yèhèzkièl 36:​23, ngapa kok kuwi penting?

¹¹ Yésus ngerti nèk Yéhuwah péngin nyucèkké jenengé sing dièlèk-èlèk. Mulané, Yésus ngongkon murid-muridé ndonga, ”Bapakku sing ana ing swarga, muga-muga jeneng-Mu disucèkké.” (Mat. 6:9) Yésus ngerti nèk iki masalah sing paling penting. (Wacanen Yèhèzkièl 36:23.) Ora ana sing isa nandhingi upayané Yésus kanggo nyucèkké jenengé Gusti Allah. Tapi pas Yésus ditangkep, dhèwèké malah ditudhuh nèk wis ngèlèk-èlèk jenengé Gusti Allah. Kanggoné Yésus, ngèlèk-èlèk jenengé Gusti Allah kuwi dosa sing gedhé banget. Makané pas ditudhuh kaya ngono, dhèwèké mesthi sedhih banget. Mungkin kuwi sebabé pas arep ditangkep, Yésus ”ngrasa susah banget”.—Luk. 22:​41-44.

12. Apa buktiné Yésus bener-bener nyucèkké jenengé Bapaké?

¹² Bèn isa nyucèkké jenengé Bapaké, Yésus réla disiksa, dihina, lan difitnah. Dhèwèké ngerti nèk dhèwèké wis manut karo Bapaké lan dhèwèké ora isin. (Ibr. 12:2) Yésus ya ngerti nèk pas kuwi, dhèwèké lagi dadi sasarané Sétan. (Luk. 22:​2-4; 23:​33, 34) Sétan mesthi péngin banget Yésus ora setya karo Yéhuwah. Tapi, upayané Sétan kuwi gagal. Yésus terbukti tetep setya. Yésus ya mbuktèkké nèk Sétan kuwi tukang ngapusi lan Yéhuwah isih nduwé umat sing setya nglayani Dhèwèké meskipun ngalami sengsara.

13. Piyé carané nggawé Yésus seneng?

 ¹³ Apa njenengan péngin nggawé Yésus seneng? Nèk iya, tirunen Yésus. Carané, terus muji jeneng Yéhuwah lan ngandhani wong-wong soal sifat-sifaté Yéhuwah. (1 Ptr. 2:21) Hasilé, kaya Yésus, njenengan bakal nggawé Yéhuwah seneng lan mbuktèkké nèk Sétan kuwi tukang ngapusi.

ISA MARAKKÉ WONG-WONG NDUWÉ HARAPAN URIP SAKLAWASÉ

14-15. Apa hasilé nèk awaké dhéwé ngandhani wong-wong soal Yéhuwah?

¹⁴ Nèk awaké dhéwé muji jeneng Yéhuwah, kuwi ya isa marakké wong-wong dadi nduwé harapan kanggo urip saklawasé. Kok isa? Saiki, ’pikirané wong-wong ditutupi’ karo Sétan. (2 Kor. 4:4) Akibaté, meréka dadi percaya nèk Gusti Allah kuwi ora ana, ora perduli karo manungsa, kejem, lan seneng nyiksa manungsa. Kuwi marakké jeneng Yéhuwah dadi èlèk lan wong-wong dadi ora gelem nyedhak karo Dhèwèké. Wektu nginjil, awaké dhéwé ngandhani sing bener soal Gusti Allah bèn wong-wong kuwi ora diapusi Sétan. Nah, kuwi padha karo awaké dhéwé muji jenengé Gusti Allah. Hasilé apa?

¹⁵ Nèk wong-wong wis ngerti sing bener saka Alkitab soal Yéhuwah, hasilé luar biasa. Suwé-suwé meréka dadi ora kapusan Sétan manèh, tapi dadi kagum karo sifat-sifaté Yéhuwah. Misalé, meréka dadi takjub merga ngerti kuwasané Yéhuwah. (Yés. 40:26) Meréka ya dadi saya percaya merga Gusti Allah kuwi adil. (PT. 32:4) Meréka dadi ngerti akèh hal merga Yéhuwah wicaksana banget. (Yés. 55:9; Rm. 11:33) Meréka ya dadi terhibur merga ngrasakké kasih sayangé Yéhuwah. (1 Yoh. 4:8) Merga tambah cedhak karo Yéhuwah, meréka ya dadi semakin yakin karo harapan urip saklawasé. Mulané, isa mbantu wong-wong bèn cedhak karo Yéhuwah kuwi kesempatan sing istiméwa banget. Yéhuwah ya bakal nganggep awaké dhéwé ”kanca nyambut gawéné”.—1 Kor. 3:​5, 9.

16. Critakna conto-conto soal pengaruhé ngerti jenengé Gusti Allah.

 ¹⁶ Ngandhani wong soal jenengé Gusti Allah kuwi kétoké sederhana. Tapi, kanggo wong-wong sing atiné tulus, kuwi pengaruhé gedhé banget. Misalé, Aaliyah b sing agamané dudu Kristen. Dhèwèké ora pati sreg karo agamané lan ngrasa ora isa cedhak karo Gusti Allah. Tapi bar sinau Alkitab karo Seksi-Seksi Yéhuwah, dhèwèké mulai isa akrab karo Gusti Allah lan nganggep Gusti Allah kuwi kancané. Dhèwèké kagèt banget pas ngerti nèk jenengé Gusti Allah wis dihapus saka Alkitab lan diganti karo sebutan, misalé ”Gusti”. Dhèwèké takjub banget isa ngerti jenengé Gusti Allah. Dhèwèké ngomong, ”Ternyata sahabatku nduwé jeneng. Saiki, atiku ngrasa ayem banget. Aku ya bangga isa kenal karo Yéhuwah.” Conto liyané kuwi pemain musik sing jenengé Steve. Mbiyèné, dhèwèké kuwi wong Yahudi sing rajin ngibadah. Tapi, dhèwèké ora gelem gabung ing organisasi agama manèh merga ndelok nèk anggotané padha munafik. Nah, bar ibuné mati, dhèwèké sinau Alkitab karo Seksi-Seksi Yéhuwah. Dhèwèké seneng banget pas ngerti jenengé Gusti Allah. Steve ngomong, ”Selama iki, aku ora ngerti nèk Gusti Allah nduwé jeneng. Bar ngerti jenengé, aku dadi ngerti nèk Gusti Allah kuwi ana tenan. Aku ya isa akrab karo Dhèwèké lan dadi kancané.”

17. Ngapa kok njenengan péngin terus muji jeneng Yéhuwah? (Deloken gambar.)

¹⁷ Pas nginjil, njenengan isa muji jenengé Gusti Allah. Carané, njenengan isa nyritakké soal jeneng Yéhuwah lan sifat-sifaté. Apa manfaaté nèk njenengan muji jeneng Yéhuwah? Wong-wong isa dadi sahabaté Yéhuwah lan nduwé harapan kanggo urip saklawasé. Njenengan ya bakal nggawé Yéhuwah seneng lan kuwi bukti nèk njenengan niru Yésus. Muga-muga njenengan ’muji jenengé Gusti Allah saklawasé’.​—Mzm. 145:2.