1-2. (a) Ing beberapa negara, akèh umaté Yéhuwah sing diapakké, tapi sedulur-sedulur kuwi piyé? (b) Kenapa wong sing dianiaya kuwi isa bahagia? (Deloken gambar halaman 1.)

 ANA luwih saka 30 negara sing nglarang kegiatané Seksi Yéhuwah. Malah ya ana umaté Yéhuwah sing dipenjara, padahal wong-wong kuwi ora salah. Wong-wong kuwi mung maca lan sinau Alkitab, nyritakké soal Yéhuwah, teka ing pertemuan ibadah, lan ora gelem mèlu-mèlu urusan politik. Meskipun ngono, wong-wong kuwi nduwé tékad sing kuwat péngin terus setya karo Yéhuwah. Hasilé, wong-wong kuwi bahagia.

² Njenengan mungkin wis ndelok fotoné sedulur-sedulur sing setya kuwi lan ngerti nèk wajahé sedulur-sedulur kuwi seneng kabèh. Sedulur-sedulur kuwi bahagia merga ngerti nèk wis nyenengké Yéhuwah. (1 Bb. 29:17a) Kuwi cocog karo sing disebutké Yésus yaiku, ”Wong sing dianiaya merga nindakké sing bener kuwi wong sing bahagia. . . . Kowé kudu bahagia lan seneng, merga upahmu gedhé ing swarga.”​—Mat. 5:10-12.

3. Nurut Kisah 4:19, 20, para rasul piyé wektu dikongkon mandheg nginjil, lan kenapa?

³ Para sedulur kuwi ngalami sing padha karo para rasul jaman mbiyèn. Para rasul kuwi ya dianiaya merga nyritakké soal Yésus. Mahkamah Agung Yahudi bola-bali nglarang wong-wong kuwi ”ngomong utawa mulang nganggo jenengé Yésus”. (Kis. 4:18; 5:27, 28, 40) Terus, para rasul kuwi piyé? (Wacanen  Kisah 4:19, 20.) Para rasul ngerti nèk tugas kanggo ”mènèhi penjelasan sing lengkap” soal Kristus kuwi saka Gusti Allah. (Kis. 10:42) Dadi, Pétrus karo Yohanes ngomong nèk bakal luwih manut karo Gusti Allah timbang karo Mahkamah Agung Yahudi. Meskipun dilarang, para rasul kuwi tetep nyritakké soal Yésus. Seolah-olah para rasul ngomong, ’Mémangé njenengan kuwi sapa? Kok wong kudu luwih manut karo njenengan timbang karo Gusti Allah?’

4. Nurut Kisah 5:27-29, para rasul mènèhi conto apa kanggo awaké dhéwé, terus piyé carané awaké dhéwé niru para rasul kuwi?

⁴ Para rasul kuwi dadi conto sing apik kanggo awaké dhéwé jaman saiki merga nganggep nèk ’penguasa sing kudu dituruti kuwi Gusti Allah dudu manungsa’. (Wacanen Kisah 5:27-29.) Meskipun bar digebugi, para rasul kuwi ”tetep ngrasa seneng merga Gusti Allah wis mènèhi kesempatan marang para rasul bèn dirèmèhké merga jenengé Yésus”. (Kis. 5:40-42) Para rasul ya ora mandheg martakké kabar apik.

5. Pertanyaan apa waé sing mungkin dipikirké?

⁵ Tapi, mungkin ana sing mikir: Merga wong-wong kuwi luwih manut karo Gusti Allah, apa kuwi berarti para rasul ora manut karo pamréntah? Bukané awaké dhéwé kudu ”manut karo pamréntah”? (Rm. 13:1) Dadi, apa awaké dhéwé isa tetep ”manut karo pamréntah lan wong sing nduwé wewenang”, tapi ya tetep setya karo Yéhuwah?​—Tit. 3:1.

6. (a) Nurut Roma 13:1, awaké dhéwé dikongkon apa? (b) Pamréntah nduwé wewenang saka sapa, terus wewenangé kuwi piyé?

⁶ Wacanen Roma 13:1. Ing ayat kuwi, awaké dhéwé dikongkon ”manut karo pamréntah” utawa wong sing nduwé kuwasa utawa kedudukan. Wong-wong sing nduwé wewenang kuwi nggawé aturan bèn keadaané isa tertib lan péngin bèn kabèh wong manut karo aturan kuwi. Malah, kadhang pamréntah ya mbéla umaté Yéhuwah. (Why. 12:16) Mulané, awaké dhéwé péngin mènèhké sing dadi haké pamréntah, misalé mbayar pajeg  lan kudu ngajèni wong-wong kuwi. (Rm. 13:7) Tapi, wong-wong kuwi isa nduwé wewenang merga Gusti Allah sing mènèhi. Yésus ya tau ngomong ngono pas ditakon-takoni karo Gubernur Roma Pontius Pilatus. Pas kuwi, Pilatus ngomong nèk dhèwèké isa nylametké Yésus utawa ngukum mati Yésus. Tapi Yésus kandha, ”Nèk Gusti Allah ora mènèhi kowé wewenang, kowé ora bakal isa ngapa-apakké aku.” (Yoh. 19:11) Dadi kaya Pilatus, kabèh pamréntah sing ana saiki nduwé wewenang, tapi wewenangé terbatas.

7. Awaké dhéwé ora bakal manut karo pamréntah nèk piyé, lan piyé nèk pamréntah nyalahgunakké wewenangé?

⁷ Mémang, awaké dhéwé kudu manut karo aturané pamréntah. Tapi nèk pamréntah ngongkon awaké dhéwé berbuat sesuatu sing nglanggar hukumé Yéhuwah, awaké dhéwé ora bakal manut. Misalé, ana pamréntah sing ngongkon rakyaté dadi tentara lan mèlu perang. b Terus, pamréntah mungkin ora ngijinké awaké dhéwé nduwé Alkitab Terjemahan Donya Anyar utawa bacaan-bacaan saka organisasi. Sakliyané kuwi, pamréntah isa waé ya nglarang umaté Yéhuwah nginjil lan ngibadah bareng. Terus nèk pamréntah nyalahgunakké wewenangé, misalé nganiaya umaté Yéhuwah, wong-wong kuwi kudu tanggung jawab karo Yéhuwah. Yéhuwah ngerti kabèh sing kelakon.​—Pkh. 5:8.

8. Apa bédané wewenangé Yéhuwah lan manungsa?

⁸ Pamréntah mémang nduwé wewenang, tapi wewenangé terbatas. Kuwi béda karo Yéhuwah. Yéhuwah kuwi wewenangé paling gedhé. Ing Alkitab bola-bali disebutké nèk Yéhuwah kuwi ”Gusti Allah sing Mahaluhur”.​—Dan. 7:18, 22, 25, 27.

9. Nabi Danièl tau éntuk wahyu soal apa?

⁹ Nabi Danièl tau éntuk wahyu sing nduduhké nèk wewenangé Yéhuwah kuwi sing paling gedhé. Sing pertama, Danièl ndelok ana papat kéwan laut. Kuwi nggambarké pamréntahan sing paling kuwat yaiku Babilon, Média-Pèrsia, Yunani, lan Roma, lan pamréntahan sing paling kuwat jaman saiki yaiku Inggris lan Amerika. (Dan. 7:1-3, 17) Bar kuwi, Danièl ndelok Yéhuwah lungguh ing takhta nganakké pengadilan. (Dan. 7:9, 10) Nah, sing didelok Nabi Danièl berikuté kuwi nggambarké apa sing bakal kelakon sedhéla manèh.

10. Nurut Danièl 7:13, 14, 27, Yéhuwah bakal mènèhi wewenang kanggo mréntah karo sapa, lan saka kono awaké dhéwé isa ngerti apa?

¹⁰ Wacanen Danièl 7:13, 14, 27. Sukmbèn, Yéhuwah ora mènèhi wewenang manèh karo pamréntah. Wewenang kuwi bakal diwènèhké liyané sing luwih pantes mréntah lan sing kuwasané luwih gedhé. Terus, sapa sing diwènèhi wewenang kuwi? Wewenang kuwi diwènèhké marang ”anaké manungsa”, yaiku Yésus Kristus, lan ”wong-wong suci duwèké Gusti Allah sing Mahaluhur”, yaiku 144.000 sing bakal mréntah ”kanggo saklawas-lawasé”. (Dan. 7:18) Saka peristiwa kuwi, awaké dhéwé ngerti nèk mung Yéhuwah ”Gusti Allah sing Mahaluhur”, yaiku sing wewenangé paling gedhé, soalé ora ana sing isa berbuat kaya ngono kecuali Yéhuwah.

11. Danièl nyebutké apa manèh soal wewenangé Yéhuwah?

¹¹ Wahyu sing didelok Danièl cocog karo sing dhèwèké omongké sakdurungé. Nabi Danièl tau ngomong, ’Gusti Allah sing nguwasani swarga nglèngsèrké lan nglantik raja.’ Dhèwèké ya ngomong, ”Gusti Allah sing Mahaluhur kuwi Penguasané kerajaan manungsa  lan nèk Dhèwèké mènèhké wewenang kanggo mréntah marang sapa waé sing Dhèwèké péngini.” (Dan. 2:19-21; 4:17) Apa buktiné nèk Yéhuwah tau nglèngsèrké lan nglantik raja?

12. Apa buktiné nèk Yéhuwah kuwi nduwé wewenang sing paling gedhé? (Deloken gambar kanggo paragraf 12.)

¹² Yéhuwah kuwi nduwé wewenang sing paling gedhé timbang ”pamréntah”. Ana telu buktiné. Mbiyèn, Firaun raja Mesir ndadèkké umaté Yéhuwah budhaké. Firaun bola-bali dikongkon mbébaské umaté Yéhuwah tapi Firaun ora gelem. Akhiré, Yéhuwah mbébaské umaté. Yéhuwah ya nggawé Firaun lan pasukané kleleb ing Laut Merah. (Pa. 14:26-28; Mzm. 136:15) Terus pas jamané Danièl, ana Raja Bèlsyazar. Dhèwèké nggawé pésta lan ”nglawan Gusti sing nguwasani swarga”. Dhèwèké ya ”muji brahala-brahala sing digawé saka emas [lan] pérak”. (Dan. 5:22, 23) Akhiré, Yéhuwah nggawé dhèwèké ora diajèni manèh. ”Bengi kuwi” Bèlsyazar dipatèni, terus kerajaané diserahké karo wong Média lan Pèrsia. (Dan. 5:28, 30, 31) Pas jamané para rasul, Raja Hérodès Agripa I matèni Yakobus terus nglebokké Pétrus ing penjara merga dhèwèké ya arep matèni Pétrus. Tapi, Yéhuwah nylametké Pétrus. ”Malaékaté Yéhuwah langsung nggawé Hérodès lara” lan akhiré Hérodès mati.​—Kis. 12:1-5, 21-23.

13. Apa buktiné nèk Yéhuwah luwih unggul timbang raja-raja sing bersatu?

¹³ Yéhuwah ya luwih unggul timbang raja-raja sing bersatu. Misalé, Dhèwèké mbantu wong Israèl ngalahké 31 rajané wong Kanaan wektu ngrebut dhaérah ing tanah perjanjian. (Yos. 11:4-6, 20; 12:1, 7, 24) Yéhuwah ya mbantu Israèl ngalahké Raja Bèn Hadad karo 32 raja Siria liyané.​—1 Raj. 20:1, 26-29.

14-15. (a) Raja Nébukhadnézar lan Raja Darius tau ngomong apa soal Yéhuwah? (b) Sing nulis Mazmur tau ngomong apa soal Yéhuwah lan bangsa sing dipilih dadi duwèké Gusti Allah?

¹⁴ Ana manèh bukti liyané nèk Yéhuwah kuwi nduwé wewenang sing paling gedhé. Mbiyèn, Raja Nébukhadnézar tau mbanggak-mbanggakké ’kekuwatan lan kuwasané dhéwé’, terus ngomong nèk dhèwèké kuwi ”mulya lan hébat”. Merga Raja Nébukhadnézar ora ngluhurké Yéhuwah, Yéhuwah nggawé raja kuwi dadi édan. Sakwisé Raja  Nébukhadnézar waras, dhèwèké ”muji lan ngluhurké Gusti Allah sing Mahaluhur” sing ”mréntah kanggo saklawasé”. Terus, dhèwèké ya kandha nèk ”ora ana sing isa ngalang-alangi” Yéhuwah. (Dan. 4:30, 33-35) Raja Darius ya tau muji Yéhuwah merga wis nylametké Danièl saka guwa singa. Raja Darius kandha, ”Aku mréntahké kabèh wong ing wilayah kerajaanku bèn padha wedi karo Gusti Allahé Danièl merga Dhèwèké kuwi Gusti Allah sing urip lan ana nganti saklawasé. Kerajaané ora bakal hancur, lan kekuasaané langgeng.”​—Dan. 6:7-10, 19-22, 26, 27.

¹⁵ Sing nulis Mazmur tau kandha, ”Yéhuwah nggawé niaté bangsa-bangsa dadi gagal, Dhèwèké nggawé rencanané suku-suku bangsa dadi ora kelakon.” Terus dhèwèké ya ngomong, ”Bangsa sing Gusti Allahé yaiku Yéhuwah mesthi bahagia. Bangsa sing dipilih dadi duwèké mesthi bahagia.” (Mzm. 33:10, 12) Kuwi sebabé, awaké dhéwé kudu tetep setya karo Yéhuwah.

16. Yéhuwah bakal ngapa pas ”sengsara gedhé”, lan kenapa awaké dhéwé isa yakin soal kuwi? (Deloken gambar kanggo paragraf 16-17.)

¹⁶ Awaké dhéwé wis ngrembug bukti-buktiné nèk Yéhuwah kuwi Gusti Allah sing Mahaluhur. Terus sukmbèn pas ”sengsara gedhé”, Yéhuwah mesthi bakal nylametké umaté wektu Gog saka Magog yaiku gabungan saka bangsa-bangsa nyerang umaté Yéhuwah. (Mat. 24:21; Dan. 12:1) Malah, gabungan saka 193 anggota Perserikatan Bangsa-Bangsa ora ana apa-apané nèk dibandhingké karo Yéhuwah lan pasukané ing swarga. Yéhuwah janji, ”Aku mesthi bakal nduduhké kuwasa-Ku, nduduhké nèk Aku iki Gusti Allah sing suci, lan nduduhké sapa Aku iki. Bangsa-bangsa kuwi bakal ngerti nèk Aku iki Yéhuwah.”​—Yèh. 38:14-16, 23; Mzm. 46:10.

17. Nurut Alkitab, raja-raja ing bumi bakal diapakké, lan wong sing terus setya bakal piyé?

¹⁷ Bar Gog saka Magog, yaiku ”raja-raja ing  bumi”, nyerang umaté Yéhuwah, Yéhuwah bakal nyingkirké raja-raja kuwi ing perang Armagédon. (Why. 16:14, 16; 19:19-21) Tapi Yéhuwah bakal ”nglindhungi abdiné sing setya”, lan wong-wong kuwi bakal terus manggon ing bumi.​—Mzm. 97:10.

18. Kèt mbiyèn nganti saiki, mesthi ana umaté Yéhuwah sing piyé, lan kenapa wong-wong kuwi gelem kaya ngono? (Danièl 3:28)

¹⁸ Kèt mbiyèn nganti saiki, mesthi ana umaté Yéhuwah sing terus setya meskipun keadaané angèl. Wong-wong kuwi terus setya merga sayang karo Yéhuwah, malah ana sing gelem ngorbanké nyawané. Wong-wong kuwi kaya wong telu Ibrani sing tetep setya karo Gusti Allah sing Mahaluhur. Merga tetep setya, wong telu kuwi dislametké saka ruang pembakaran.​—Wacanen Danièl 3:28.

19. Yéhuwah bakal ngadili umaté berdasarkan apa, lan awaké dhéwé kudu piyé?

¹⁹ Sing nulis Mazmur tau kandha soal Yéhuwah, ”Pas Dhèwèké ngadili umaté, Dhèwèké ngundang langit lan bumi bèn dadi seksi. Dhèwèké ngomong, ’Kumpulna para abdi-Ku sing setya.’” (Mzm. 50:4, 5) Ing ayat liyané, Daud tau nulis, ”Yéhuwah seneng karo tumindak sing adil, lan Dhèwèké ora bakal ninggalké wong sing setya. Wong kuwi bakal terus dilindhungi.” (Mzm. 37:28) Kuwi sebabé, awaké dhéwé kudu terus setya karo Yéhuwah ora soal apa sing kelakon. Awaké dhéwé ya isa ngrasakké nèk para abdiné Yéhuwah sing setya bakal ”sorak-sorak merga seneng”.​—Mzm. 132:9.