Awaké dhéwé isa tambah akrab karo kanca nèk ngerti sifat-sifaté. Awaké dhéwé ya isa tambah akrab karo Yéhuwah nèk ngerti sifat-sifaté. Yéhuwah nduwé papat sifat sing utama, yaiku kuwasa, kawicaksanan, keadilan, lan katresnan.

”Gusti sing Mahakuwasa Yéhuwah, Njenengan wis nggawé langit lan bumi nganggo kuwasané Njenengan sing gedhé.”​—YÉRÉMIA 32:17.

Awaké dhéwé isa ngerti sepira gedhéné kuwasané Yéhuwah nèk ndelok ciptaané. Contoné, awaké dhéwé isa ngrasakké panasé sinar matahari nèk ngadeg ing njaba pas awan. Sepira panasé matahari? Suhu ing inti matahari kira-kira 15 juta derajat Celsius. Saben detik, matahari ngetokké ènergi sing padha kaya ledakan atusan juta bom nuklir. Kuwi bukti kuwasané Yéhuwah gedhé banget.

Tapi sakjané matahari kuwi ukurané luwih cilik nèk dibandhingké karo jutaan bintang liyané. Ana ilmuwan sing ngomong nèk ana bintang sing jenengé UY Scuti. Ukurané bintang kuwi kira-kira ping 1.700 luwih gedhé timbang matahari. Saking gedhéné, nèk posisiné UY Scuti ana ing posisiné matahari, dadiné planèt Merkurius, Venus, Bumi, Mars, bahkan nganti orbité Jupiter bakal ana ing njeroné UY Scuti. Saka conto iki awaké dhéwé dadi  ngerti nèk Yéhuwah nggunakké kuwasané sing gedhé banget wektu nyiptakké alam semesta.

Manfaat saka kuwasané Gusti Allah. Uripé awaké dhéwé bergantung karo ciptaané Yéhuwah, contoné matahari lan sumber daya alam liyané ing bumi. Yéhuwah ya nggunakké kuwasané kanggo mbantu manungsa. Contoné, wektu Yésus ing bumi, Gusti Allah ngekèki Yésus kuwasané kanggo nggawé mukjijat. Ing Alkitab disebutké, ”Wong wuta isa ndelok, wong lumpuh isa mlaku, wong lara kusta dimarèkké, wong budheg isa krungu, wong mati diuripké manèh.” (Matius 11:5) Nèk jaman saiki piyé? Ing Alkitab disebutké, ”Dhèwèké mènèhi kekuwatan marang wong sing kesel.” Ing Alkitab ya disebutké, ”Wong sing berharap marang Yéhuwah bakal dadi kuwat manèh.” (Yésaya 40:29, 31) Gusti Allah isa ngekèki ”kekuwatan sing luar biasa” bèn awaké dhéwé isa ngadhepi masalah sing abot. (2 Korintus 4:7) Awaké dhéwé mesthi péngin akrab karo Gusti Allah sing gelem nggunakké kuwasané kanggo mbantu awaké dhéwé.

”Oh Yéhuwah, ciptaan-Mu kuwi akèh banget. Njenengan nggawé kuwi kabèh nganggo kawicaksanan.”​—MAZMUR 104:24.

Wektu nggatèkké ciptaané Yéhuwah, awaké dhéwé isa tambah ngerti nèk Yéhuwah kuwi pinter lan wicaksana banget. Ana bidang studi sing disebut biomimetika utawa biomimikri. Ing bidang studi kuwi, para ilmuwan nliti lan niru ciptaané Yéhuwah bèn rancangané dadi luwih apik, contoné pas nggawé barang sing sederhana misalé lém, nganti barang sing rumit misalé pesawat.

Bukti nèk Yéhuwah kuwi wicaksana lan pinter ya kétok saka rancangan badané manungsa. Contoné, perkembangané bayi sakdurungé lair. Awalé, ana siji sèl sing dibuahi. Ing sèl kuwi ana rancangan sing dibutuhké kanggo mbentuk badané manungsa. Siji sèl kuwi dadi saya akèh, lan bentuké sèl-sèl kuwi mèh padha. Tapi, akhiré sèl-sèl kuwi nduwé bentuk lan fungsi sing béda-béda, misalé ana sing dadi sèl darah, sèl saraf, lan sèl tulang. Terus, sèl-sèl kuwi mulai dadi organ sing akhiré isa berfungsi. Dadi mung selama sangang sasi, siji sèl isa berkembang dadi bayi. Mula, akèh wong sing setuju karo Daud sing ngomong, ”Aku muji Njenengan merga carané Njenengan nggawé aku kuwi hébat lan luar biasa banget.”​—Mazmur 139:14.

Manfaat saka kawicaksanané Gusti Allah. Yéhuwah ngerti apa sing awaké dhéwé butuhké bèn isa bahagia. Mula, Yéhuwah nyedhiakké naséhat sing bermanfaat ing Alkitab. Contoné, ing Alkitab disebutké, ”Kowé kudu . . . tulus ngapura liyané.” (Kolose 3:13) Naséhat kuwi mémang bermanfaat. Para dokter ngomong nèk wong seneng ngapura, turuné isa angler lan ora nduwé tekanan darah tinggi. Kuwi ya isa ngurangi strès lan masalah keséhatan liyané. Kaya kanca sing wicaksana lan perduli, Gusti Allah terus mènèhi bantuan lan naséhat sing bermanfaat. (2 Timotius 3:16, 17) Awaké dhéwé mesthi péngin nduwé kanca sing kaya ngono, ta?

”Yéhuwah seneng karo tumindak sing adil.”​—MAZMUR 37:28.

Gusti Allah selalu adil. Ing Alkitab disebutké, ”Ora mungkin Gusti Allah sing bener tumindak jahat, ora mungkin Sing Mahakuwasa tumindak salah.” (Ayub 34:10) Sing nulis Mazmur ya ngomong nèk Yéhuwah ”adil wektu ngadili wong-wong”. (Mazmur 67:4) Yéhuwah ora isa diapusi merga Yéhuwah ”ndelok piyé atiné” manungsa. Mula, Yéhuwah isa adil wektu ngadili lan isa nggawé keputusan sing bener. (1 Samuèl 16:7) Yéhuwah ya isa ngerti kabèh perbuatan sing jahat lan ora adil sing ana ing bumi. Yéhuwah janji nèk ”wong jahat bakal disingkirké saka bumi”.​—Wulang Bebasan 2:22.

Tapi, Yéhuwah kuwi dudu hakim sing seneng ngukum. Ing Alkitab disebutké, ”Yéhuwah kuwi apikan, [lan] gampang mesakké.” Bahkan Yéhuwah nduduhké rasa mesakké karo wong-wong jahat sing mertobat.​—Mazmur 103:8; 2 Pétrus 3:9.

Manfaat saka keadilané Gusti Allah. Rasul Pétrus ngomong, ”Gusti Allah kuwi ora mbédak-mbédakké. Kabèh wong sing wedi marang Gusti Allah lan nindakké apa sing bener, ora soal asalé saka bangsa endi, bakal ditampa Gusti Allah dadi abdiné.” (Kisah 10:34, 35) Yéhuwah kuwi adil merga ora tau mbédak-mbédakké wong. Meskipun ras, bangsa, pendidikan, utawa status sosialé béda-béda, awaké dhéwé isa dadi abdiné Gusti Allah.

Yéhuwah péngin awaké dhéwé ngerti soal keadilané, makané Dhèwèké ngekèki awaké dhéwé hati nurani. Ing Alkitab disebutké nèk hati nurani kuwi kaya hukum sing ’ditulis ing njero ati’ sing ”nduduhké tumindaké wong-wong kuwi apik utawa èlèk”. (Roma 2:15) Apa manfaaté? Nèk hati nurani dilatih, awaké dhéwé isa ngedohi bahaya utawa nolak perbuatan sing ora bener. Merga nduwé hati nurani, awaké dhéwé ya bakal tergerak kanggo mertobat lan nglakoni sing bener manèh sakwisé nggawé salah. Dadi, Yéhuwah adil merga Dhèwèké ngekèki awaké dhéwé hati nurani kanggo  mbédakké sing bener lan sing salah. Kuwi mesthi ya nggawé awaké dhéwé dadi péngin akrab karo Gusti Allah.

”Gusti Allah kuwi katresnan.”​—1 YOHANES 4:8.

Meskipun isa nduduhké kuwasa, kawicaksanan, lan keadilan, ing Alkitab ora disebutké nèk Gusti Allah kuwi kuwasa, kawicaksanan, lan keadilan. Tapi, ing Alkitab disebutké nèk Gusti Allah kuwi katresnan. Apa maksudé? Merga nduwé kuwasa, Gusti Allah sanggup nglakoni apa waé. Perbuatané Gusti Allah ya selalu adil lan mbuktèkké kawicaksanané. Tapi, sing dadi dhasar kabèh perbuatané Yéhuwah kuwi katresnan.

Yéhuwah sakjané ora butuh apa-apa. Tapi merga sayang, Yéhuwah nyiptakké manungsa ing bumi lan para malaékat ing swarga. Yéhuwah péngin bèn kabèh ciptaané isa éntuk manfaat saka katresnané. Gusti Allah nyiptakké bumi dadi panggonan sing cocog kanggo manungsa. Gusti Allah ya terus nduduhké rasa sayangé karo kabèh manungsa. Contoné, Yéhuwah ”nggawé matahari terbit kanggo wong sing jahat lan wong sing apik lan nggawé udan kanggo wong sing bener lan wong sing ora bener”.​—Matius 5:45.

Ing Alkitab ya ditulis, ”Yéhuwah kuwi gampang mesakké lan nduwé rasa sayang.” (Yakobus 5:11) Yéhuwah sayang karo kabèh sing péngin akrab karo Dhèwèké. Yéhuwah ya nggatèkké saben wong. Ing Alkitab disebutké, ”Dhèwèké perduli karo kowé.”​—1 Pétrus 5:7.

Manfaat saka katresnané Gusti Allah. Awaké dhéwé seneng wektu ndelok langit sing indah pas soré utawa wektu krungu swarané bayi lagi ngguyu. Awaké dhéwé ya seneng nèk disayang karo keluarga. Meskipun ora butuh kuwi kabèh bèn isa tetep urip, tapi kuwi isa nggawé awaké dhéwé luwih bahagia.

Merga sayang, Yéhuwah ngundang awaké dhéwé kanggo ndonga. Ing Alkitab disebutké, ”Aja nguwatirké apa waé. Tapi, ing kabèh keadaan, kowé kudu terus ndonga njaluk tuntunané Gusti Allah lan terus ngucap syukur.” Yéhuwah péngin awaké dhéwé nyritakké kabèh sing dikuwatirké. Terus, Yéhuwah bakal ngekèki ”rasa ayem sing ora isa dipahami manungsa”.​—Filipi 4:6, 7.

Awaké dhéwé wis ngrembug papat sifat utamané Yéhuwah, yaiku kuwasa, kawicaksanan, keadilan, lan katresnan. Awaké dhéwé dadi isa luwih kenal karo Yéhuwah. Saiki, ayo ngrembug apa sing wis dilakukan lan sing bakal dilakukan Yéhuwah kanggo awaké dhéwé. Nèk ngerti soal kuwi, awaké dhéwé bakal luwih ngajèni Yéhuwah.