Wektu kenalan karo wong, sing pertama kali ditakonké mesthi jenengé. Nèk péngin kenal karo Gusti Allah, awaké dhéwé ya kudu ngerti jenengé. Sapa jenengé Gusti Allah?

”Aku Yéhuwah, kuwi jeneng-Ku.”​—Yésaya 42:8.

Gusti Allah nganggep penting jenengé. Gusti Allah dhéwé sing milih jeneng kuwi. Yéhuwah kandha, ”Iki jeneng-Ku nganti saklawasé, lan nganggo jeneng kuwi Aku bakal dikenal kabèh wong nganti turun-temurun.” (Pangentasan 3:15) Ing Alkitab, jeneng Yéhuwah ditulis luwih akèh timbang gelaré, misalé Sing Mahakuwasa, Bapak, lan Gusti Allah. Jeneng Yéhuwah ya disebutké luwih akèh timbang jeneng-jeneng liyané kaya Abraham, Musa, Daud, utawa Yésus. Yéhuwah mémang péngin manungsa ngerti soal jenengé kuwi. Ing Alkitab disebutké, ”Muga-muga wong-wong ngerti nèk mung Njenengan sing Mahaluhur ing bumi, sing jenengé Yéhuwah.”​—Mazmur 83:18.

Jenengé Gusti Allah penting kanggo Yésus. Ing Doa Bapa Kami, Yésus mulang para muridé kanggo ndonga, ”Muga-muga jeneng-Mu disucèkké.” (Matius 6:9) Yésus dhéwé ya ndonga, ”Bapak, muga-muga jeneng-Mu diluhurké.” (Yohanes 12:28) Ngluhurké jenengé Gusti Allah kuwi penting banget kanggo Yésus. Mula, dhèwèké ndonga, ”Aku wis nduduhké jeneng-Mu marang wong-wong kuwi lan aku ya bakal terus nindakké kuwi.”​—Yohanes 17:26.

Jenengé Gusti Allah penting kanggo umaté. Umaté Gusti Allah jaman mbiyèn ngerti nèk meréka isa slamet lan dilindhungi nèk kenal lan ngajèni jenengé Gusti Allah. Ing Alkitab disebutké,  ”Jeneng Yéhuwah kuwi kaya bèntèng sing kuwat. Wong sing bener mlayu mrono bèn isa dilindhungi.” (Wulang Bebasan 18:10) Ing Alkitab ya disebutké, ”Kabèh wong sing nyebut jeneng Yéhuwah bakal dislametké.” (Yoèl 2:32) Menurut Alkitab, wong-wong sing bener-bener nyembah Gusti Allah bakal nggunakké jenengé Gusti Allah, yaiku Yéhuwah. Ing Alkitab disebutké, ”Kabèh bangsa bakal manut karo allahé dhéwé-dhéwé, ning awaké dhéwé bakal manut karo Yéhuwah, Gusti Allahé awaké dhéwé, nganti saklawasé.”​—Mikha 4:5; Kisah 15:14.

Bèn isa kenal karo Gusti Allah. Yéhuwah ngandhani Musa soal arti jeneng Yéhuwah. Artiné ”Aku Bakal Dadi Apa Waé sing Tak Péngini”. (Pangentasan 3:14) Menurut para ahli, jeneng Yéhuwah ya isa berarti ”Sing Nyebabké Dadi”. Mula, jeneng Yéhuwah ora mung nduduhké nèk Dhèwèké kuwi Pencipta, tapi ya nduduhké nèk Yéhuwah isa dadi apa waé bèn karepé kelakon lan Dhèwèké ya isa nggawé ciptaané nglakoni apa waé bèn karepé kelakon. Saka gelar-gelaré, awaké dhéwé isa ngerti nèk kuwasa lan wewenangé Yéhuwah gedhé banget. Tapi, nèk ngerti jenengé Gusti Allah kuwi Yéhuwah, awaké dhéwé isa luwih kenal karo Dhèwèké.

Dadi ngerti nèk Gusti Allah perduli karo manungsa. Arti jeneng Yéhuwah nduduhké nèk mung Gusti Allah sing isa nggawé kabèh ciptaané tetep ana. Iki dadi bukti nèk Yéhuwah perduli karo manungsa. Yéhuwah ya péngin manungsa isa kenal karo Dhèwèké merga Yéhuwah wis luwih dhisik ngandhani jenengé sakdurungé awaké dhéwé takon. Dadi, Yéhuwah péngin awaké dhéwé nganggep Dhèwèké kuwi ana tenan bèn awaké dhéwé isa akrab karo Dhèwèké.​—Mazmur 73:28.

Bèn isa akrab karo Gusti Allah. Wong-wong mesthi péngin diceluk nganggo jenengé. Nah, nèk misalé ana sing ora gelem nyeluk jenengé awaké dhéwé, mesthi dadi mikir nèk wong kuwi ora gelem akrab karo awaké dhéwé, ta? Gusti Allah ya wis ngandhani soal jenengé lan péngin awaké dhéwé nggunakké kuwi. Nèk nggunakké jeneng Yéhuwah, awaké dhéwé nduduhké nèk péngin akrab karo Yéhuwah. Yéhuwah nggatèkké wong sing ”mikirké” utawa ”ngajèni jenengé”.​—Maléakhi 3:16, cathetan ngisor.

Bèn isa kenal karo Gusti Allah, kudu ngerti jenengé. Tapi, bèn isa luwih akrab karo Gusti Allah, awaké dhéwé ya kudu ngerti sifat-sifaté.