1, 2. (a) Rasa ayem apa sing isa kita rasakké saiki? (b) Apa sebabé kahanan ing bumi durung ayem tentrem? (Deloken gambar ing ndhuwur.)

KITA kabèh péngin urip ayem tentrem lan bébas saka rasa kuwatir. Kita maturnuwun banget marang Yéhuwah merga wis maringi ”tentrem-rahayu kang saka ing Gusti Allah”, sing isa mbantu kita mbuwang pikiran lan perasaan sing èlèk. (Fp. 4:6, 7) Merga wis janji ngabdi marang Yéhuwah, kita uga isa ”rukun karo Gusti Allah”. Kuwi tegesé nduwé hubungan sing akrab karo Yéhuwah.​—Rm. 5:1.

² Ning, saiki Yéhuwah durung nggawé kahanan ing bumi dadi ayem tentrem. Kita isih urip ing dina-dina pungkasan, mula ana akèh masalah lan wong-wong jahat sing isa nggawé kuwatir. (2 Tm. 3:1-4) Kita uga kudu nglawan Sétan lan ajarané. (2 Kr. 10:4, 5) Ning, masalah sing paling gedhé kuwi biasané tentangan saka keluarga sing ora seiman. Isa waé wong-wong kuwi ngècè agamané awaké  dhéwé utawa nudhuh nèk kita nggawé keluarga dadi ora rukun. Lan isa waé ngancem kita ora diakoni dadi keluarga manèh nèk terus ngabdi marang Yéhuwah. Dadi, piyé kuduné pandhangan kita bab tentangan saka keluarga? Lan piyé kita isa tetep rukun wektu ngalami kahanan kaya ngono?

3, 4. (a) Apa sing isa waé dialami karo para muridé Yésus? (b) Kahanan apa sing kususé angèl diadhepi karo para muridé Yésus?

³ Yésus ngerti nèk ora kabèh wong gelem nampa ajarané lan ana sing bakal nentang para muridé. Mula, para muridé kudu kendel. Kadhang kala, tentangan kuwi asalé saka anggota keluarga, mula kuwi isa nggawé kahanan ing keluarga dadi ora rukun. Yésus kandha, ’Kowé aja padha ngira, yèn tekaku nggawa pirukun ana ing bumi. Tekaku iku ora nggawa pirukun nanging pedhang. Sabab tekaku iku njalari wong crah karo bapakné, anak wadon karo embokné; mantu wadon karo embokné maratuwa, lan wong bakal dimungsuh déning wong-wong kang nunggal saomah kabèh.’​—Mt. 10:34-36.

⁴ Apa maksudé Yésus wektu kandha ’Kowé aja padha ngira, yèn tekaku nggawa pirukun’? Yésus péngin wong-wong ngerti apa sing bakal dialami nèk dadi muridé. Tujuané Yésus sakjané kanggo mulangké ajaran sing bener bab Gusti Allah dudu kanggo nggawé keluarga dadi ora rukun. (Yo. 18:37) Ning, para muridé Yésus perlu ngerti nèk dadi muridé kuwi ora mesthi gampang, kususé nèk nduwé kanca utawa keluarga sing ora seiman.

5. Apa sing wis dialami para muridé Yésus?

⁵ Yésus kandha nèk salah siji tentangan sing kudu diadhepi karo para muridé yaiku tentangan saka keluarga. (Mt. 10:38) Jaman mbiyèn, para muridé Yésus tetep setya senajan diécé utawa malah ora diakoni dadi keluarga manèh. Ning, wong-wong kuwi malah éntuk berkah luwih akèh timbang apa sing wis dikurbanké.​—Wacanen Markus 10:29, 30.

6. Apa sing kudu diéling-éling nèk ana tentangan saka keluarga?

⁶ Kita isih tetep nresnani keluarga senajan ditentang merga ngibadah marang Yéhuwah. Ning, kita kudu éling nèk katresnan kita marang Yéhuwah lan Yésus kudu luwih gedhé timbang katresnan marang wong liya. (Mt. 10:37) Sétan uga isa nggunakké rasa tresna marang keluarga bèn kita ora setya manèh marang Yéhuwah. Ayo dirembug conto-conto tentangan saka keluarga lan piyé carané bèn kita isa tetep setya.

7. Apa sing kudu panjenengan tindakké nèk nduwé bojo sing ora seiman?

⁷ Alkitab kandha nèk wong sing bebojoan kuwi ”bakal nandhang kasusahan” utawa masalah. (1 Kr. 7:28) Nèk panjenengan nduwé bojo sing ora seiman, kuwi isa waé nambahi strès lan rasa kuwatir. Ning, panjenengan kudu nduwé pandhangan sing padha karo Yéhuwah ing bab iki. Yéhuwah ngendika nèk kita ora éntuk pisahan utawa pegatan mung  merga nduwé bojo sing ora seiman. (1 Kr. 7:12-16) Nèk ana sedulur wédok sing nduwé bojo ora seiman lan bojoné kuwi ora ngarahké kanggo ngibadah marang Yéhuwah, sedulur kuwi isih kudu ngajèni bojoné dadi kepala keluarga. Lan nèk ana sedulur lanang sing nduwé bojo ora seiman, sedulur kuwi kudu tetep sayang lan nresnani bojoné.—Éf. 5:22, 23, 28, 29.

8. Pitakonan apa waé sing isa dipikirké nèk nduwé bojo sing mbatesi kanggo ngibadah?

⁸ Apa sing kudu ditindakké nèk bojoné panjenengan mbatesi kanggo ngibadah? Contoné, ana sedulur wédok sing bojoné ngéntukké dhèwèké nginjil mung ing dina-dina sing ditemtokké. Nèk panjenengan ngalami kahanan sing padha, coba dipikir: ’Apa pancèn bojoku kuwi nglarang aku kanggo ngibadah? Nèk ora, apa aku isih isa nuruti apa sing dikarepké bojoku?’ Nèk panjenengan isa seimbang, kuwi isa ngurangi masalah ing urip bebojoan.​—Fp. 4:5.

9. Piyé carané wong Kristen isa ndhidhik anaké kanggo ngajèni wong tuwané sing ora seiman?

⁹ Nèk nduwé bojo sing ora seiman, isa luwih angèl kanggo ndhidhik bocah-bocah. Contoné, panjenengan perlu mulang bocah-bocah bèn manut karo préntahé Alkitab, ”Sira ngajènana bapa-biyungira.” (Éf. 6:1-3) Ning, piyé nèk bojoné panjenengan ora nindakké pathokané Alkitab? Panjenengan kudu tetep ngajèni sarta nggolèki lan ngalem sipat-sipat apiké. Aja ngèlèk-ngèlèk bojoné panjenengan ing ngarepé bocah-bocah. Terangna marang bocah-bocah nèk saben wong kudu milih arep ngabdi marang Yéhuwah apa ora. Nèk bocah-bocah didhidhik kanggo ngajèni wong tuwané sing ora seiman, tumindaké bocah-bocah kuwi isa waé nggawé bojoné panjenengan péngin sinau bab Yéhuwah.

10. Piyé carané wong tuwa Kristen isa mbantu anaké bèn nresnani Yéhuwah?

¹⁰ Mbokmenawa ana bojo sing ora seiman sing péngin bèn anaké ngrayakké  hari raya kafir utawa diwulang ajarané agama palsu. Ana uga sedulur wédok sing bojoné ora seiman lan nglarang dhèwèké mulangké Alkitab marang anaké. Senajan ngono, sedulur wédok mau tetep isa ngupaya sak isa-isané kanggo mulangké Alkitab marang anaké. (PR. 16:1; 2 Tm. 3:14, 15) Contoné, ana sedulur wédok sing dilarang bojoné kanggo mimpin sinau Alkitab lan ngajak anak-anaké menyang pakumpulan ibadah. Sedulur wédok mau isih isa tetep mulang anaké kapan waé lan tetep ngajèni keputusané bojoné. Kuwi isa mbantu anak-anaké sinau bab Yéhuwah lan pathokané. (PR. 4:19, 20) Ning, bocah kuwi dhéwé sing kudu mutuské arep ngabdi marang Yéhuwah apa ora. * (Deloken katrangan ing ngisor.)—PT. 30:19, 20.

11. Apa sing isa nyebabké keluarga panjenengan ora seneng?

¹¹ Wektu sepisanan sinau Alkitab karo Seksi-Seksi Yéhuwah, isa waé kita durung kandha karo keluarga. Ning, wektu iman kita marang Yéhuwah saya kuwat, kita ngerti nèk kudu kandha karo keluarga. (Mk. 8:38) Tékad panjenengan kanggo ngabdi marang Yéhuwah kuwi isa waé nyebabké keluarga ora seneng. Ayo dirembug cara-cara sing isa ditindakké bèn panjenengan isa tetep setya marang Yéhuwah lan tetep rukun karo keluarga.

12. Apa sebabé keluarga kita isa waé nentang, ning piyé carané kita isa nduduhké nèk perduli karo pandhangané?

¹² Ngupaya kanggo ngertèni pandhangané keluarga. Kita mesthi seneng banget wektu ngerti wulangan sing bener saka Alkitab. Ning, mbokmenawa keluarga kita nganggep nèk kita wis diapusi utawa gabung karo agama sing sesat. Ana uga sing ngrasa nèk kita wis ora nresnani keluarga manèh merga ora gelem bareng-bareng ngrayakké hari raya. Malah, ana sing wedi nèk Gusti Allah bakal ngukum sakwisé kita mati. Kita kudu ngupaya kanggo ngertèni pandhangané lan ngrungokké apa sing sakjané dikuwatirké bab kita. (WB. 20:5) Rasul Paulus ngupaya kanggo ngertèni kabèh wong bèn isa mulangké Alkitab. Semono uga, nèk ngupaya kanggo ngertèni pandhangané keluarga, kita isa ngerti carané mbantu keluarga kita kanggo sinau Alkitab.​—1 Kr. 9:19-23.

13. Piyé kuduné carané kita ngomong karo keluarga sing ora seiman?

¹³ Ngomong sing apik. Alkitab kandha, ”Calathumu sing tansah kebak katresnan.” (Kl. 4:6) Mbokmenawa iki  ora gampang. Mula, kita perlu njaluk bantuan roh suciné Yéhuwah bèn isa ngomong sing apik karo keluarga. Kita ora perlu padu karo keluarga bab kapercayané sing salah. Nèk ana tumindak utawa omongané sing nglarani ati, kita isa niru para rasul. Paulus kandha, ”Yèn aku dipoyoki, aku padha mujèkaké becik; yèn aku dikuya-kuya, aku padha sabar; yèn aku dipitenah, aku padha males sumèh [”njawab nganggo cara sing apik”, Terjemahan Dunia Baru.]”—1 Kr. 4:12, 13.

14. Apa waé paédahé nèk tumindaké kita apik?

¹⁴ Tumindak sing apik. Senajan ngomong nganggo cara sing apik kuwi isa mbantu kita rukun karo keluarga, tumindak sing apik isa luwih gedhé pengaruhé. (Wacanen 1 Pétrus 3:1, 2, 16.) Duduhna marang keluarga panjenengan nèk Seksi-Seksi Yéhuwah kuwi manut karo pathokané Alkitab, urip bebojoané rukun, isa ndhidhik anak-anaké, lan ngrasakké urip sing ayem tentrem. Senajan keluarga kita ora gelem dadi abdiné Yéhuwah, kita isa tetep bungah merga ngerti nèk tumindak kita sing apik isa nyenengké Yéhuwah.

15. Piyé kita isa nggawé rencana dhisik bèn ora nganti padu karo keluarga?

¹⁵ Nggawé rencana dhisik. Pikirna kahanan apa waé sing isa nggawé kita padu karo keluarga, banjur nggawéa rencana piyé carané ngadhepi. (WB. 12:16, 23) Kuwi sing ditindakké karo sedulur wédok saka Australia. Bapak maratuwané gething banget karo Seksi Yéhuwah lan kadhang kala nganti ngamuk. Mula, sakdurungé télpon maratuwané, sedulur wédok kuwi lan bojoné ndonga njaluk bantuané Yéhuwah bèn isa njawab nganggo cara sing apik. Wong loro kuwi uga nggolèk topik sing nyenengké lan mbatesi sepira suwéné nélpon, merga nèk nélponé kesuwèn omongané biasané ngarah ing bab agama lan marahi padu.

16. Piyé carané bèn panjenengan ora rumangsa salah merga nduwé pandhangan sing béda karo keluarga?

¹⁶ Pancèn, kita isih isa nduwé pandhangan sing béda karo keluarga sing ora seiman. Kuwi isa waé nggawé kita dadi rumangsa salah merga kita nresnani lan péngin nyenengké keluarga. Ning, élinga nèk katresnan kita marang Yéhuwah kudu luwih gedhé timbang katresnan marang keluarga. Kuwi isa mbantu keluarga kita ngerti nèk ngabdi marang Yéhuwah kuwi bab sing paling penting kanggo kita. Kita ora isa meksa wong liya ngabdi marang Yéhuwah. Ning, kita isa nduduhké paédahé nèk manut marang Yéhuwah. Yéhuwah maringi kesempatan kanggo ngabdi kuwi ora mung kanggo kita, ning uga kanggo keluarga kita.​—Yé. 48:17, 18.

17, 18. Apa sing isa ditindakké wektu ana anggota keluarga sing ninggalké Yéhuwah?

¹⁷ Pancèn sedhih banget nèk ana anggota keluarga sing dipecat utawa nyangkal imané. Rasané lara banget kaya ditusuk pedhang. Apa sing isa panjenengan tindakké bèn tetep tabah?

¹⁸ Terus ngabdi marang Yéhuwah. Nèk ngalami kaya ngono, panjenengan kudu nguwatké iman. Carané yaiku ajeg maca Alkitab, nginjil, ndonga, ngibadah, lan persiapan kanggo pakumpulan ibadah. (Yd. 20, 21) Piyé nèk kuwi wis ditindakké ning isih tetep sedhih? Aja nyerah. Terusa ngabdi marang Yéhuwah. Kuwi isa mbantu panjenengan ngendhalèni pikiran lan perasaan. Sing nulis Jabur 73 uga tau ngalami kaya ngono. Dhèwèké tau ngrasakké angèlé ngendhalèni pikiran lan perasaané. Ning, merga tetep ajeg ngibadah, dhèwèké isa nduwé cara mikir sing bener manèh. (Ms. 73:16, 17) Semono uga, nèk ajeg ngibadah, panjenengan uga isa ngrasakké sing padha.

19. Apa buktiné nèk panjenengan ngajèni disiplin saka Yéhuwah kanggo umaté?

¹⁹ Ngajèni disiplin saka Yéhuwah. Yéhuwah ngerti nèk disiplin kuwi isa maédahi kanggo kabèh, klebu sing dipecat. Senajan angèl diadhepi, kuwi isa mbantu wong sing dipecat bèn mertobat. (Wacanen Ibrani 12:11.) Kita kudu ngajèni arahané Yéhuwah supaya ”aja nganti srawung” karo wong sing dipecat. (1 Kr. 5:11-13) Kuwi pancèn ora gampang. Ning, kita kudu ngupaya aja nganti srawung karo wong kuwi liwat télpon, SMS, surat, e-mail, utawa média sosial.

20. Apa sing kuduné terus kita arep-arep?

²⁰ Terus ngarep-arep. Katresnan kuwi ”ngarep-arep samubarang”, mula kita terus ngarep-arep wong sing kita tresnani bèn isa mertobat. (1 Kr. 13:7) Nèk ndelok ana bukti-bukti sing nduduhké nèk wong kuwi wis mertobat, panjenengan isa ndongakké wong kuwi bèn isa éntuk kekuwatan saka Alkitab lan nampa undangané Yéhuwah, ”Sira balia marang Ingsun.”​—Yé. 44:22.

21. Apa sing kuduné ditindakké nèk panjenengan ditentang keluarga merga dadi muridé Yésus?

²¹ Yésus kandha nèk katresnan kita marang dhèwèké kuwi kudu luwih gedhé timbang marang manungsa. Lan Yésus yakin nèk para muridé isa nindakké kuwi senajan ditentang karo keluarga. Mula, nèk panjenengan ditentang keluarga merga dadi muridé Yésus, terusa ngendelké Yéhuwah lan nyuwun bantuané bèn isa tetep setya. (Yé. 41:10, 13) Panjenengan isa ngrasakké bungah merga ngerti nèk Yéhuwah lan Yésus bakal mberkahi upayané panjenengan.