1-2. (a) Nurut Éfésus 6:16, apa sebabé awaké dhéwé perlu nduwé ”tamèng gedhé yaiku iman”? (b) Apa sing bakal dirembug ing artikel iki?

AWAKÉ DHÉWÉ nduwé ”tamèng gedhé yaiku iman”. (Wacanen Éfésus 6:16.) Kaya tamèng gedhé sing isa nglindhungi badané prajurit, iman ya isa nglindhungi awaké dhéwé bèn ora kena pengaruh saka wong-wong sing bejat, kejem, lan ora manut karo pathokané Yéhuwah.

² Merga urip ing ”dina-dina pungkasan”, imané awaké dhéwé bakal terus diuji. (2 Tim. 3:1) Ing artikel iki, awaké dhéwé bakal ngrembug apa sing perlu ditindakké kanggo mastèkké lan njaga imané awaké dhéwé tetep kuwat.

3. Tamèngé prajurit biasané kudu diapakké, lan apa sebabé?

³ Tamèngé prajurit ing jaman mbiyèn biasané dilapisi kulit. Prajurit kudu ngolèsi tamèngé nganggo minyak bèn lapisan kulité tamèng isa awèt lan bagéan logamé ora karaten. Nèk rusak, tamèngé ya kudu didandani bèn isa siap digunakké wektu perang.

4. Apa sebabé awaké dhéwé kudu terus mastèkké lan njaga iman tetep kuwat, lan piyé carané?

⁴ Kaya prajurit ing jaman mbiyèn, awaké dhéwé ya kudu siap kanggo perang, yaiku perang nglawan roh-roh jahat lan apa waé sing isa nggawé awaké dhéwé dadi adoh saka Yéhuwah. Mula, awaké dhéwé kudu terus mastèkké lan njaga imané awaké dhéwé tetep kuwat. (Éf. 6:10-12) Piyé carané bèn awaké dhéwé isa siap wektu ngadhepi tantangan? Awaké dhéwé kudu ndonga njaluk bantuané Yéhuwah.  Awaké dhéwé ya kudu maca Alkitab bèn isa ngerti apa waé sing perlu ditindakké kanggo nyenengké Yéhuwah. (Ibr. 4:12) Alkitab kandha, ”Kumandela [utawa, percayaa] marang Pangéran Yéhuwah klawan gumolonging atimu, lan aja suméndhé marang pangretènmu dhéwé.” (WB. 3:5, 6) Dadi, awaké dhéwé isa mikirké manèh apa sing wis awaké dhéwé tindakké. Contoné, mungkin awaké dhéwé lagi ngadhepi masalah keuangan. Apa awaké dhéwé yakin karo janjiné Yéhuwah sing dicathet ing Ibrani 13:5? Ing ayat kuwi, Yéhuwah kandha, ”Aku babar blas ora bakal ninggalké kowé, lan Aku babar blas ora bakal ngejarké kowé.” Apa awaké dhéwé yakin nèk Yéhuwah mesthi bakal mbantu? Nèk jawabané iya, kuwi mbuktèkké nèk imané awaké dhéwé tetep kuwat.

5. Kenapa awaké dhéwé kudu mikirké manèh apa sing wis awaké dhéwé tindakké?

⁵ Kenapa awaké dhéwé kudu mikirké manèh apa sing wis awaké dhéwé tindakké? Isa waé imané awaké dhéwé wis ora kuwat kaya mbiyèné, mungkin merga awaké dhéwé terlalu kuwatir, kena pengaruh saka katrangan-katrangan sing palsu, utawa ngrasa cilik ati. Lha terus, apa sing kudu awaké dhéwé tindakké kanggo njaga iman tetep kuwat?

6. Terangna apa sebabé nduwé rasa kuwatir kuwi ora mesthi salah.

⁶ Nduwé rasa kuwatir kuwi ora mesthi salah. Misalé, awaké dhéwé perlu nguwatirké soal carané nyenengké Yéhuwah lan Yésus. (1 Kor. 7:32) Nèk wis nindakké dosa, awaké dhéwé mesthi ya kuwatir merga péngin nduwé hubungan sing apik manèh karo Yéhuwah. (Ms. 38:19) Wong sing wis nduwé bojo ya isa kuwatir merga péngin nyenengké bojoné. Terus, awaké dhéwé mungkin ya nguwatirké soal carané ngopèni keluarga utawa nulungi sedulur seiman.​—1 Kor. 7:33; 2 Kor. 11:28.

7. Nurut Wulang Bebasan 29:25, apa sebabé awaké dhéwé ora perlu wedi karo manungsa?

⁷ Ning, imané awaké dhéwé isa dadi ora kuwat manèh nèk awaké dhéwé terlalu kuwatir. Contoné, awaké dhéwé mungkin terus-terusan kuwatir soal panganan lan pakaian. (Mat. 6:31, 32) Akhiré, awaké dhéwé dadi luwih ngutamakké bandha lan péngin nggolèk dhuwit sing luwih akèh manèh. Akibaté, imané awaké dhéwé dadi ora kuwat lan awaké dhéwé dadi ora cedhak manèh karo Yéhuwah. (Mrk. 4:19; 1 Tim. 6:10) Sakliyané kuwi, awaké dhéwé mungkin terus-terusan kuwatir soal pandhangané wong liya marang awaké dhéwé. Awaké dhéwé mungkin wedi diécé utawa dianiaya karo wong liya. Akhiré, awaké dhéwé dadi nindakké apa sing ora nyenengké Yéhuwah. Dadi, awaké dhéwé kudu piyé? Awaké dhéwé kudu njaluk bantuané Yéhuwah bèn isa nduwé iman lan tetep kendel wektu ngadhepi tantangan.​—Wacanen Wulang Bebasan 29:25; Luk. 17:5.

8. Awaké dhéwé kudu piyé nèk ana sing ngomongké katrangan sing palsu?

⁸ Sétan kuwi ”bapaké wong-wong sing seneng ngapusi”. Dhèwèké mengaruhi wong-wong kanggo nyebarké katrangan-katrangan sing palsu soal Yéhuwah lan sedulur-sedulur seiman. (Yoh. 8:44) Contoné, akèh wong murtad sing nyebarké katrangan palsu soal organisasiné Yéhuwah liwat Internèt, TV, utawa média liyané. Katrangan-katrangan palsu kuwi isa dipadhakké kaya ”panah geni” saka Sétan. (Éf. 6:16) Nèk ana sing ngomongké katrangan sing palsu, aja nganti awaké dhéwé gelem ngrungokké kuwi. Kenapa? Merga awaké dhéwé percaya karo Yéhuwah lan para sedulur. Awaké dhéwé kudu  bener-bener ngedohi wong-wong murtad. Awaké dhéwé aja nganti gelem dijak debat lan ora perlu péngin ngerti soal wong-wong murtad.

9. Apa akibaté nèk awaké dhéwé cilik ati?

⁹ Imané awaké dhéwé ya isa dadi ora kuwat manèh nèk awaké dhéwé cilik ati. Mungkin awaké dhéwé cilik ati merga nduwé masalah. Awaké dhéwé mesthi mikirké soal carané ngrampungi masalah kuwi. Ning, nèk awaké dhéwé terus-terusan mikirké kuwi, awaké dhéwé dadi isa lali karo harapan sing wis dijanjèkké karo Yéhuwah. (Why. 21:3, 4) Akhiré, awaké dhéwé dadi ora semangat lan péngin mandheg ngabdi. (WB. 24:10) Apa sing isa awaké dhéwé tindakké?

10. Apa sing isa awaké dhéwé sinaoni saka pengalamané salah siji sedulur wédok?

¹⁰ Gatèkna pengalamané sedulur wédok ing Amerika Serikat. Dhèwèké kudu ngrawat bojoné sing lagi lara parah. Dhèwèké nulis surat menyang kantor pusat lan kandha, ”Kadhang kala, aku lan bojoku ngrasa sedhih banget lan cilik ati. Ning, aku lan bojoku nduwé harapan. Aku bersyukur merga Yéhuwah wis nyedhiakké naséhat-naséhat sing isa nguwatké imanku lan bojoku. Kuwi nggawé aku lan bojoku dadi isa tetep tekun ngadhepi masalah-masalah sing digunakké Sétan kanggo nyerang aku.” Kaya sedulur wédok kuwi, awaké dhéwé ya isa ngatasi perasaan cilik ati. Masalah-masalah sing lagi awaké dhéwé adhepi kuwi kaya serangan saka Sétan. Ning, awaké dhéwé isa yakin nèk Yéhuwah mesthi bakal nguwatké. Awaké dhéwé ya kudu nggunakké kabèh katrangan saka Alkitab sing wis Yéhuwah sedhiakké kanggo nguwatké imané awaké dhéwé.

11. Pitakonan-pitakonan apa waé sing isa awaké dhéwé pikirké?

¹¹ Kanggo mastèkké apa imané awaké dhéwé isih tetep kuwat, awaké dhéwé isa mikirké pitakonan-pitakonan iki: Apa aku kadhang kala isih terlalu kuwatir? Apa aku kegodha kanggo ngrungokké katrangan palsu sing disebarké karo wong-wong murtad utawa gelem dijak debat karo wong-wong kuwi? Apa aku isih ngrasa cilik ati? Nèk jawabané ora, kuwi artiné imané awaké dhéwé isih tetep kuwat.  Ning, awaké dhéwé kudu terus waspada merga Sétan ya isih nduwé senjata liya kanggo nyerang imané awaké dhéwé.

12. Apa akibaté nèk awaké dhéwé luwih ngutamakké bandha?

¹² Nèk awaké dhéwé luwih ngutamakké bandha, imané awaké dhéwé isa dadi ora kuwat manèh. Rasul Paulus kandha, ”Wong sing dadi prajurit ora mèlu nindakké urusan bisnis, merga dhèwèké péngin nyenengké wong sing nglebokké dhèwèké dadi prajurit.” (2 Tim. 2:4) Wong sing dadi prajurit Romawi ora diijinké kanggo nindakké urusan bisnis. Piyé nèk ana sing ora manut karo peraturan kuwi?

13. Kenapa prajurit Romawi ora éntuk nindakké urusan bisnis?

¹³ Bayangna nèk ana prajurit sing ora manut karo peraturan kuwi. Wektu prajurit liyané lagi latihan ésuk-ésuk, prajurit sing ora manut kuwi mungkin lagi dodolan panganan ing pasar. Wektu prajurit liyané lagi nyiapké peralatan perangé lan ngasah pedhangé, prajurit mau mungkin malah lagi nyiapké barang dagangan. Ésuké, pas ana mungsuh sing nyerang, prajurit endi sing luwih siap lan isa nindakké arahan saka pemimpiné? Nèk njenengan mèlu perang kuwi, njenengan pilih ana ing cedhaké prajurit sing endi? Sing wis siap perang utawa sing ora manut karo peraturan mau?

14. Awaké dhéwé kuduné luwih ngutamakké apa?

¹⁴ Awaké dhéwé kudu niru prajurit sing manut. Dadi, awaké dhéwé kudu siap nindakké arahan saka Pemimpiné awaké dhéwé, yaiku Yéhuwah lan Yésus. Awaké dhéwé mesthiné luwih péngin nyenengké Yéhuwah lan Yésus ketimbang ngutamakké bandha. Awaké dhéwé kudu nggunakké wektu lan tenaga khususé kanggo ngabdi marang Yéhuwah. Awaké dhéwé ya kudu mastèkké tamèng imané awaké dhéwé lan perlengkapan perang liyané tetep kuwat lan siap digunakké.

15. Rasul Paulus ngandhani soal apa, lan apa sebabé?

¹⁵ Awaké dhéwé kudu terus waspada. Kenapa? Rasul Paulus ngandhani nèk wong-wong  sing ”nduwé tékad kanggo dadi sugih” isa ”ninggalké iman”. (1 Tim. 6:9, 10) Dadi, nèk awaké dhéwé péngin nduwèni barang-barang sing sakjané ora dibutuhké, awaké dhéwé isa dadi ora fokus manèh. Awaké dhéwé dadi nduwé kepénginan sing ”tanpa guna lan nggawé rugi”. Awaké dhéwé kudu waspada merga kepénginan kuwi isa digunakké Sétan kanggo nggawé imané awaké dhéwé dadi ora kuwat manèh lan akhiré awaké dhéwé isa ”ninggalké iman”.

16. Karo mikirké crita ing Markus 10:17-22, pitakonan-pitakonan apa waé sing kudu awaké dhéwé pikirké?

¹⁶ Mungkin awaké dhéwé nduwé dhuwit kanggo tuku akèh barang. Apa salah nèk awaké dhéwé péngin tuku barang sing ora pati dibutuhké? Ora mesthi. Ning, pikirna pitakonan-pitakonan iki: Nèk awaké dhéwé pancèn nduwé dhuwit kanggo tuku barang kuwi, apa awaké dhéwé bener-bener nduwé wektu lan tenaga kanggo ngopèni? Apa awaké dhéwé dadi nganggep nèk barang kuwi penting banget? Apa barang kuwi nggawé awaké dhéwé dadi kaya wong lanang sing nolak undangané Yésus lan ora gelem tumindak luwih akèh kanggo ngabdi marang Yéhuwah? (Wacanen Markus 10:17-22.) Mesthi luwih apik nèk awaké dhéwé tetep urip sederhana bèn isa nggunakké wektu lan tenagané awaké dhéwé kanggo ngabdi marang Yéhuwah.

17. Awaké dhéwé kudu terus éling soal apa?

¹⁷ Awaké dhéwé kudu terus éling nèk Sétan bakal terus nyerang lan awaké dhéwé kudu siap perang. (Why. 12:17) Awaké dhéwé nduwé tanggung jawab kanggo njaga tamèng imané awaké dhéwé tetep kuwat. Kuwi kudu ditindakké dhéwé, ora isa njaluk tulung sedulur liya.

18. Apa sebabé para prajurit ing jaman mbiyèn terus nyekeli tamèngé kenceng-kenceng wektu perang?

¹⁸ Jaman mbiyèn, prajurit sing menang perang bakal diajèni banget. Ning, nèk dhèwèké mulih ora nggawa tamèngé, dhèwèké bakal ngrasa isin. Ahli sejarah Roma sing jenengé Tacitus kandha, ”Prajurit sing ora nggawa tamèngé mulih kuwi ngisin-isini banget.” Mula, para prajurit mesthi bakal terus nyekeli tamèngé kenceng-kenceng wektu perang.

19. Piyé carané nyekeli tamèng iman kenceng-kenceng?

¹⁹ Awaké dhéwé ya kudu nyekeli tamèng imané awaké dhéwé kenceng-kenceng. Carané yaiku ajeg berhimpun lan ngandhani wong-wong bèn padha ngerti soal jenengé Yéhuwah lan Kratoné. (Ibr. 10:23-25) Sakliyané kuwi, awaké dhéwé ya kudu maca Alkitab saben dina lan ndonga njaluk bantuané Yéhuwah bèn awaké dhéwé isa ngetrapké isiné Alkitab. (2 Tim. 3:16, 17) Nèk awaké dhéwé nindakké kuwi kabèh, awaké dhéwé tetep isa menang lan éntuk urip saklawasé senajan Sétan terus ngupaya kanggo nyerang awaké dhéwé. (Yé. 54:17) Awaké dhéwé nduwé ”tamèng gedhé yaiku iman” sing isa nglindhungi. Awaké dhéwé ya ora dhèwèkan merga ana sedulur-sedulur seiman sing ngadhepi perang sing padha. Awaké dhéwé isa menang nèk saben dina terus njaga iman tetep kuwat. Sukmbèn, awaké dhéwé ya isa dislametké wektu Yésus perang nglawan Sétan lan para pengikuté.​—Why. 17:14; 20:10.