Ing taun 2014, Hugo, sing umuré sepuluh taun, nampa penghargaan Diana Award saka lembaga kemanusiaan Inggris merga dhèwèké mbantu kanca-kanca sekolahé sing dinakali liyané.

Hugo kandha, ”Aku éntuk penghargaan iki merga vidhéo animasi papan tulis Ngadhepi Kanca sing Nakal lan Seneng Ngécé. Aku bisa dadi wakil saka program anti-bullying merga aku sinau saka vidhéo sing ana ing jw.org kuwi.”

Sing sepisanan, Hugo nduduhaké vidhéo kuwi marang guruné. Guruné seneng banget, mula ngatur supaya kabèh murid bisa mbukak situs jw.org. Saiki, akèh murid sing umuré wolu nganti sepuluh taun ing sekolahé Hugo sing ajeg mbukak jw.org. Vidhéo kuwi wis mbantu cah-cah kuwi wektu dinakali. Vidhéo kuwi uga mbantu njawab pitakonan-pitakonan kaya, Piyé carané bisa nduwé kanca sejati?

Ing sekolah liyané ing Inggris, Elijah, sing umuré wolung taun, dinakali kancané. Dhèwèké lan keluargané ngrembug vidhéo Ngadhepi Kanca sing Nakal lan Seneng Ngécé, lan latihan kudu njawab lan tumindak apa yèn ana sing nakali utawa ngécé. Iki nggawé Elijah saya kendel lan yakin ngadhepi masalah kuwi. Bar kuwi, wektu ana program anti-bullying, kepala sekolahé Elijah nduduhaké vidhéo kuwi marang kabèh murid.

Dinakali lan diécé kuwi wis dadi masalah sing umum diadhepi ing Inggris. Ning, sakjané masalah kuwi diadhepi ing endi-endi. Lan vidhéo animasi papan tulis iki wis mbantu cah-cah enom ing endi-endi.

Ing Amerika Serikat, Ivie, sing umuré sepuluh taun, wedi karo kanca sing senengané nakali dhèwèké. Sakwisé nonton vidhéo Ngadhepi Kanca sing Nakal lan Seneng Ngécé, Ivie dadi kendel ngadhepi kancané kuwi. Dhèwèké uga ngomong karo guruné, lan guruné mbantu dhèwèké. Kancané njaluk ngapura, lan saiki bisa kekancan apik karo Ivie.

Seksi-Seksi Yéhuwah perduli karo cah-cah enom. Mula, bakal terus nyedhiyakaké naséhat-naséhat sing bisa mbantu ngadhepi masalah saben dina, contoné yèn dinakali.