Ing acara Konferensi Perubahan Iklim Perserikatan Bangsa-Bangsa (COP21), sing dianakaké ing tanggal 30 November nganti 12 Desember 2015, perwakilan saka 195 negara rapat ing Paris, Prancis, kanggo ngrembug carané ngélongi akibat saka kagiyatané manungsa marang iklim sakdonya. Kira-kira 38.000 wong, klebu pamréntah, ilmuwan, pencinta lingkungan, lan pengusaha, teka ing konferénsi iki. Puluhan éwu wong liyané nekani bagéan informasi kanggo ngrungokaké katrangan bab perubahan iklim.

Senajan Seksi-Seksi Yéhuwah ora mèlu ing konferénsi kuwi, Seksi-Seksi Yéhuwah nggatèkaké lingkungan. Atusan Seksi-Seksi Yéhuwah nganakaké kampanye kusus kanggo mbagèkaké pangarep-arep saka Alkitab bab urip ing planèt sing bébas polusi.

Wektu numpak kendharaan umum, ana Seksi Yéhuwah omong-omongan karo wong lanang saka Peru sing nganggo pakaian tradhisional Peru. Wong kuwi kandha yèn senajan awaké séhat lan urip seneng ing gunung sing éndah, dhèwèké tetep nguwatiraké kahanan bumi sukmbèn. Dhèwèké seneng banget nampa kabar sing nyenengaké iki, lan mèsem amba wektu nampa kertu kontak sing ngarahaké menyang situsé Seksi-Seksi Yéhuwah, www.dan124.com.

Pas numpak sepur, rong Seksi-Seksi Yéhuwah omongan karo ilmuwan lingkungan saka Amerika. Dhèwèké kagèt wektu krungu yèn Seksi-Seksi Yéhuwah nganti ping pindho éntuk peringkat Four Green Globes saka the Green Building Initiative kanggo upayané ngrancang lan mbangun bangunan anyar sing ramah lingkungan, yaiku rong gedhung ing kantor cabang Seksi-Seksi Yéhuwah ing Amerika Serikat ing Wallkill, New York. Ilmuwan kuwi uga seneng banget nampa kertu kontak.

Merga nggumun karo tulusé Seksi-Seksi Yéhuwah nggatèkaké lingkungan, akèh sing janji arep ndelok situsé Seksi-Seksi Yéhuwah. Wektu perwakilan saka Kanada krungu yèn Seksi-Seksi Yéhuwah ngupaya nglindhungi dhaérah susuhé manuk eastern bluebird ing kantor pusaté Seksi-Seksi Yéhuwah sakdonya ing Warwick, New York, dhèwèké kandha, ”Sakdurungé ngurusi lingkungan, aku mbiyèn peneliti manuk. Aku ora ngerti yèn Seksi-Seksi Yéhuwah nggatèkaké tenanan uripé kéwan-kéwan. Aku bakal maca wacan-wacané, mbukak situs wèbé, lan sinau luwih akèh bab Seksi-Seksi Yéhuwah.”