საუკუნეების მანძილზე არავინ იცოდა, რა იყო ეპიდემიებისა თუ ინფექციური დაავადებების გავრცელების მიზეზი, რამაც მილიონობით ადამიანს სიცოცხლე მოუსწრაფა. საბოლოოდ მეცნიერებმა დაადგინეს ნამდვილი მიზეზი. მათ აღმოაჩინეს, რომ ხშირ შემთხვევაში დაავადებებს იწვევს ისეთი მიკროორგანიზმები, როგორიცაა ბაქტერია ან ვირუსი. მას შემდეგ, რაც მიაკვლიეს სიმართლეს, შესაძლებელი გახდა ინფექციური დაავადებების მკურნალობა და მათი პრევენცია. შედეგად, მილიარდობით ადამიანის ჯანმრთელობის მდგომარეობა გაუმჯობესდა და მათი სიცოცხლის ხანგრძლივობა გაიზარდა.

რა შეიძლება ითქვას ქვემოთ ჩამოთვლილ უმნიშვნელოვანეს კითხვებზე? შეიცვლება თქვენი ცხოვრება, თუ გეცოდინებათ ამ კითხვებზე ზუსტი პასუხები?

• ვინ არის ღმერთი?

• ვინ არის იესო ქრისტე?

• რა არის ღვთის სამეფო?

• რას გვიქადის მომავალი?

მილიონობით ადამიანმა იპოვა ამ კითხვებზე პასუხები, რამაც მათი ცხოვრება საგრძნობლად გააუმჯობესა. თუ ამ კითხვებზე ზუსტ პასუხებს გაიგებთ, ეს თქვენს ცხოვრებაზეც დადებითად აისახება.

ალბათ, თქვენც გაგჩენიათ კითხვა: საერთოდ შესაძლებელია ჭეშმარიტების გაგება? ერთი შეხედვით ისე ჩანს, რომ სიმართლის დადგენა უფრო და უფრო რთული ხდება. რა არის მიზეზი?

დღეს ბევრი არ ენდობა მთავრობებს, კომერციულ სისტემას თუ მედიასაშუალებებს, რადგან ხშირად უჭირთ, დაინახონ განსხვავება ფაქტებსა და პირად შეხედულებებს შორის, ნახევრად სიმართლესა და აშკარა სიცრუეს შორის, რასაც ისე წარმოაჩენენ, თითქოს სიმართლე იყოს. ასეთი დეზინფორმაციის ფონზე ხალხში უამრავი ურთიერთგამომრიცხავი აზრი არსებობს იმის თაობაზე, თუ რა არის სიმართლე.

და მაინც, უმნიშვნელოვანეს კითხვებზე ზუსტი პასუხების მიღება შესაძლებელია. ამისთვის საჭიროა, ისეთივე მეთოდს მიმართოთ, როგორსაც ყოველდღიურ ცხოვრებაში წამოჭრილ ნაკლებად მნიშვნელოვან კითხვებზე პასუხების მისაღებად მიმართავთ.

შეიძლება ითქვას, რომ თქვენ ყოველდღე ცდილობთ სიმართლის დადგენას. მოვიყვანოთ ჯესიკას მაგალითი. ის ამბობს: „ჩემს გოგონას მიწის თხილზე სერიოზული ალერგია აქვს. უმნიშვნელო ოდენობის მიწის თხილის ცილაც კი შეიძლება მისი სიცოცხლისთვის საშიში იყოს“. ჯესიკა აუცილებლად უნდა დარწმუნდეს, რომ საკვები, რომელსაც ყიდულობს, მისი გოგონასთვის სრულიად უვნებელი იქნება. „პირველ რიგში დაკვირვებით ვკითხულობ ეტიკეტებს იმის გასაგებად, თუ რა ინგრედიენტებს შეიცავს ესა თუ ის პროდუქტი. შემდეგ დამატებით ვიკვლევ სხვა დეტალებს; ზოგჯერ მეწარმეებს ვუკავშირდები, რათა დავრწმუნდე, ხომ არ არსებობს საშიშროება, რომ მიწის თხილის ცილის შემცველ პროდუქტებსა და მათ მიერ წარმოებულ სხვა პროდუქტებს შორის შემთხვევით რაღაც კონტაქტი მოხდეს. გარდა ამისა, სანამ რამეს ვიყიდი, სხვა სანდო წყაროებიდან ვცდილობ, დავადგინო, რამდენად აკმაყოფილებს სურსათის უვნებლობის მოთხოვნებს ესა თუ ის მწარმოებელი კომპანია“.

შესაძლოა ყოველდღიურ ცხოვრებაში წამოჭრილ საკითხებთან დაკავშირებით სიმართლის დადგენა თქვენთვის ისეთივე მნიშვნელოვანი არ იყოს, როგორც ჯესიკას შემთხვევაში, მაგრამ მსგავს საკითხებზე პასუხების მისაღებად შეგიძლიათ ასეთი მიდგომა გამოიყენოთ:

• გაეცანით ფაქტებს.

• მოიძიეთ დამატებითი ინფორმაცია.

• გადაამოწმეთ, რამდენად სანდო წყაროდან მომდინარეობს ინფორმაცია.

იგივე მიდგომა დაგეხმარებათ უმნიშვნელოვანეს კითხვებზე პასუხების მიღებაში.

უმნიშვნელოვანეს კითხვებზე პასუხები რომ მოეძია, ჯესიკამ ისეთივე მეთოდს მიმართა, როგორსაც თავისი გოგონასთვის უვნებელი სურსათის შერჩევისას მიმართავს. ის ამბობს: „დიდი ყურადღებით ვკითხულობდი ბიბლიას და გულმოდგინედ ვიკვლევდი, რის შედეგადაც ჭეშმარიტებას მივაკვლიე“. ჯესიკას მსგავსად, ბიბლიიდან მილიონობით ადამიანმა მიიღო ზუსტი და ამომწურავი პასუხები შემდეგ კითხვებზე:

• რატომ ვარსებობთ?

• რა ხდება სიკვდილის შემდეგ?

• რატომ ვიტანჯებით?

• რას აკეთებს ღმერთი, რომ ყოველგვარ ტანჯვას ბოლო მოუღოს?

• რა უწყობს ხელს ოჯახის ბედნიერებას?

თქვენ შეგიძლიათ მიიღოთ პასუხები ამ და სხვა მნიშვნელოვან კითხვებზე, თუ წაიკითხავთ ბიბლიას და მოიძიებთ დამატებით ინფორმაციას ვებგვერდზე www.dan124.com.