ბუნების მსოფლიო ფონდის მონაცემებით 1997—2011 წლებში მდინარე მეკონგის მიდამოებში, რომელიც კვეთს კამბოჯას, ლაოსს, მიანმას, ტაილანდს, ვიეტნამს და იუნანის პროვინციას ჩინეთში, აღმოაჩინეს მცენარეებისა და ცხოველების ბევრი ახალი სახეობა, მათ შორის, ლალისფერთვალება მწვანე გველი (Trimeresurus rubeus). 2011 წელს აღმოჩენილი სახეობებიდან 82 მცენარეა, 21 რეპტილიაა, 13 თევზია, 5 ამფიბიაა და 5 ძუძუმწოვარია.

ევროკავშირში შემავალ ქვეყნებში ტრეფიკინგი სერიოზული პრობლემა გახდა — იუწყება „მოსქოუ ტაიმზი“. ხალხს ყიდიან სექსუალური ექსპლუატაციის მიზნით, ამუშავებენ იძულებით და უკანონოდ ვაჭრობენ ადამიანის ორგანოებით. ტრეფიკერები სარგებლობენ სიღარიბით, უმუშევრობითა და გენდერული უთანასწორობით.

მკვლევრებმა, რომლებიც იკვლევდნენ ტელევიზორის გავლენას ბავშვებსა და მოზარდებზე, დაასკვნეს, რომ ტელევიზორის დიდხანს ყურება „მნიშვნელოვნად უწყობს ხელს ანტისოციალური ქცევის ჩამოყალიბებას ადრეული სრულწლოვანების ასაკში“. მკვლევრების თქმით, მათი აღმოჩენები მხარს უჭერს ამერიკის პედიატრთა აკადემიის რეკომენდაციას, რომ ბავშვებმა „დღეში 1—2 საათზე მეტხანს არ უნდა უყურონ ტელევიზორს“.

ალასკის თითქმის ყველა სოფელი მდინარის სანაპიროებთან ან მათთან ახლოს არის გაშენებული. ამ სოფლების 86 პროცენტზე დამანგრევლად მოქმედებს წყალდიდობები და ეროზიები. უკანასკნელი მონაცემებით, ტემპერატურის მატება ხელს უშლის ყინულის საფარის წარმოქმნას, რის გამოც სოფლები უფრო მეტად დაუცველი ხდება შემოდგომის შტორმებისგან.

მიუხედავად იმისა, რომ უზარმაზარი ინვესტიციები იდება სუფთა ენერგო ტექნოლოგიებში, კერძოდ, ქარისა და მზის ენერგიის ტექნოლოგიებში, „გამომუშავებული ენერგია თითქმის ისეთივე დაბინძურებულია, როგორც 20 წლის წინ იყო“, — აღნიშნავს ენერგეტიკის საერთაშორისო სააგენტოს აღმასრულებელი დირექტორი მარია ვან დერ ჰუვენი.