Asqamu amwellah d yiwet n terbaɛt tamecṭuḥt n imasiḥiyen yetɛeqqlen i geţwellihen Inagan n Yahwa n ddunit meṛṛa. Iɛeggalen n Wesqamu-yagi amwellah steklfen s snat leḥwayeǧ:

•   Ţheggin-d aselmed ireṣṣan ɣef Wedlis Iqedsen i d-ţţaken di tektabin, deg inejmuɛen akk-d iɣerbazen n Inagan n Yahwa.​—Luqa 12:42.

•   Ţwellihen leqdic n Inagan n Yahwa di ddunit meṛṛa: ţwellihen leqdic n uberreḥ n lexbaṛ n lxiṛ yerna steklfen s usexdem n tukciwin.

 Di lqern Amezwaru, di ‘Yarucalim, imceggɛen akk-d imeqranen’ llan ţţaṭṭafen leqrarat yesɛan azal i lmend n imasiḥiyen meṛṛa. (Lecɣal 15:2) Asqamu amwellah yettabaɛ lemtel-agi. Am yergazen-agi unṣiḥen n zik, iɛeggalen n Wesqamu amwellah ur llin ara d lḥekkam n tuddsa-nneɣ. Ţkalayen ɣef Wedlis Iqedsen akken a ten-iwelleh yerna steɛṛfen belli d Ɛisa Lmasiḥ i gesbedd Yahwa d Aqerru n tejmaɛt.​—1 Ikurintiyen 11:3; Ifasusiyen 5:23.

 Iɛeggalen n Wesqamu amwellah d wigi: Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane akk-d Jeffrey Winder. Qeddcen di lbiru amaḍlan n Inagan n Yahwa di Waṛwik (Nuyuṛk).

 Asqamu amwellah isbedd seţţa n trebbuyaɛ ara yesteklfen s wayen akk icudden ɣer lecɣal n Inagan n Yahwa. Mkul aɛeggal n Wesqamu amwellah iţekki deg yiwet si trebbuyaɛ-agi, neɣ kteṛ.

•   Tarbaɛt n yemsuddsen: Testeklif s temsal icudden ɣer lqanun, s liḥalat meṛṛa iɣef ur nebni ara, i geţḥazen Inagan n Yahwa (tiwaɣiyin am zzelzlat neɣ tibuciḍanin, leqher ɣef ddemma n wayen is i ţţamnen, d wayen nniḍen).

•   Tarbaɛt yesteklfen s ixeddamen: Testeklif s leqrarat yeɛnan iwaziwen i gqeddcen di lbiruwat iɣelnawen.

•   Tarbaɛt yesteklfen s usufeɣ n tezmamin: Testeklif s usufeɣ d uceggeɛ n tezmamin ireṣṣan ɣef Wedlis Iqedsen; testeklif daɣen s lbenyan n imukan n leɛbada, n lbiruwat n uṭerjem akk-d lbiruwat iɣelnawen.

•   Tarbaɛt yesteklfen s leqdic: Teţwellih leqdic n uberreḥ n “lexbaṛ n lxiṛ n tgelda.”​—Matta 24:14.

•   Tarbaɛt yesteklfen s uselmed: Testeklif s uselmed n leḥwayeǧ n ṛṛuḥ i d-yeţţunefkayen deg inejmuɛen, deg iɣerbazen akk-d wahilen n usemḥes d ufeṛṛeǧ.

•   Tarbaɛt yesteklfen s tira: Teţheggi-d aselmed i d-iţeffɣen ɣef lkaɣeḍ neɣ deg wesmel n Inagan n Yahwa. Teţwellih daɣen ccɣel n uṭerjem.

 Zzyada ɣef wannect-a, iɛeggalen n Wesqamu amwellah ţnejmaɛen mkul smana akken ad ssenqden lmeḥwiǧat n tuddsa n Inagan n Yahwa. Deg inejmuɛen-agi, iɛeggalen n Wesqamu amwellah ţmuqulen ayen i d-iqqar Wedlis Iqedsen yerna xeddmen ayen ilezmen bac ad fken tagniţ i ṛṛuḥ iqedsen a ten-iwelleh: ţnadin ad ddukklen di ṛṛay.​—Lecɣal 15:25.

 D imasiḥiyen iɣef yella leţkal i geţɛawanen Asqamu amwellah di trebbuyaɛ iɣef yesteklef Wesqamu-yagi. (1 Ikurintiyen 4:2) Ḥeṛcen yerna sɛan lḥirfa di leqdic i teţwellih terbaɛt ukud i xeddmen. Ţcaraken deg unejmuɛ n yal smana i txeddem terbaɛt-nsen. Ɣas akken ur ţţaṭṭafen ara leqrarat, ţţaken-d lewṣayat akk-d useɛlem yesɛan azal. Zzyada ɣef wannect-a, ṭṭebbiqen leqrarat i teṭṭef terbaɛt-nsen yerna ţnadin ad ẓren d acu n nnfeɛ i d-ţţawin leqrarat-agi d wamek i ţwenniɛen lecɣal. Yezmer daɣen a ten-iceggeɛ Wesqamu amwellah ad rzun ɣef Inagan n Yahwa di kra n imeḍqan di ddunit w’ad carken di kra n tedyanin, am inejmuɛen n useggas neɣ inejmuɛen ideg i ţţunefkayen diblumat n Uɣerbaz n Gilɛad.