Inagan n Yahwa ţţuqennɛen belli leqwanen akk-d imenzayen n Wedlis Iqedsen ţɛawanen-ten ad ṭṭfen ṛṛay iɛeǧben i Ṛebbi yerna i sen-iṣelḥen. (Icɛaya 48:17, 18) Mačči d nekni i d-yesnulfan leqwanen-a akk-d imenzayen-a, meɛna neṭṭebbiq-iten di tudert-nneɣ. Kra seg-sen ɛnan lɛalaqat n tayri (yeţţusemman daɣen lemɛacṛa). a Atnah kra n lemtul:

•   Zzwaǧ ţ-ţadukli yeţdumun. (Matta 19:6) Inagan n Yahwa ţţaken lqima i lɛalaqat n tayri axaṭer ţwalin-ţ d abrid yeţţawin ɣer zzwaǧ.

•   Ḥaca wid yessawḍen i zzwaǧ iwumi yeţţunefk ad sɛun lɛalaqa n tayri. Ilaq ad “[ɛeddin] i leɛmeṛ ideg i teǧǧuǧǧeg temẓi”, yeɛni aḥric n tudert ideg amdan yesɛa ccehwat n lǧeţţa ţ-ţimeqranin.​—1 Ikurintiyen 7:36, Ṭrejma n ddunit tajdiṭ.

•   Win ara yesɛun lɛalaqa n tayri ilaq ad yili yesɛa ţţesriḥ ad yezweǧ. Ɣas kra bran, ɛlaḥsab n lumuṛ n Ṛebbi ur sɛin ara ţţesriḥ ad ɛiwden ad zewǧen imi ɣur Ṛebbi, ḥaca zzna i gzemren ad yili d ssebba taḥeqqanit n inebran.​—Matta 19:9.

•   Adlis Iqedsen yeṭṭalab i imasiḥiyen yebɣan ad zewǧen ad xtiṛen amezwaǧ ger wid kan yellan di ddin-nsen. (1 Ikurintiyen 7:39) Inagan n Yahwa fehmen belli lameṛ-agi ur d-iheddeṛ ara ɣef win i geţqadaren kan ddin-nsen; iheddeṛ-ed ɣef win yellan d Inigi, yeɛni yeţwaɣḍeṣ; d albeɛḍ ara yilin yeţţamen am nutni yerna yessexdam di tudert-is ayen is i geţţamen. (2 Ikurintiyen 6:14) Si zik i gumeṛ Ṛebbi i wid i t-yeţţeɛbaden ad zewwǧen kan d wid yellan yid-sen deg yiwen n ddin. (Laṣel n ddunit 24:3; Malaxi 2:11) Lameṛ-agi daɣen yeṣleḥ, ɣef wakken i d-fkan fell-as ass-a ţţeḥqiq kra n imusnawen. b

•   Dderya ilaq ad ţţaɣen awal i imawlan-nsen. (Lemtul 1:8; Ikulusiyen 3:20) Ma yella mazal ţɛicin deg wexxam n imawlan-nsen, ilaq ad qadren lameṛ-agi ula deg wayen yeɛnan tayri. Di lemtel, imawlan zemren a d-ḥudden i mmi-tsen (neɣ yelli-tsen) acu n leɛmeṛ ideg i gezmer ad yebdu ad iţeffeɣ d walbeɛḍ yerna anwi lecɣal i gezmer a ten-yexdem.

•   Yal Inigi ad iḍebber ɣef yiman-is, ɛlaḥsab n lumuṛ n Wedlis Iqedsen, m’ad yesɛu neɣ ala lɛalaqa n tayri yerna d menhu. Ayagi yeɛdel akk-d umenzay-agi: “Mkul yiwen ad irfed taɛkumt-is weḥd-s.” (Igalatiyen 6:5, Awal n tudert) Ɣas akken, deg wayen yeɛnan tayri, aṭas n wukyisen i geṭṭalaben lewṣayat i imasiḥiyen yetɛeqqlen, i sen-yebɣan ayen yelhan.​—Lemtul 1:5.

•   Aṭas n lexdayem i cudden medden ɣer lɛalaqat n tayri, nutenti di tin n ṣṣeḥ d ddnub ameqran. Ɣef lemtel, Adlis Iqedsen iḥeṛṛem zzna. Ayagi yeɛna lɛalaqat n lǧeţţa akk-d wayen akk ur neṣfi ara i zemren ad xedmen gar-asen sin ur nemzawaǧ ara, am weslaf d usuden ɣef lejwareḥ n tarrawt, neɣ alewweṭ (yeɛni lɛalaqat n lǧeţţa akken ara tent-yexdem wergaz d wayeḍ.) (1 Ikurintiyen 6:9-11) Ṭṭbiɛa ara d-yessakin ccehwat n lǧeţţa qbel zzwaǧ, ɣas ur tessaweḍ ara ɣer zzna, d ayen ur ‘neṣfi’ ara ɣur Ṛebbi yerna ur s-neɛǧib ara. (Igalatiyen 5:19-21) Aqeṣṣer ɣef lɛaṛ, yeɛni win ideg i llan “lehduṛ iqebḥen”, yeţţuḥeṛṛem deg Wedlis Iqedsen.​—Ikulusiyen 3:8.

•   “Ul”, yeɛni ccexṣiyya i nesɛa, d axeddaɛ. (Irmiya 17:9) Yezmer ad idemmer lɛebd ad yexdem ayen i geẓra diri-t. Bac ur ţɛemmiden ara i wulawen-nsen a ten-xedɛen, argaz ţ-ţmeṭṭut yeţţemɛacaṛen ur ilaq ara a d-afen iman-nsen weḥḥed-sen di liḥalat ara ten-iɣurren. Ilaq ad ţɣaman deg imukan anda i tella terbaɛt neɣ ad ţţawin yid-sen albeɛḍ. (Lemtul 28:26) Imasiḥiyen iɛezriyen yeţnadin amezwaǧ ɛelmen belli zemren a d-awin lemḍerra ma yella ţwalin ismal n temliliyin; zemren di lemtel ad ɛacṛen albeɛḍ iɣef ur ssinen ahat ula d acemma.​—Ahellil 26:4.