TAQSIṬ TIS 12

Lebni n lbeṛǧ ameqran

ƐEDDAN aṭas n iseggasen. Arraw n Nuḥ sɛan-​d aṭas n dderya. Arraw-​nsen ftin, uɣalen sɛan-​d ula d nutni ayendin n dderya. S lemɣawla lqaɛa teččuṛ d imdanen.

Nimrud yella d yiwen ger yemdanen i d-​yefrurin si lǧedra n Nuḥ. Yella d yir argaz, yeţṣeggiden yerna yessazzalen idammen ama n lḥiwan ama n lɛibad. Yerra daɣen iman-​is d agellid akken ad iḥkem ɣef wiyaḍ. Ṛebbi ur iḥemmel ara Nimrud.

Di lweqt-​nni, yiwet kan n tmeslayt i heddṛen yemdanen. Nimrud yebɣa ad isnejmaɛ akk lɣaci akken ad yeḥkem fell-​asen. Teẓriḍ d acu i gexdem? Yenna-​yasen ad bnun yiwet n temdint d yiwen n lbeṛǧ daxel-​is. Wali-​ten di ţţeswiṛa-​yagi akken xeddmen llajuṛ (tibrikin).

Lebni-​ya ur yeɛǧib ara i Yahwa Ṛebbi. Neţţa, yebɣa ad ṛuḥen yemdanen ɣer leḍruf meṛṛa n lqaɛa akken ad ɛicen fell-​as. Lameɛna imdanen nnan: ‘Eyyaw a nebnut yiwet n temdint, a nernu yiwen n lbeṛǧ ɛlayen, taqacuct-​is aţ-​ţaweḍ s igenni. Imiren a nuɣal mechuṛit!’ Lɣaci bɣan ad fken lɛezz i yiman-​nsen wala i Ṛebbi.

Ɣef wayagi i geḥbes Ṛebbi lebni n lbeṛǧ-​nsen. Teẓriḍ amek i gexdem annect-​a? Deg yiwet n teswiɛt kan, Ṛebbi yessexṛeb tameslayt-​nsen dɣa bdan heddṛen aṭas n lluɣat. Wid ibennun uɣalen ur ţţemsefhamen ara wway gar-​asen. Ɣef wayagi i teţţusemma temdint-​nsen Babil neɣ Babilun, lmeɛna-​s “Lexṛeb”.

Tura bdan yemdanen ţeffɣen si Babil. Imdanen iheddṛen yiwet n tmeslayt ṛuḥen lwaḥid, mkul tarbaɛt tṛuḥ anda ara tezdeɣ ɣef lqaɛa.

Laṣel n ddunit 10:1, 8-10; 11:1-9.