TAQSIṬ TIS 76

Nnger n Yarucalim

ƐEDDAN akteṛ n ɛecṛa iseggasen seg wasmi i gewwi ugellid Nabuxadnuẓur wid akk yeɣran n wat Isṛayil ɣer Babil. Tura muqel acu akka iḍerrun! Aţţan la treqq Yarucalim. Wid ur nemmut ara, wwin-​ten d imeḥbas ɣer Babil.

Tecfiḍ d acu i d-​caren lanbeyya n Yahwa? Nnan-​d aţ-​ţhudd temdint n Yarucalim m’ur d-​yuɣal ara wegdud seg yir abrid. Lameɛna At Isṛayil ur ḥessen ara i lanbeyya. Kemmlen leɛbada n iṛebbiten n lekdeb wala tin n Yahwa. Ɣef waya i yuklalen a ten-​iɛaqeb Yahwa. D nnbi Ḥizqiyal i ɣ-​d-​imlan leḥwayeǧ-​agi meṛṛa n diri i xeddmen wat Isṛayil di zzman-​nni.

Teẓriḍ anwa i d Ḥizqiyal? D yiwen seg yelmeẓyen-​nni i gewwi ugellid Nabuxadnuẓur ɣer Babil ɛecṛa iseggasen uqbel aţ-​ţhudd Yarucalim. Danyil akk-​d tlata yeḥbiben-​is, Cadrax, Micax akk-​d Ɛabdnaɣu ddan ula d nutni di leḥsab.

Nnbi Ḥizqiyal mazal-​it di Babil asmi i s-​yessken Yahwa leḥwayeǧ n diri iḍerrun daxel n lemqam di Yarucalim. Yahwa ixdem aya s lbeṛhan. Ḥizqiyal yella di Babil lameɛna Yahwa iweḥḥa-​yas-​d ayen akk iḍerrun di lemqam. Ayen i gwala Ḥizqiyal issexlaɛ!

Yahwa yenna i Ḥizqiyal: ‘Muqel leḥwayeǧ meṛṛa iwesxen i gxeddem wegdud di lemqam. Muqel leḥyuḍ yeččuṛen d ţţeswiṛat n izerman d lḥiwan nniḍen. Wali amek i tent-​yeţɛebbid wegdud!’ Ḥizqiyal iwala leḥwayeǧ-​agi meṛṛa, mbeɛd yura-​tent.

Yahwa yesteqsa Ḥizqiyal: ‘Twalaḍ acu i xeddmen yemḍebbren n wegdud s tuffra?’ Ih, ula d ayen yeffren yezmer a t-​iẓer Yahwa. Llan 70 n yergazen iţɛebbiden akken ma llan iṛebbiten n lekdeb. Qqaren: ‘Ur ɣ-​d-​iţwali ara Yahwa. Yeǧǧa tamurt.’

Mbeɛd, Yahwa yessken i Ḥizqiyal kra n tlawin yeqqimen ɣer tewwurt n umalu n lemqam, ţɛebbident aṛebbit n lekdeb Tammuz. Yessken-​as diɣen azal n 25 n yergazen yellan deg wemnaṛ n lemqam. Ḥizqiyal iwala-​ten kennun ɣer ccerq, ţɛebbiden iṭij!

Yahwa yenna: ‘Imdanen-​agi ur iyi-​ţqadaren ara. Xeddmen ḥaca cceṛ yerna ur ugaden ara a t-​xedmen di lemqam!’ Yahwa yeggull ihi: ‘Ɣef waya ad walin acḥal meqqer zzɛaf-​iw. Ur iyi-​ţɣaḍen ara asm’ara ţwanegren.’

Mi ɛeddan tlata iseggasen seg wasmi i gessken Yahwa leḥwayeǧ-​agi i Ḥizqiyal, At Isṛayil ɛuṣan Nabuxadnuẓur, dɣa yusa-​d a sen-​yefk ṭṭriḥa. Asmi i gɛedda useggas d nnefṣ, At Babil xedmen axjiḍ di leṣwar n Yarucalim yerna sserɣen-​ţ. Aṭas seg wat Isṛayil i gemmuten neɣ i wwin d imeḥbas ɣer Babil.

Acimi i gɛemmed Yahwa a d-​yeɣli nnger-​agi ɣef wat Isṛayil? Axaṭer ur ḥessen i Yahwa, ur uɣen awal i leqwanen-​is. Annect-​a ibeggen-​aɣ-​d acḥal i glaq a nesmeḥsis dima i wayen i d-​yeqqar Ṛebbi.

Drus n lɣaci iwumi i gɛemmed ugellid Nabuxadnuẓur ad qqimen di tmurt n Isṛayil. Iwekkel fell-​asen yiwen n Wuday yeţţusemman Gadalyahu. Lameɛna kra seg wegdud n Isṛayil nɣan-​t. Tura At Isṛayil ugaden a d-​ṛuḥen wat Babil a d-​rren ţţaṛ ɣef wayen yeḍran. Dɣa rewlen ɣer Maṣer yerna ḥettmen nnbi Irmiya ad yeddu yid-​sen.

Akka, ur d-​iqqim ḥedd di tmurt n Isṛayil. Sebɛin iseggasen ur ţ-​izdiɣ ula d yiwen, tuɣal meṛṛa d lxali. Lameɛna yewɛed Yahwa belli a d-​yerr At Isṛayil ɣer tmurt-​nsen m’ara fakken 70 iseggasen. Amek ara teḍru d wegdud n Ṛebbi di 70 iseggasen-​agi ara sɛeddin di tmurt n Babil? D ayen ara nwali.

2 Igelliden 25:1-26; Irmiyah 29:10; Ḥiziqyel 1:1-3; 8:1-18.