Ɛisa yeḥya-d si ger lmeggtin
TAQSIṬ TIS 102
Ɛisa yeḥya-d si ger lmeggtin
TEẒRIḌ anta-ţ tmeṭṭut-a akk-d sin yergazen-agi? Tameṭṭut-a d Meryem tamagdalit, yellan d yiwet ger inelmaden n Ɛisa. Irgazen-agi yelsan llebsa tamellalt d lmalayek. Taxxamt-a tamecṭuḥt ɣer wanda i teţmuqul Meryem d aẓekka anida ssersen lǧeţţa n Ɛisa asmi i gemmut. Meɛna lǧeţţa n Ɛisa atan ulac-iţ! Anwa i ţ-yewwin? D ayen ara nwali tura.
Mbeɛd lmut n Ɛisa, lmuqeddmin nnan i Bilaṭus: ‘Uqbel ad yemmet, Ɛisa yenna-d belli a d-iḥyu ass wis tlata. Efk ihi lameṛ ad ɛassen aẓekka-ines iwakken ur ţţizmiren ara inelmaden-is ad akren lǧeţţa-s. Akka, ur d-qqaren ara yeḥya-d si ger lmeggtin.’ Bilaṭus yenna ihi i lmuqeddmin: ‘Cceggɛet iɛsekṛiwen ad ɛassen aẓekka-ines.’
Lameɛna, ṣṣbeḥ zik ass wis tlata mbeɛd lmut n Ɛisa, yiwen n lmelk n Yahwa iḍher-ed. Iswexxeṛ aẓru-nni yellan zdat n uẓekka. Iɛsekṛiwen yellan dinna qquren si lxuf. Umbeɛd, mi ḍallen ɣer daxel n uẓekka, ufan-t d ilem. Kra seg iɛsekṛiwen-nni ṛuḥen ɣer temdint, ḥkan ayen yeḍran i lmuqeddmin. Teẓriḍ d acu i xedmen? Xellṣen iɛsekṛiwen-nni iwakken ad skiddben. Lmuqeddmin imcumen nnan-asen: ‘Init belli d inelmaden-is i d-iṛuḥen deg yiḍ ad akren lǧeţţa-s m’akken teṭṭṣem.’
Yuɣ lḥal, m’akken iḍerru wayagi meṛṛa, kra n tlawin, yellan ţ-ţinelmadin n Ɛisa, ṛuḥent s aẓekka-ines. Acḥal i dehcent imi ur ufint ara Ɛisa dinna. Taswiɛt kan, ḍehrent-ed snat lmalayek s llebsa iţfeǧǧiǧen. Ḍelbent i tlawin-nni: ‘Ayɣer i teţnadimt Ɛisa deg wemḍiq-agi? Atan yeḥya-d si ger lmeggtin. Azzlemt ihi aţ-ţxebbṛemt inelmaden-is.’ Tilawin-nni ṛuḥent am lebraq! Lameɛna, yiwen wergaz immuger-itent deg webrid. Teẓriḍ anwa-t? D Ɛisa. Inna-yasent: ‘Ṛuḥemt tɛeggnemt inelmaden-iw.’
Tilawin-nni ssawḍent lexbaṛ i inelmaden n Ɛisa, lameɛna ggumman ad amnen. Buṭrus d Yuḥenna uzzlen ihi ɣer uẓekka iwakken ad walin s wallen-nsen, lameɛna ur ufin ḥedd zdaxel. Mi ṛuḥen, Meryem tamagdalit yeddan yid-sen, teqqim dinna. Imiren i twala snat n lmalayek-nni mi tḍall ɣer daxel.
Teẓriḍ amek i teḍra d lǧeţţa n Ɛisa? Isɣab-iţ Ṛebbi. Yahwa ur d-issker ara Ɛisa di lǧeţţa n wemdan ideg yemmut. Ifka i Ɛisa lǧeţţa tajdiṭ n ṛṛuḥ am tid i sɛant lmalayek deg igenni. Lameɛna, iwakken ad ibeggen i inelmaden-is belli yedder, Ɛisa yelsa lǧeţţa i zemren ad walin lɣaci. A nẓer annect-a umbeɛd.
Matta 27:62-66; 28:1-15; Luqa 24:1-12; Yuḥenna 20:1-12.
