TAQSIṬ TIS 99

Di texxamt n ufella

ƐEDDAN tura yumayen. Aql-​aɣ deg yiḍ n wass n lexmis. Ɛisa yennejmaɛ d 12 n yemceggɛen-​is di tɣurfeţ-​agi tameqrant iwakken ad ččen imensi n Lɛid n Usuref. Argaz-​inna yekkren ad iffeɣ d Yudas n Qeryut. Iṛuḥ ad yini i lmuqeddmin amek ara ṭṭfen Ɛisa.

Yuɣ lḥal iḍelli-​nni kan, Yudas iṛuḥ ɣur-​sen, yenna-​yasen: ‘Ma ɛawneɣ-​kkun a d-​teṭṭfem Ɛisa, d acu ara yi-​tefkem?’ Rran-​as: ‘Tlatin iṣurdiyen n lfeṭṭa.’ Atan ihi tura iṭṭef abrid ɣur-​sen iwakken a ten-​id-​yawi ɣer Ɛisa. Annect-​a ţ-​ţawaɣit tameqrant!

Mi gfukk imensi n Lɛid n Usuref, Ɛisa ibda imensi nniḍen yesɛan azal ameqran. Yefka i yemceggɛen-​is talqimt n weɣrum, yenna-​yasen: ‘Ččet-​eţ, axaṭer iţmettil-​ed lǧeţţa-​w ara fkeɣ fell-​awen.’ Mbeɛd, yefka-​yasen tabuqalt n ccṛab, yenna-​yasen: ‘Swet-​eţ, axaṭer iţmettil-​ed idammen-​iw ara yazzlen fell-​awen.’ Imensi-​yagi iţţusemma ‘Imensi n Wesmekti’ deg Wedlis Iqedsen.

At Isṛayil teţţen imensi n Lɛid n Usuref iwakken a d-​mmektin iḍ-​nni ideg yessuref lmelk n Ṛebbi i yexxamen-​nsen di tmurt n Maṣer yerna yenɣa imenza deg yexxamen n Imaṣriyen. Lameɛna tura, Ɛisa yuṛǧa deg inelmaden-​is a t-​id-​mmektin neţţa d wamek i gefka tudert-​is fell-​asen. Ɣef wayagi i sen-​yenna ad ɛeggden imensi-​yagi ajdid mkul aseggas.

Mi gfukk Imensi-​nni n Wesmekti, Ɛisa yenna i yemceggɛen-​is ad sɛun tirrugza yerna ad ǧehden di liman. Ɣer taggara, ḥemden Ṛebbi s ccnawi, mbeɛd ffɣen. Tura atan iṛuḥ lḥal, ahat tɛedda ţnaṣfa n yiḍ. A nwali sani i ṛuḥen.

Matta 26:14-30; Luqa 22:1-39; Yuḥenna ixef wis 13 alamma d wis 17; 1 At Kurintus 11:20.