TAQSIṬ TIS 4

Acuɣer i d-​ffɣen si lǧennet

WALI acu i gḍerrun tura. Adam d Ḥewwa yessufeɣ-​iten-​id Ṛebbi si leǧnan n Ɛidin. Teẓriḍ acimi?

Axaṭer xedmen lexsaṛa tameqrant. Ɣef waya i ten-​iɛuqeb Yahwa. Teẓriḍ d acu i xedmen?

Xedmen yiwet n lḥaǧa i sen-​yugi Ṛebbi. Ṛebbi yeǧǧa-​ten ad ččen si ttjuṛ meṛṛa n leǧnan-​nni, siwa yiwet. Ma yella ččan si lfakya n ttejṛa-​yagi ad mmten, axaṭer ttejṛa-​yagi d ayla n Ṛebbi. Yak neẓra belli diri ma neddem ayla n medden, neɣ ala? Ihi d acu i geḍran?

Yiwen wass ideg i tella Ḥewwa weḥd-​es di leǧnan-​nni, ihdeṛ-​as-​d yiwen wezrem. D lewhayem! Yenna-​yas i Ḥewwa aţ-​ţečč si lfakya n ttejṛa-​nni i sen-​yugi Ṛebbi ad ččen. Xuḍi asmi i d-​ixleq Ṛebbi izerman, ur heddṛen ara. Ihi d albeɛḍ i d-​issenṭqen azrem-​nni. Anwa-​t wagi?

Mačči d Adam. Bla ccekk ihi d yiwen ger wid i d-​ixleq Ṛebbi aṭas n lweqt uqbel a d-​ixleq lqaɛa. Lexliqat-​agi d lmalayekkat ur nezmir ara a nwali. Yiwen lmelk ger lmalayek-​agi tekcem-​it nnefxa, dɣa yebda yeţmenni ad iḥkem am Ṛebbi. Lmelk-​a yebɣa a s-​aɣen awal yemdanen i neţţa wala i Yahwa. D lmelk-​agi i d-​issenṭqen azrem-​nni.

Lmelk-​agi iɣder (ixdeɛ) Ḥewwa. Yenna-​yas belli ma tečča si lfakya-​nni yeţţuḥeṛṛmen aţ-​ţuɣal am Ṛebbi. Ḥewwa tumen-​it, dɣa tečča. Umbeɛd Adam yečča ula d neţţa. Adam d Ḥewwa ur uɣen ara awal i Ṛebbi, daymi i sen-​tṛuḥ tnezduɣt-​nsen di leǧnan-​nni amelḥan.

Lameɛna, yiwen wass lqaɛa meṛṛa aţ-​ţili tecbeḥ am leǧnan n Ɛidin. Deg wayen i d-​iteddun aţ-​ţwaliḍ amek i tzemreḍ aţ-​ţeţţekkiḍ di ccɣel-​agi. Lameɛna tura a nwali d acu i geḍran d Adam akk-​d Ḥewwa.

Laṣel n ddunit 2:16, 17; 3:1-13, 24; Aweḥḥi 12:9.