TAQSIṬ TIS 7

Argaz bu tissas

SKUD ţnernayen yemdanen ɣef lqaɛa, aṭas seg-​sen i gxeddmen ayen n diri am Kayin. Lameɛna yella yiwen wergaz ur nelli ara am wiyaḍ. Isem-​is Ḥanux. Ḥanux d argaz iẓewren aṭas. Ɣas akken imdanen i s-​d-​izzin xeddmen aṭas n cceṛ, Ḥanux iţkemmil leqdic-​is i Ṛebbi.

Teẓriḍ acuɣer i xeddmen yemdanen-​agi ayen n diri? A nxemmem ciṭuḥ. Anwa i gewwin Adam d Ḥewwa ad ɛaṣin Ṛebbi w’ad ččen lfakya-​nni i sen-​iḥeṛṛem? D yiwen n lmelk n diri. Adlis Iqedsen isemma-​yas Cciṭan. D neţţa i geţqelliben ad yawi lɣaci meṛṛa di yir abrid.

Yiwen wass, Yahwa iceggeɛ Ḥanux ad yini i yemdanen yiwet lḥaǧa, lameɛna ugin a s-​ḥessen. Atah wacu i sen-​yenna: ‘Yiwen wass Ṛebbi ad issenger imcumen meṛṛa.’ Ahat imdanen-​nni zeɛfen aṭas m’akken slan i wannect-​a! Izmer lḥal, ɛerḍen ula ţ-​ţimenɣiwt a t-​nɣen. Ihi ilaq-​as i Ḥanux ad yili d argaz ara yesɛun aṭas n tirrugza akken ad ixebbeṛ imdanen ɣef wayen ara yexdem Ṛebbi.

Ṛebbi ur yeǧǧi ara Ḥanux ad iɛic aṭas n lweqt ger yemcumen-​agi. Ḥanux iɛac ḥaca 365 n sna. “Ḥaca 365 n sna”? Ih, di zzman-​nni, imdanen ṣeḥḥan aṭas ɣef wigad n tura yerna ţɛicin akteṛ. Ɣef waya i gɛac Matucilaḥ, mmi-​s n Ḥanux, 969 n sna!

Mbeɛd lmut n Ḥanux, imdanen ţzidin di cceṛ i xeddmen. Adlis Iqedsen yenna-​d belli ixemmimen-​nsen malen dima ɣer wayen n diri, yerna lqaɛa teččuṛ d leqher.

Tessneḍ xerṣum yiwet n ssebba iɣef i teččuṛ lqaɛa d leqher di lawan-​nni? Axaṭer Cciṭan yesɛa ţţawil ajdid is ara idemmer imdanen ad xedmen cceṛ. D ayen ara nwali tura.

Laṣel n ddunit 5:21-24, 27; 6:5; Iɛebṛaniyen 11:1; Yuda 14, 15.