1-3. Anta-​ţ teɛdawt i ɣ-​d-​yettabaɛen irkelli? Acuɣer ma nessenqed ayen yesselmad Wedlis Iqedsen a neţţuṣebber?

 XAYEL iman-​ik la treggleḍ i yiwen weɛdaw yellan d uqsiḥ. Iǧhed akteṛ-​ik yerna iɣleb-​ik di tazzla. Teẓriḍ belli yeqqur wul-​is axaṭer twalaḍ-​t mi genɣa xilla si leḥbab-​ik. Kkes-​ed ayen ur texdimeḍ akken a s-​trewleḍ, meɛna iţqerrib-​ed dima akteṛ! Waqila ulac asirem. Ccwi kan, ataya yiwen wemsellek ibedd-​ed ɣer tama-​k! Iǧhed akteṛ n weɛdaw-​ik, yerna iggull a k-​iɛiwen.

² Nezmer a d-​nini belli yettabaɛ-​ik-​id s ṣṣeḥ weɛdaw yecban wagi. Yettabaɛ-​aɣ-​d irkelli. Akken i t-​id-​nelmed deg yixef iɛeddan, Adlis Iqedsen yeqqar-​ed belli lmut ţ-​ţaɛdawt. Ulac win i gzemren a s-​yerwel neɣ a ţ-​issebɛed. Amur ameqran seg-​neɣ ẓran-​ţ mi sen-​teḥweṣ wid i ţḥibbin. Meɛna Yahwa iǧhed akteṛ n lmut. D Amsellek yeččuṛen d leḥmala i d-​ibeggnen yakan belli izmer ad yeɣleb taɛdawt-​agi. Yewɛed belli a ţ-​yemḥu i lebda. Adlis Iqedsen isselmad belli “aɛdaw aneggaru ara yessenger, d lmut.” (1 Ikurintiyen 15:26) D lexbaṛ yetɛeddan!

³ A nẓer tura ayen swayes i d-​tgellu lmut m’ara d-​teḥdeṛ.  Ayagi a ɣ-​iɛiwen a nefhem yiwet lḥaǧa ara ɣ-​issefṛḥen: Yahwa yewɛed belli lmeggtin a d-​ḥyun. (Icɛaya 26:19) A d-​uɣalen ɣer tudert. D wa i d asirem n ḥeggu n lmeggtin.

4. a) Acuɣer ayen iḥuss Ɛisa mi gemmut win i gḥemmel iţxebbiṛ-​aɣ-​d ɣef wacu i geţḥussu Yahwa? b) Amek i tella lɛalaqa ger Ɛisa d leḥbab-​is?

⁴ Yella wasmi i gemmut walbeɛḍ i tḥemmleḍ? Bla ccekk, yeɣli-​d fell-​ak leḥzen akk-​d lqerḥ; tḥusseḍ belli ur tezmireḍ aţ-​ţxedmeḍ acemma, yerna liḥala-​yagi teɣleb-​ik almi d ayen. Di teswiɛin am tigi neḥwaǧ ṣṣber i d-​itekken seg Wawal n Ṛebbi. (Ɣer-​ed 2 Ikurintiyen 1:3, 4.) Adlis Iqedsen iţɛawan-​aɣ a nefhem ayen i geţḥussu Yahwa akk-​d Ɛisa m’ara yemmet ḥedd. Ɛisa, yellan d ccbiha ikemlen n Baba-​s, iḥuss i lqerḥ i d-​tessasay lmut. (Yuḥenna 14:9) Mi gella yeţṛuḥu ɣer Yarucalim, yeţɛeddi ɣer temdint n Bit-​Ḥananya akken ad yerzu ɣef Ilɛazar akk-​d Meryem d Marta, tiyessetmatin-​is. Uɣalen d leḥbab imeqranen. Adlis Iqedsen yenna-​d: “Yasuɛ iḥemmel Marta, weltma-​s akw-​d Ilɛazar.” (Yuḥenna 11:5) Acu kan, akken i t-​id-​neẓra deg yixef iɛeddan, Ilɛazar yemmut.

5, 6. a) Acu i gḥuss Ɛisa mi gwala tawacult n Ilɛazar d leḥbab-​is ţrun fell-​as? b) Ayɣer i ɣ-​yesseǧhad leḥzen swayes i gḥuss Ɛisa?

⁵ Acu i gḥuss Ɛisa mi gemmut weḥbib-​is? Adlis Iqedsen yenna-​d belli iṛuḥ a d-​iẓer tawacult n Ilɛazar d leḥbab-​is i geţrun fell-​as. Mi ten-​iwala, yeḥzen ayendin; “tergagi-​d tasa-​s, ijreḥ wul-​is.” Imiren, “ibda yeţru.” (Yuḥenna 11:33, 35) Eɛni leḥzen-​agi ibeggen-​ed belli Ɛisa ur yesɛi ara maḍi asirem? Awwah, xaṭi. Ɛisa yeɛlem belli tella lḥaǧa yessewhamen ara d-​yeḍrun. (Yuḥenna 11:3, 4) Ɣas akken, iḥuss i leḥzen i d-​teţţaǧǧa lmut.

⁶ Nezmer a d-​nini belli leḥzen is i gḥuss Ɛisa yesseǧhad-​aɣ. Yesskanay-​aɣ-​d belli Ɛisa akk-​d Baba-​s, Yahwa, keṛhen  lmut. Meɛna Yahwa Ṛebbi yezmer ad innaɣ d lmut w’a ţ-​yeɣleb! A nẓer tura d acu n tezmert i gefka i Ɛisa.

7, 8. Acimi i sen-​d-​iban i wid i gḥedṛen i temsalt n Ilɛazar am wakken ulac asirem? Lameɛna acu i gexdem Ɛisa?

⁷ Ilɛazar iţwanṭel deg yiwen lɣar. Ɛisa yenna-​yasen ad kksen aẓru i gɣummen lɣar-​agi. Marta ur tebɣi ara axaṭer lǧeţţa n Ilɛazar tebda ahat trekku imi ṛebɛa wussan segmi yemmut. (Yuḥenna 11:39) Di liḥala am tagi, ɣer lɛibad ulac asirem i d-​yegran!

⁸ Swexxṛen-​d ihi aẓru-​nni i gɣummen lɣar, dɣa iɛeggeḍ Ɛisa s lqedd n taɣect-​is: “Ilɛazar, ffeɣ-​ed ɣer beṛṛa!” D acu i geḍran? “Lmegget nni yeffeɣ-​ed.” (Yuḥenna 11:43, 44) Xayel acḥal i feṛḥen yemdanen iḥedṛen i temsalt-​a! Ẓran belli Ilɛazar, i sen-​yellan d lǧaṛ, d aḥbib, d aqrib neɣ d gma-​tsen, yemmut. Lameɛna, argaz-​agi ɛzizen fell-​asen atan tura ibedd-​ed zdat-​sen. Iban-​asen-​d am wakken ţ-​ţargit i ţţargun. Ahat aṭas i geţrun si lfeṛḥ mi d-ɛennqen Ilɛazar. Lmut teţwaɣleb!

9, 10. a) Amek i d-​issken Ɛisa win i s-​d-​yefkan tazmert akken a d-​yessker Ilɛazar si lmut? b) Acu n nnfeɛ i d-​teţţawi leqraya n teḥkayin n Wedlis Iqedsen yeɛnan ḥeggu n lmeggtin?

⁹ Ɛisa ur d-​yenni ara belli weḥd-​es i gexdem lmuɛǧiza-​yagi. Uqbel ad issiwel i Ilɛazar, ibeyyen-​ed ɛinani di tẓallit belli d Yahwa i t-​id-​yesseḥyan. (Ɣer-​ed Yuḥenna 11:41, 42.) Mačči tikkelt-​agi kan i gessexdem Yahwa tazmert-​is akka. Ilɛazar d yiwen ger tesɛa n yemdanen i d-​yeḥyan, iɣef i d-​iheddeṛ Wawal n Ṛebbi. a D lɛali m’ara neqqar yerna nessenqad tiḥkayin-​agi. Sselmadent-​aɣ belli Ṛebbi ur ixeddem ara maḥyaf (lxilaf), axaṭer wid i d-​yeḥyan llan ama seg wat Isṛayil ama si lǧens nniḍen, ama d ilmeẓyen  ama d imeqranen, ama d irgazen ama ţ-​ţulawin. Iţban-​ed xilla n lfeṛḥ di teḥkayin-​agi! Di lemtel, asmi i d-​yessker Ɛisa yiwet teqcict tamecṭuḥt si lmut, imawlan-​is “xelɛen tɛeǧǧben deg wayen walan.” (Marqus 5:42, Awal n tudert) Yahwa imudd-​asen yiwen n lfeṛḥ d lmuḥal a t-​ţţun.

¹⁰ Acu kan, wid i d-​yeḥya Ɛisa ɛawden mmuten. Ihi, nezmer a s-​nini belli baṭel kan i ten-​id-​yerra ɣer tudert? Ala. Tiḥkayin-​a i d-​iheddṛen ɣef widak-​agi i d-​yeḥyan ţţakent-​aɣ-​d asirem yerna ţbegginent-​aɣ-​d belli aselmed, yellan deg Wedlis Iqedsen, iṣeḥḥa.

11. Amek i d-​tessenɛet teqsiṭ n Ilɛazar belli ayen yuran deg Umusnaw 9:5 d ṣṣeḥ?

¹¹ Adlis Iqedsen yesselmad belli wid yemmuten “ur ẓrin acemma.” (Amusnaw 9:5) Ur ddiren, ur ţkemmilen ţɛicin anda nniḍen. D ayen i d-​tessenɛet teqsiṭ n Ilɛazar. Mi d-​yuɣal ɣer tudert, eɛni yessedhec lɣaci s wayen i gwala zzeɛma deg igenni? Neɣ yessaged-​iten s tmucuha yessexlaɛen yeɛnan ǧahennama n tmes? Xaṭi. Ɛlaḥsab n Wedlis Iqedsen, mačči d ayen akk i d-​yeḥka. Di ṛbeɛ eyyam-​nni ideg yemmut, ur ‘yeẓri acemma.’ Yella igen kan di lmut.—Yuḥenna 11:11.

12. Acuɣer i nezmer a netḥeqqeq belli ḥeggu n Ilɛazar d ayen yeḍran s ṣṣeḥ?

¹² Taqsiṭ n Ilɛazar teţwerri-​d daɣen belli ḥeggu n lmeggtin d ayen yeḍran s ṣṣeḥ, mačči ţ-​ţamacahuţ. Ɛisa issker-​ed aḥbib-​is zdat n izumal n inagan. Ula d lɛulama n ddin, i gkeṛhen Ɛisa, ur nkiṛen ara belli yexdem lmuɛǧiza-​yagi. Atan wayen i d-​nnan: “D acu ara nexdem? Argaz inna [Ɛisa] ixeddem aṭas n limaṛat.” (Yuḥenna 11:47) Llan daɣen xilla n medden i d-​yusan ad ẓren lmegget-​agi i d-​yekkren. Daɣneţţa, aṭas n lɛibad nniḍen i gumnen s Ɛisa. Walan belli ayen yeḍran d Ilɛazar d ţţbut belli Ɛisa iceggeɛ-​it-​id  Ṛebbi. Seg wakken iǧhed ţţbut-​agi, kra n lɛulama n ddin Iyahudiyen, iwumi qquren wulawen, nudan ad nɣen Ɛisa w’ad rnun Ilɛazar.—Yuḥenna 11:53; 12:9-11.

13. Acu ara ɣ-​yeǧǧen a namen belli Yahwa yezmer a d-​yeḥyu lmeggtin?

¹³ D ṣṣwab ma neqbel belli ḥeggu n lmeggtin d ayen yellan s ṣṣeḥ? Ih, axaṭer Ɛisa yenna-​d belli yiwen wass a d-​ḥyun “wid meṛṛa yellan deg iẓekwan.” (Yuḥenna 5:28) Yahwa d Axellaq n tudert. Ihi, yewɛeṛ a namen belli yezmer ad iɛiwed a ţ-​id-​yexleq? Neẓra belli ayagi icudd mliḥ ɣer ccfawa-​ines. Izmer a d-​immekti wid ɛzizen fell-​aneɣ i gemmuten? D imelyaṛen n imelyaṛen n yetran i gɛemmṛen igenwan; xas akken, Ṛebbi yessen yal itri s yisem-​is. (Icɛaya 40:26) Yahwa Ṛebbi yezmer ihi ad yecfu ɣef wid i nḥemmel ula di leḥwayeǧ timecṭaḥ, yerna yezmer a ten-​id-​yerr ɣer tudert.

14, 15. Akken i t-​id-​yenna Yub, acu i d-​iţbegginen belli Yahwa yebɣa a d-​yesseḥyu lmeggtin?

¹⁴ Adlis Iqedsen yesselmad-​aɣ belli Yahwa iḥar (iɣṣeb) a d-​issker wid yemmuten. Amek i nezmer a netḥeqqeq s wayagi? Yub yellan d unṣiḥ, yenna: “Lemmer i d-​iḥeggu wemdan m’ara yemmet, ad ṣebreɣ.” Iţmeslay-​ed ɣef ṣṣber ara yeṣber deg uẓekka armi d ass ideg ara t-​id-​immekti Ṛebbi. Yenna-​yas i Yahwa: “A yi-​d-​tsiwleḍ, a k-​d-​rreɣ; aţ-​ţcedhiḍ ayen i xedmen ifassen-​ik.”—Yub 14:13-15.

¹⁵ Xemmem kan! Yahwa icedha wid yemmuten, iḥar a ten-​id-​yerr ɣer tudert. Mačči d ayen iţṣebbiren imi neɛlem belli iţḥussu ayagi? Lameɛna, d acu i neẓra ɣef ḥeggu-​yagi ara d-​yeḍrun ɣer zdat? Menhu ara d-​yeḥyun? Yerna anda ara d-​ḥyun?

16. Amek ara tili liḥala ideg ara d-​ḥyun lmeggtin?

¹⁶ Tiḥkayin n Wedlis Iqedsen i d-​iheddṛen ɣef wid i d-​yeḥyan sselmadent-​aɣ xilla n leḥwayeǧ ɣef ḥeggu ara  d-​yeḍrun ɣer zdat. Imdanen i d-​yuɣalen yakan ɣer tudert ɣef lqaɛa mlalen d wid i ḥemmlen. Akka ara teḍru d lɛibad ara d-​yeḥyun ɣer zdat, meɛna di liḥala izaden. Akken i t-​nwala deg yixef wis 3, Ṛebbi yeqsed ad yerr lqaɛa kamel d Lǧennet. Ihi, lmeggtin ur d-​ţţuɣalen ara ɣer tudert di ddunit iţwagezren si lgirrat, si tmenɣiwt akk-​d lehlak. A sen-​teţţunefk tegniţ akken ad ɛicen i lebda ɣef lqaɛa ideg ara yili sseɛd d lehna.

17. Anwi-​ten wid akk ara d-​yeḥyun?

¹⁷ Anwa ara d-​yeḥyun? Ɛisa yenna-​d belli “wid meṛṛa yellan deg iẓekwan a d-​slen i taɣect-​is [tin n Ɛisa]. A d-​ffɣen.” (Yuḥenna 5:28, 29) Yeţwakteb daɣen deg Uweḥḥi 20:13: “Lebḥeṛ iḍegger-​ed lmeggtin yellan ɣur-​es; lmut akw-​d laxeṛt [hadis, s tyunanit] ḍeggren-​d lmeggtin yellan ɣur-​sen.” “Hadis” iţmettil-​ed aẓekka i geţṛaǧun imdanen meṛṛa. (Ẓer timerna yeţţusemman: “D acu-ten ciyul akk-​d hadis?”) Aẓekka-​yagi ad yuɣal d lfareɣ (d ilem). Imelyaṛen n lɛibad i gellan deg-​s a d-​uɣalen ɣer tudert. Amceggeɛ Bulus yenna-​d belli ad yili “ḥeggu n iḥeqqiyen akw-​d imesbaṭliyen.” (Lecɣal 24:15) Amek i glaq a nefhem imeslayen-​agi?

18. Anwi-​ten kra seg wid yeţţusemman “iḥeqqiyen” ara d-​yeḥyun, yerna seg wacu ara k-​id-​issukkes usirem-​agi?

¹⁸ Ger wid iţţusemman “iḥeqqiyen”, llan waṭas n lɛibad iɣef i d-​iheddeṛ Wedlis Iqedsen i gɛacen uqbel a d-​yas Ɛisa ɣer lqaɛa. Teţxemmimeḍ ahat ɣer Nuḥ, Abṛaham, Ṣara, Musa, Rut d Istir, akk-​d waṭas nniḍen. Taktabt n Iɛebṛaniyen, ixef 11, teţmeslay-​ed ɣef kra seg yergazen ţ-​ţlawin-​agi yesɛan liman. Meɛna, ger “iḥeqqiyen” llan daɣen iqeddacen n Yahwa yemmuten di zzman-​nneɣ. Asirem n ḥeggu n lmeggtin yezmer a ɣ-​d-​issukkes si tugdi n lmut.—Iɛebṛaniyen 2:15.

19. Menhu i d “imesbaṭliyen”, yerna anta tagniţ ara sen-​yefk Yahwa s leḥmala?

¹⁹ “Imesbaṭliyen” d wid ur neqdic ara ɣef Yahwa neɣ ur  s-​nuɣ ara awal imi leɛmeṛ slin yis. Amek ara teḍru yid-​sen? Imelyaṛen-​agi n lɛibad a d-​ḥyun ula d nutni yerna ad sɛun lweqt akken ad issinen Ṛebbi n ṣṣeḥ w’ad qedcen fell-​as. Deg yiwet lmudda n walef iseggasen, lmeggtin a d-​uɣalen ɣer tudert w’a sen-​teţţunefk tegniţ akken ad rnun ɣer yemdanen unṣiḥen bac ad qedcen ɣef Yahwa. Zzman-​agi ad yili d axlaf. D wa i d zzman iwumi yeqqar Wedlis Iqedsen Ass n Lḥisab. b

20. Acu i d ǧahennama, yerna anwa ara iṛuḥen ɣer din?

²⁰ Amek yeɛni? A d-​kkren wid akk yemmuten? Xaṭi. Adlis Iqedsen yesselmad belli kra seg wid yemmuten atnan di “ǧahennama.” (Luqa 12:5) Ameslay-​agi “ǧahennama” yekka-​d seg yisem n yiwen ugudu yellan zik beṛṛa n Yarucalim. Sserɣayen dinna lǧifat akk-​d lewsex. Lmegget ara ḍeggren ɣer din, d win i ḥesben Iyahudiyen ur yestahel ara ad iţwanṭel neɣ a d-​yeḥyu. Ihi, ǧahennama teţmettil-​ed akken ilaq nnger n lebda. Ɛisa a d-​iger afus-​is di lḥisab n lḥeggtin akk-​d lmeggtin, meɛna d Yahwa i d Lqaḍi ameqran. (Lecɣal 10:42) D lmuḥal a d-​yessker si lmut wid i geḥseb d imcumen, i gugin ad beddlen.

21, 22. a) Acu n ṣṣenf nniḍen n ḥeggu i gellan? b) Anwa i d amezwaru i d-​yeḥyan akken ad iɛic deg igenni d ṛṛuḥ?

²¹ Adlis Iqedsen iheddeṛ-​ed daɣen ɣef ṣṣenf nniḍen n ḥeggu: ḥeggu s lǧeţţa n ṛṛuḥ i temɛict deg igenni. Ibder-​ed yiwen lemtel kan si ṣṣenf-​agi, ḥeggu n Ɛisa Lmasiḥ.

²² Asmi nɣan Ɛisa, yella d amdan; acu kan, Yahwa ur iɛemmed ara ad yeǧǧ Mmi-​s ɛzizen deg uẓekka. (Ahellil 16:10; Lecɣal 13:34, 35) Isseḥya-​t-​id, meɛna ur d-​yuɣal ara ɣer tudert d amdan. Amceggeɛ Buṭrus issefhem-​ed belli Lmasiḥ ‘yeţwanɣa di lǧeţţa, lameɛna yuɣal-​ed ɣer tudert  s ṛṛuḥ.’ (1 Buṭrus 3:18) Ayagi d lbeṛhan ameqran. Ɛisa iɛawed yuɣal d ṛṛuḥ iǧehden. (Ɣer-​ed 1 Ikurintiyen 15:3-6.) D neţţa yakk i d amezwaru i gesfaydin s ḥeggu-​yagi ifazen, acu kan, mačči d neţţa i d aneggaru.—Yuḥenna 3:13.

23, 24. Anwa i gţekkan di ‘tqeḍɛit tamecṭuḥt’ n Ɛisa, yerna acḥal yid-​sen?

²³ Imi i geẓra Ɛisa belli ad yuɣal s igenni, yenna-​yasen i inelmaden-​is unṣiḥen: “Ad ṛuḥeɣ a wen-​heggiɣ amkan.” (Yuḥenna 14:2) Wid ara iṛuḥen s igenni isemma-​yasen “taqeḍɛit tamecṭuḥt.” (Luqa 12:32) Acḥal n imasiḥiyen unṣiḥen ara yilin di terbaɛt-​agi tamecṭuḥt? Deg Uweḥḥi 14:1, yenna-​d wemceggeɛ Yuḥenna: “Ţmuquleɣ, dɣa walaɣ izimer nni [Ɛisa Lmasiḥ] ibedd ɣef wedrar n Ṣiyun, llan yid-​es meyya uṛebɛa uṛebɛin alef nni yesɛan isem-​is akw-​d yisem n Baba-​s uran ɣef yenyiren-​nsen.”

²⁴ Imasiḥiyen-​agi, yellan di 144 000 yid-​sen, ideg i ţekkan imceggɛen unṣiḥen n Ɛisa, a d-​ḥyun akken ad ɛicen deg igenni. Amceggeɛ Bulus yura belli ḥeggu-​yagi a d-​yeḍru di lweqt n tisin n Lmasiḥ. (1 Ikurintiyen 15:23) Akken ara t-​teẓreḍ deg yixef wis 9, aql-​aɣ la neţɛici di lweqt-​agi. Daɛneţţa, wid ara yemmten ass-​a seg widak i d-​yegran si 144 000 imasiḥiyen-​nni, a d-​ḥyun din din i temɛict deg igenni. (1 Ikurintiyen 15:51-55) Lameɛna, azgen ameqran seg yemdanen sɛan asirem a d-​ḥyun ɣer zdat bac ad ɛicen di Lǧennet ɣef lqaɛa.

25. Acu ara nwali deg yixef ara d-​itebɛen?

²⁵ D ṣṣeḥ, Yahwa ad yeɣleb lmut, taɛdawt-​nneɣ, yerna aţ-​ţɣab i dayem. (Ɣer-​ed Icɛaya 25:8.) Meɛna testeqsayeḍ ahat iman-​ik, teqqareḍ-​as: ‘Acu ara xedmen wid ara d-​yeḥyun deg igenni?’ Ad ţekkin deg yiwet n Tgelda ifazen. A d-​neḥfeḍ akteṛ ɣef lḥukuma-​yagi deg yixef ara d-​itebɛen.