YEƐQUB d Yuda llan d atmaten n Ɛisa s yemma-​tsen. Buṭrus d Yuḥenna, nutni, llan d imceggɛen. Uran di ṛebɛa yid-​sen sebɛa tebṛatin i nezmer a naf di Tira tiyunaniyin timasiḥiyin, yal yiwet s yisem n win i ţ-​yuran. Fkan lewṣayat i sen-​d-​iţţuweḥḥan s ṛṛuḥ iqedsen akken ad ɛiwnen imasiḥiyen ad qqimen d unṣiḥen ɣer Yahwa yerna ad kemmlen ad reṣṣin tamuɣli-​nsen ɣef Tgelda n Ṛebbi.

Liman. Ur ilaq ara kan a s-​nini nesɛa liman. Liman aḥeqqani yeţdemmir ɣer lefɛayel. Yeɛqub yura daɛneţţa: “Liman ur nesɛi ara lecɣal yelhan yemmut.” (Yeɛqub 2:26) Win ara iqablen cceddat s liman a d-​issis ṣṣber. Ma yebɣa ad yeṭṭef di liman-​is, ilaq ad yeḍleb lekyasa i Ṛebbi, mebla ma yesɛa ccekk a s-​d-​teţţunefk. Ma yeṣber ad yaf lemzeyya ɣer Ṛebbi. (Yeɛqub 1:2-6, 12) Yahwa yeţɛawan iqeddacen-​is yeţţaṭṭafen s liman di nnṣaḥa-​nsen. D ayen i d-​issefhem Yeɛqub mi gura: “Qeṛṛbet ɣer Sidi Ṛebbi, neţţa a d-​iqeṛṛeb ɣuṛ-​wen.”—Yeɛqub 4:8.

Imasiḥiyen ilaq ad sɛun liman iǧehden iwakken ad xaṣmen ajeṛṛeb d wayen i ten-​iţdemmiren ɣer lexsaṛa. Imi d ayen ifesden i sen-​d-​yezzin di lweqt-​nni, Yuda inha-​ten akka: “Aţ-​ţesɛum tazmert [akken] aţ-​ţḥadrem ɣef liman.”—Yuda 3.

Tikli. Yahwa yeţṛaǧu deg iqeddacen-​is ad ilin d imqeddsen, yeɛni ad ṣfun di yal taɣawsa. Buṭrus yenna: “Ilit teṣfam di tikli-​nwen [...] imi yura: Ilit teṣfam axaṭer nekk [Yahwa] ṣfiɣ.” (1 Buṭrus 1:15, 16) Buṭrus immeslay-​ed ɣef yiwen yellan d lemtel igerrzen i imasiḥiyen. Yenna-​d: “Lmasiḥ s yiman-​is inneɛtab fell-​awen, iǧǧa-​yawen-​d lemtel iwakken aţ-​ţeddum di lateṛ-​is.” (1 Buṭrus 2:21) Ɣas yenneɛtab walbeɛḍ axaṭer yetbeɛ leqwanen n Yahwa, ad ithedden lxaṭer-​is. (1 Buṭrus 3:16, 17) Buṭrus yenha imasiḥiyen. Acu i sen-​yenna? Di yiwet n tama, ilaq ad sɛun tikli yeṣfan w’a d-​sseknen tuṭṭfa-​nsen di Ṛebbi s lexdayem-​nsen. Di tama nniḍen, ilaq ad ţṛaǧun ass ideg ara d-​yesseɣli Ṛebbi lḥisab-​ines yerna ara yesbedd ddunit tajdiṭ anda “ara izdeɣ lḥeqq.”—2 Buṭrus 3:11-13.

Leḥmala. Amceggeɛ Yuḥenna yura belli “Ṛebbi d leḥmala.” Issken-​ed belli Ṛebbi ibeggen-​ed leḥmala-​s meṛṛa mi d-​iceggeɛ Ɛisa akken ad yili d asfel ara yekksen ddnubat n yemdanen. Ihi, ɣer wacu ara idemmer wannect-​a imasiḥiyen? Yuḥenna issefhem-​ed: “A wid eɛzizen, ma yella Sidi Ṛebbi iḥemmel-​aɣ annect-​agi, ilaq ula d nukni a nemyeḥmal wway gar-​aneɣ.” (1 Yuḥenna 4:8-11, 16) Ma steṛḥben imasiḥiyen s wid ukud i cerken liman d yiwen ţţawil ger wiyaḍ is ara d-​beggnen leḥmala-​yagi.—3 Yuḥenna 5-8.

Lameɛna, amek ara d-​sseknen iqeddacen n Yahwa belli ḥemmlen-​t neţţa? Yuḥenna yerra-​d lǧawab: “Ma nḥemmel Sidi Ṛebbi ilaq a neḥrez lumuṛat-​is; lumuṛat-​is ur ẓẓayit ara.” (1 Yuḥenna 5:3; 2 Yuḥenna 6) Wid yeţţaɣen awal i Ṛebbi zemren ad ţeklen belli a ten-​iḥemmel i “tudert yeţdumun.”—Yuda 21.

—Ayagi yers ɣef Yeɛqub; 1 Buṭrus; 2 Buṭrus; 1 Yuḥenna; 2 Yuḥenna; 3 Yuḥenna; Yuda.