XAYEL! Atan yusa-​d yiwen n ṭṭbib ad ixdem ɣer tama n wexxam-​ik. Di tazwara, ahat aţ-​ţkukruḍ aţ-​ţṛuḥeḍ ɣur-​es. Lameɛna kra si leḥbab-​ik ṛuḥen a t-​id-​ẓren, dɣa simma simma tlehhu ṣṣeḥḥa-​nsen. Ur k-​yeţţawi ara wannect-​a aţ-​ţebɣuḍ aţ-​ţṛuḥeḍ ɣur-​es akken k-​iǧewwez (k-​iẓer)?

Tira Iqedsen amzun cubant ṭṭbib-​agi. Kra n lɛibad ţkukrun a tent-​ssenqden. Lameɛna m’ara ssexdamen lewṣayat-​nsent, simma simma tlehhu tudert-​nsen. Atnah kra n lemtul:

Sumiatun teḥka-​d: “Di lewqat imezwura ideg i zewǧeɣ, ḥusseɣ am wakken argaz-​iw, Dumas, ur d-​iţţelhay ara deg-​i. Imi yeqber wul-​iw, acḥal n tikkal ţsuɣuɣ fell-​as, ṭṭeggireɣ dduzan fell-​as, yerna kkateɣ-​t ula ţ-​ţiyita. Tikwal ddemmaṛ issawaḍ-​iyi armi xessfeɣ (fessxeɣ).

“Asmi i yebda wergaz-​iw leqraya n Tira Iqedsen, ţmesxiṛeɣ fell-​as. Lameɛna, smeḥsiseɣ-​d s tuffra si texxamt i d-​iqerben tin ideg yeqqar. Yiwen wass, sliɣ i yefyar-​agi: ‘A tilawin, ḍuɛemt irgazen-​nkunt am akken i glaq aţ-​ţḍuɛemt Sidi Ṛebbi! [...] tameṭṭut ilaq aţ-​ţqadeṛ argaz-​is.’ (At Ifasus 5:22, 33) Imeslayen-​a kecmen ɣer wul-​iw. Ḍelbeɣ ssmaḥ i Ṛebbi imi qehreɣ argaz-​iw yerna dɛiɣ ɣur-​es akken a yi-​iɛiwen ad uɣaleɣ ţ-​ţameṭṭut yifen tin i lliɣ zik. Iɛedda cwiṭ n lweqt, nekk d wergaz-​iw nebda lwaḥid leqraya n Tira Iqedsen.”

Yura diɣen di Tira Iqedsen: “Irgazen ilaq ad ḥemmlen tilawin-​nsen am lǧeţţat-​nsen.” (At Ifasus 5:28) Sumiatun tenna-​d: “Ayen i neḥfeḍ deg Wawal n Ṛebbi ibeddel-​aɣ di sin. Tura uɣeɣ tannumi ţţawiɣ afenǧal n llatay i wergaz-​iw m’ara d-​ikcem si lxedma yerna heddṛeɣ-​as s leḥnana. Ma d neţţa yesbeggin-​iyi-​d akteṛ leḥmala-​s yerna yeţɛawan-​iyi di ccɣel n wexxam. Nexdem lmeǧhud akken a ‘nili d iḥninen w’a nemsamaḥ wway gar-​aneɣ.’ (At Ifasus 4:32) Daɣneţţa, leqder d leḥmala i nesɛa wway gar-​aneɣ simma ţnernin. Tura, 40 iseggasen ayagi seg wasmi i nella d iseɛdiyen di zzwaǧ. Lewṣayat tukyisin n Wawal n Ṛebbi ḥurbent ɣef zzwaǧ-​nneɣ.”

Tayib yenna-​d: “Zik, lliɣ d aqehhar. Zgiɣ ţekkiɣ deg ubunyiw. Acḥal d abrid ţgallaɣ deg wiyaḍ s tmeẓyant, yerna kkateɣ tameṭṭut-​iw Kustriyah. Ssawaḍeɣ-​ţ ula ɣer lqaɛa m’ara zeɛfeɣ. Lɣaci ţţagaden-​iyi.

“Yiwen wass, ɣriɣ imeslayen-​agi i d-​inna Ɛisa: ‘A wen-​d-​fkeɣ yiwen n lameṛ d ajdid: “myeḥmalet wway gar-​awen akken i kkun-​ḥemmleɣ.”’ (Yuḥenna 13:34) Lehduṛ-​agi kecmen mliḥ s ul-​iw, dɣa qesdeɣ ad beddleɣ tikli. M’ara ţḥussuɣ iţţali-​yi-​d zzɛaf, deɛɛuɣ ɣer Ṛebbi akken a yi-​iɛiwen ad thenniɣ, dɣa zzɛaf-​iw ur iţɛeṭṭil ara iţekkes-​iyi. Nekk ţ-​ţmeṭṭut-​iw nessexdem di tudert-​nneɣ lewṣaya yuran deg wat Ifasus 4:26, 27: ‘Ilaq a wen-​yekkes wurrif uqbel ad yeɣli yiṭij; ur ţţaǧat ara abrid i Cciṭan.’ Neɣra Tira Iqedsen yerna neẓẓull lwaḥid mkul m’ara d-​yeɣli yiḍ. Annect-​a yesṛuḥ lḥerṣ i neţmager deg wass yerna yesseǧhed lɛalaqat-​nneɣ.

“Tura lɣaci ḥesben-​iyi d argaz amhenni. Tameṭṭut-​iw d warraw-​iw ḥemmlen-​iyi yerna ţqadaren-​iyi. Sɛiɣ aṭas n leḥbab yerna ḥusseɣ qerbeɣ ɣer Ṛebbi. Feṛḥeɣ s ṣṣeḥ.”

Goin yeḥka-​d: “Zik, ţmenṭareɣ nekk d yiwet n terbaɛt n yelmeẓyen. Ţkeyyifeɣ aṭas dduxxan, yerna mačči tikkelt mačči snat ideg i ṭṭṣeɣ di beṛṛa, sekṛeɣ maḍi. Tesseɣ yerna znuzuyeɣ n lkif i ţeffreɣ zdaxel n tebluzt-​iw yeţqerriɛen tirṣaṣin. Ɣas akken ţţarraɣ iman-​iw weɛṛeɣ, ɣer daxel tezga tezdeɣ-​iyi tugdi.

“Umbeɛd, yella win i yi-​d-​isseknen afir-​agi: ‘A mmi, ur teţţu ara lqanun-​iw [...] axaṭer teɣzi n leɛmeṛ, iseggasen n tudert akk-​d lehna a k-​ţţunefken s zzyada.’ (Lemtul 3:1, 2) Teɣzi n leɛmeṛ  ţ-​ţemɛict n lehna, d ayen swaswa i ţnadiɣ! Ɣriɣ diɣen: ‘A wid eɛzizen, imi i ɣ-​d-​ţţunefkent lemɛahdat-​agi, ilaq a nessizdeg iman-​nneɣ seg wayen akk issenǧasen lǧeţţa-​nneɣ akk-​d wulawen-​nneɣ iwakken a nkemmel tezdeg n tikli-​nneɣ akk-​d Sidi Ṛebbi, s ṭṭaɛa d wannuz.’ (2 At Kurintus 7:1) Ihi, ḥebseɣ tissit n dduxxan, n ccṛab d lkif, ǧǧiɣ tarbaɛt-​nni ukud i ţdukkuleɣ yerna uɣaleɣ d aqeddac n Ṛebbi.

“Tura 17 iseggasen ayagi seg wasmi i ttaxxṛeɣ i tissit n dduxxan, n ccṛab d lkif. Sɛiɣ ṣṣeḥḥa n lɛali, leḥbab yelhan, tawacult-​iw tella di sseɛd yerna ithenna lxaṭer-​iw. Ideg ara ţţexnunuseɣ d asekṛani deg iberdan, sɛeddayeɣ uḍan meṛṛa deg wusu-​inu.”

Bambang yeḥka-​d: “Asmi i lliɣ d ilemẓi, ffɣeɣ i iberdan. Amur ameqran seg wigad i ḥeqreɣ kkan-​d seg yiwen wedrum i keṛheɣ nezzeh.

“Lameɛna, iɛedda kra n lweqt, bdiɣ ţqellibeɣ ɣef Ṛebbi. Ayagi yewwi-​yi ɣer yiwet n terbaɛt i geţnejmaɛen akken ad ɣren Tira Iqedsen. Deg inejmuɛen-​nsen, kra seg wedrum-​nni i keṛheɣ steṛḥben yis-​i. Yerna walaɣ belli aṭas n ccetlat i geţţemlilin di lehna d lfeṛḥ deg inejmuɛen-​nsen. Ggummeɣ ad amneɣ! Imiren-​nni i fehmeɣ afir i d-​iqqaren: ‘Sidi Ṛebbi ur ixeddem ara lxilaf ger yemdanen. Lameɛna di mkul lǧens, yal amdan i t-​yeţḍuɛun, ixeddmen ayen yellan d lḥeqq, iɛǧeb-​as i Ṛebbi.’​—Lecɣal 10:34, 35.

“Tura, lkeṛh n ccetlat nniḍen ur yeqqaz ara deg wul-​iw am ssem. Kra seg yeḥbiben-​iw imeqranen kkan-​d seg wedrum-​nni i keṛheɣ zik. S Tira Iqedsen, Ṛebbi isselmed-​iyi ad ḥemmleɣ.”

Garoga yeḥka-​d: “Mazal-​iyi d ilemẓi mi ṛuḥeɣ tlata iberdan ɣer lḥebs: sin iberdan ɣef tukerḍa, yiwen webrid axaṭer wteɣ argaz s leqher s lmus. Umbeɛd, ddiɣ akk-​d yiwet n terbaɛt n yemɛuṣa yerna nɣiɣ xilla n lɛibad. Mi gekfa imenɣi, uɣaleɣ d aqerru n yiwet n terbaɛt  iţekksen s ddreɛ i wiyaḍ ayen i sɛan. Irgazen yeţdafaɛen fell-​i teddun yid-​i anda ma ddiɣ. Lliɣ d aqehhar yerna ţţagaden-​iyi medden.

“Meɛna, yiwen wass ɣriɣ lehduṛ-​ayi: ‘Leḥmala n tideţ teţţawi-​d ṣṣbeṛ, leḥmala teţɛawan, leḥmala ur tesɛi ara tismin, ur tesɛi ara zzux, win yesɛan leḥmala deg ul-​is ur yeţcekkiṛ ara iman-​is. Win yesɛan leḥmala n tideţ ur iţnadi ara ad ixdem cceṛ, ur yeţnadi ara ɣef nnfeɛ-​ines, ur izeɛɛef ur yeţţaṭṭaf cceḥnat.’ (1 At Kurintus 13:4, 5) Imeslayen-​a ḥuzan ul-​iw. Ṛuḥeɣ ad zedɣeɣ deg wemkan nniḍen, ɣriɣ Tira Iqedsen yerna ssexdmeɣ lewṣayat-​nsent di tudert-​iw.

“Tura ur lliɣ ara d aqehhar. Sɣarayeɣ wiyaḍ ɣef Wawal n Ṛebbi yerna ţqadaren-​iyi medden. Tudert-​iw tesɛa lmeɛna.”

Tiḥkayin-​agi akk-​d tiyaḍ beggnent-​ed belli “awal n Sidi Ṛebbi d awal n tudert yesɛan tazmert.” (Iɛebṛaniyen 4:12) Lewṣayat-​is sehlent, ṣelḥent yerna nefɛent-​aɣ.

Tira Iqedsen zemrent a k-ɛiwnent ula d keččini? Ih, bla ccekk yerna akken yebɣu yili wugur i teţmagareḍ. “Yal tira iqedsen s ɣuṛ Ṛebbi i d-​tekka yerna twulem i uselmed, i usefhem, i nehhu akk-​d ţṛebga deg webrid n lḥeqq, iwakken yal aqeddac n Sidi Ṛebbi ad yili d amdan ikemlen i gwulmen i yal ccɣel yelhan.”​—2 Timuti 3:16, 17.

A nwali ihi kra n leḥwayeǧ yellan d lsas i sselmadent Tira iqedsen.