TIMEƔRI 2
Ribka tebɣa aţ-ţessefṛeḥ Yahwa
Ribka ţ-ţameṭṭut i gḥemmlen Yahwa. Argaz-is isem-is Isḥaq; yella iḥemmel Yahwa ula d neţţa. Amek i tessen Ribka Isḥaq yerna amek i d-tessken belli tebɣa aţ-ţessefṛeḥ Yahwa? A d-nemmeslay qbel ɣef Isḥaq.
Isḥaq yella yezdeɣ akk-d imawlan-is di tmurt n Kanɛan. Baba-s isem-is Abṛaham, yemma-s Ṣara. Di tmurt-agi, lɛibad ur ţţamnen ara s Yahwa, meɛna Abṛaham yebɣa-yas i mmi-s ad yezweǧ akk-d tmeṭṭut yeţţamnen s Yahwa. Ihi, Abṛaham iceggeɛ aqeddac-is a d-yawi tameṭṭut i Isḥaq si Ḥaṛan, anda akken i zedɣen wid i s-yeţţilin.
Ribka teqbel aţ-ţexdem s lǧehd-is akken a d-tagem aman i ileɣman.
Aqeddac-nni, ahat d Iliɛizir, iṛuḥ neţţa akk-d iqeddacen nniḍen n Abṛaham ɣer wemkan-agi ibeɛden mliḥ. Wwin yid-sen ɛecṛa ileɣman, ɛebban-asen lmakla akk-d leḥwayeǧ ara fken d lehdeyyat. Amek ara iẓer Iliɛizir anta tameṭṭut ara d-yextiṛ i Isḥaq? Mi gelḥeq ɣer Ḥaṛan, yeḥbes ɣer yiwen n lbir neţţa akk-d iqeddacen-nni nniḍen, axaṭer yeɛlem belli ur ţɛeṭṭilen ara a d-ffɣen medden akken ad agmen aman. Iliɛizir yeẓẓull i Yahwa, yenna-yas: “Lukan ad ḍelbeɣ i yiwet n tlemẓit a yi-d-tefk aman, neţţat aţ-ţeqbel yerna a sen-tefk ula i ileɣman-inu, imiren ad ẓreɣ belli ţ-ţinna i textaṛeḍ ţ-ţameṭṭut i Isḥaq.”
Aţţaya telḥeq-ed ɣer lbir yiwet n tlemẓit iwumi i qqaren Ribka. Adlis Iqedsen yenna-d belli tecbeḥ mliḥ. Iliɛizir iḍleb-as a s-d-tefk cwiṭ n waman. Terra-yas-d: “Yirbeḥ. A k-d-fkeɣ aman, yerna ad ṛuḥeɣ a d-agmeɣ ula i ileɣman-ik.” Xemmem kan. Ileɣman i gfuden tessen aṭas! Ihi, ilaq-as i Ribka aţ-ţazzel xilla n iberdan ɣer lbir. Twalaḍ-ţ ɣef ţţeswiṛa amek i la txeddem s lǧehd-is?— Iliɛizir yewhem amek i s-d-yerra Yahwa leǧwab ɣef tẓallit-ines.
Iliɛizir yefka aṭas n leḥwayeǧ icebḥen i Ribka. Mbeɛd, teɛreḍ-it s axxam-nsen neţţa akk-d iqeddacen-nni nniḍen. Mi leḥqen ɣer din, Iliɛizir issefhem-asen iwacu i t-id-iceggeɛ Abṛaham ɣer dagi d wamek i s-d-yerra Yahwa leǧwab i tẓallit-ines. Imawlan n Ribka qeblen aţ-ţṛuḥ aţ-ţezweǧ akk-d Isḥaq.
Ribka tṛuḥ ɣer Kanɛan akk-d Iliɛizir bac aţ-ţezweǧ d Isḥaq.
I Ribka tebɣa aţ-ţezweǧ akk-d Isḥaq? Acu i tenniḍ?— Ribka tefhem belli d Yahwa i d-iceggɛen Iliɛizir. Ihi, mi ţ-steqsan imawlan-is ma tebɣa aţ-ţṛuḥ ɣer Kanɛan bac aţ-ţuɣal ţ-ţameṭṭut n Isḥaq, tenna-yasen: “Anɛam, bɣiɣ ad ṛuḥeɣ.” Imiren kan tedda d Iliɛizir. Mi wwḍen ɣer Kanɛan, tezweǧ neţţat d Isḥaq.
Imi i texdem Ribka ayen i gebɣa Yahwa, Yahwa ixdem-as lxiṛ. Aṭas aṭas n iseggasen umbeɛd, Ɛisa ilul-ed si dderya n dderya-s! Ma txedmeḍ ayen ara yessefṛḥen Yahwa, am Ribka, a k-yexdem lxiṛ ula i keččini.
