D Yahwa a i d-​yeǧǧan zzwaǧ amezwaru. Adlis Iqedsen inna-​d belli mi d-​yexleq Ṛebbi tameṭṭut, yeɛni Ḥewwa, “yebbwi-​yas-​ţ i Adam.” Adam yefṛeḥ ayendin, dɣa yenna: “Ţ-​ţagi i d iɣes n yeɣsan-​iw, i ţ-​ţacriḥt n tecriḥt-​iw.” (Laṣel n ddunit 2:22, 23) Ar ass-​a, Yahwa mazal-​it yebɣa-​yasen i imezwaǧen ad ilin d iseɛdiyen.

M’ara tzewǧeḍ, a k-​d-​iban am wakken kullec igerrez. b Meɛna ɣur-​ek aţ-​ţɣelṭeḍ, ula d argaz ţ-​ţmeṭṭut yemyeḥmalen s ṣṣeḥ ţţemlilin-​d cceddat di zzwaǧ-​nsen. (1 Ikurintiyen 7:28) Di treẓẓit-​agi, aţ-​ţafeḍ kra n imenzayen (lumuṛ) n Wedlis Iqedsen. Ma yella tṭebbqeḍ-​ten, a k-​d-​awin sseɛd i kečč ţ-​ţmeṭṭut-​ik akk-​d twacult-​ik.—Ahellil 19:9-12.

AYEN I D-​IQQAR WEDLIS IQEDSEN: Amezwaǧ d neţţa i d aqerru n twacult.—Ifasusiyen 5:23.

Kečč, ay amezwaǧ, Yahwa yebɣa-​yak a d-​telhiḍ ţ-​ţmeṭṭut-​ik s leḥnana. (1 Buṭrus 3:7) Ixleq-​iţ-​id ţ-​ţamɛiwent ara yilin ţ-​ţamtilt-​ik yerna yebɣa a s-​tefkeḍ lḥeṛma w’a s-​d-​tbeggneḍ leḥmala. (Laṣel n ddunit 2:18) Seg wakken ara tiǧhid leḥmala i ţ-​tḥemmleḍ, aţ-​ţebɣuḍ nnfeɛ-​is wala nnfeɛ-​ik.—Ifasusiyen 5:25-29.

Kem, a tameṭṭut, Yahwa yebɣa aţ-​ţqadreḍ mliḥ argaz-​im w’a t-​tɛiwneḍ ad yexdem ccɣel i s-​iţţunefken. (1 Ikurintiyen 11:3; Ifasusiyen 5:33) Qebbel leqrarat i geţţaṭṭaf yerna ţɛawan-​it seg wul. (Ikulusiyen 3:18) Ma yella txeddmeḍ akka, aţ-​ţiliḍ tcebḥeḍ ama ɣer wergaz-​im ama ɣer Yahwa.—1 Buṭrus 3:1-6.

AYEN I TZEMREḌ AŢ-​ŢXEDMEḌ:

• Ḍleb i tin ukud i tzewǧeḍ a k-​d-​tini amek i tzemreḍ aţ-​ţiliḍ d amezwaǧ n lɛali. Ḥesses akken ilaq i leǧwab ara k-​d-​tefk, txedmeḍ ayen akk iwumi i tzemreḍ bac aţ-​ţwennɛeḍ ssira-​k

• Sɛu ṣṣber. Ilaq lweqt i kečč ţ-​ţmeṭṭut-​ik bac aţ-​ţeẓrem amek i gezmer mkul yiwen seg-​wen ad issefṛeḥ wayeḍ

AYEN I D-​IQQAR WEDLIS IQEDSEN: Ilaq aţ-​ţeţnadiḍ ɣef nnfeɛ n tmeṭṭut-​ik. (Ifilibiyen 2:3, 4) Ţţak-​as azal, teţmektiḍ-​d belli Yahwa yeţweṣṣi yal yiwen seg iqeddacen-​is unṣiḥen “ad yiḥnin.” (2 Timutawus 2:24) “Win iheddṛen mebla ameyyez iţjerriḥ am ujenwi; iles n wukyisen, d ddwa.” Ihi, ţţextiṛi akken ilaq imeslayen-​ik. (Lemtul 12:18) Ṛṛuḥ n Yahwa a k-​iɛiwen aţ-​ţheddṛeḍ s leḥnana akk-​d leḥmala.—Igalatiyen 5:22, 23; Ikulusiyen 4:6.

AYEN I TZEMREḌ AŢ-​ŢXEDMEḌ:

• Uqbel aţ-​ţhedṛeḍ ţ-​ţmeṭṭut-​ik ɣef temsal yesɛan azal, ẓẓall i Ṛebbi a k-​iɛiwen akken aţ-​ţeqqimeḍ tetheddneḍ w’aţ-​ţqebbleḍ ṛṛay yemxallafen ɣef ṛṛay-​ik

• Xemmem mliḥ ɣef wayen ara d-​tiniḍ d wamek ara t-​id-​tiniḍ

AYEN I D-​IQQAR WEDLIS IQEDSEN: Segmi i tzewǧeḍ, tuɣalem kečč ţ-​ţmeṭṭut-​ik “d yiwet n lǧeţţa.” (Matta 19:5) Meɛna, mkul yiwen deg-​wen yezmer ad yesɛu ṛṛay yemxallafen ɣef ṛṛay n wayeḍ. Ilaq-​awen ihi aţ-​ţissinem amek ara teddukklem deg wayen i teţxemmimem d wayen i teţḥussum. (Ifilibiyen 2:2) Telzem-​awen tdukli m’ara tţeṭṭfem leqrarat. Adlis Iqedsen yeqqar-​ed: “Leɛzayem ţţalin s ccweṛ.” (Lemtul 20:18) Ţţaǧǧat imenzayen n Wedlis Iqedsen a ken-​wellhen kul m’ara teṭṭfem lwaḥid leqrar yesɛan azal.—Lemtul 8:32, 33.

AYEN I TZEMREḌ AŢ-​ŢXEDMEḌ:

• Ur qqar ara kan i tmeṭṭut-​ik ayen iwumi i tesliḍ neɣ ayen i teţxemmimeḍ, qqar-​as daɣen ayen i teţḥussuḍ

• Uqbel aţ-​ţqesdeḍ ɣer lḥaǧa, ẓer acu i teţxemmim