TIDEŢ ɣef wacu? Γef kra n yesteqsiyen imeqranen iɣef i gnuda si zik wemdan. Atnan kra seg-​sen:

• Ṛebbi yeţḥebbiṛ s ṣṣeḥ fell-​aɣ?

• A d-​yas wass anda ara fakkent lgirrat d lemḥayen?

• Acu iḍerrun m’ara nemmet?

• Yella usirem i wid yemmuten?

• Amek ara dεuɣ ɣer Ṛebbi akken ad ţwaqebleɣ?

• Amek ara afeɣ sseεd?

Anda ara tqellbem leǧwab i yesteqsiyen-​a? Ma testeqsam lɣaci, yal yiwen amek ara wen-​d-​yerr awal. U ma testeqsam amɣar azemni d ineḥkamen n ddyanat, aţ-​ţafem leǧwab-​nsen yemxallaf. Ayen i d-​ibanen yemεen ass-​a di leǧwab-​nsen, azekka a t-​yeǧǧ zzman.

Lameεna, yella yiwen wedlis i d-​iţţarran leǧwab yuklalen leţkal. Ala tideţ i gellan deg wedlis-​a. Σisa Lmasiḥ yenna di yiwet n tẓallit i Ṛebbi: “Awal-​ik i ţ-​ţideţ.” (Yuḥenna 17:17) Awal-​agi d Adlis Iqedsen. Tawerqeţ-​agi a wen-​d-​tefk kra n leǧwab iṣeḥḥan yerna isehlen i lefhama yellan deg Wedlis Iqedsen ɣef yesteqsiyen i neẓra uqbel.

IWACU ASTEQSI-​YAGI: Neţεic di ddunit yeččuṛen d cceṛ akk-​d ẓẓur (lbaṭel). Aṭas n ddyanat i yesselmaden belli d Ṛebbi i gebɣan a ɣ-​ijeṛṛeb s lemḥayen.

AYEN YESSELMAD WEDLIS IQEDSEN: D lmuḥal ad yexdem Ṛebbi cceṛ. “Ṛebbi n ṣṣeḥ Bu Tezmert, d lmuḥal ad ixdem cceṛ d lbaṭel!” i d-​inna Yub 34:10. Ṛebbi yebɣa lxiṛ i yemdanen. Γef wannect-​a i ɣ-​isselmed Σisa a neẓẓall akka: “A Baba-​tneɣ yellan deg igenwan, [...] lḥekma n tgeldit-​ik a d-​tass, lebɣi-​k ad idṛu di lqaεa akken yedṛa deg igenwan.” (Matta 6:9, 10) Ṛebbi yeţḥebbiṛ aṭas fell-​aɣ armi yexdem ayen akk ilaqen akken leqsed-​is ad yeḍru.—Yuḥenna 3:16.

Walit diɣen Laṣel n ddunit 1:26-28; Yeεqub 1:13 akk-​d 1 Buṭrus 5:6, 7.

IWACU ASTEQSI-​YAGI: Mazal lgirrat gellunt s luluf n yemdanen. Ulac win ur tḥuz ara lmeḥna.

AYEN YESSELMAD WEDLIS IQEDSEN: Ṛebbi icar-​ed ɣef yiwen n lawan anda ara d-​yawi lehna ɣef lqaεa meṛṛa. Ddaw n Tgelda-​s, lḥekma n igenwan, imdanen “ur ḥeffḍen ara lgirra.” Lameεna, ad “rren iskiyen-​nsen ţ-​ţigwersa n tyerza.” (Icεaya 2:4) Ṛebbi s yiman-​is ad ikkes lbaṭel d lemḥayen. Adlis Iqedsen iwεed-​ed: “[Ṛebbi] a sen-​yesfeḍ imeṭṭawen, ur teţţili lmut, ur yeţţili leḥzen, ur yeţţili umeǧǧed ur yeţţili lqeṛḥ axaṭer leḥwayeǧ timezwura [gar-​asent lbaṭel d lemḥayen n wass-​a] εeddant ur ţεawadent ara a d-​uɣalent.”—Aweḥḥi 21:3, 4.

Walit diɣen Ahellil 37:10, 11; 46:9 akk-​d Mixa 4:1-4.

IWACU ASTEQSI-​YAGI: Lketṛa n ddyanat sselmadent belli tella lḥaǧa daxel n lεebd yeţţidiren mbeεd lmut. Kra umnen belli wid yemmuten zemren ad xedmen lexsaṛa i wid yeddren. Γur-​sen Ṛebbi yeţεaqab imcumen i dima deg uḥeǧǧaǧu n tmes.

AYEN YESSELMAD WEDLIS IQEDSEN: Tfukk temεict ɣef yemdanen m’ara mmten. “Wid yemmuten [...] ur ẓṛin acemma”, i d-​inna Umusnaw 9:5. Imi lmeggtin ur ţḥussun, ur ẓrin acemma, ɣef waya ur zmiren ara ad xedmen cceṛ neɣ ad εiwnen wid yeddren.—Ahellil 146:3, 4.

Walit diɣen Laṣel n ddunit 3:19 akk-​d Umusnaw 9:6, 10.

IWACU ASTEQSI-​YAGI: Nebɣa a nεic, yerna nebɣa a nesεeddi tudert-​nneɣ di lfeṛḥ d wid i nḥemmel. Γef wayagi i nessaram a nwali wid εzizen fell-​aɣ yemmuten.

AYEN YESSELMAD WEDLIS IQEDSEN: Lketṛa n lɣaci yemmuten a d-​kkren. Σisa yewεed: “wid akk yellan deg iẓekwan [...] a d-​kkren.” (Yuḥenna 5:28, 29) Wid ara d-​yeḥyun am yemdanen ad izmiren ad εicen ɣef lqaεa yuɣalen meṛṛa d lǧennet, am wakken yella di leqsed n Ṛebbi di tazwara. (Luqa 23:43) Lweεd-​a n Ṛebbi ara yeḍrun ɣer zdat, a d-​yeglu s ṣṣeḥḥa ikemlen ţ-​ţudert n dima i yemdanen yeţţaɣen awal. Adlis Iqedsen yefka-​yaɣ-​d ṭṭmana-​yagi: “Iḥeqqiyen ad kesben lqaεa, u fell-​as ad zedɣen i dima.”—Ahellil 37:29.

Walit diɣen Yub 14:14, 15; Luqa 7:11-17 akk-​d Lecɣal 24:15.

IWACU ASTEQSI-​YAGI: Wid akk yeṭṭfen di ddin ţẓallan. Lameεna, aṭas deg-​sen ţḥussun am wakken tiẓalliwin-​nsen ur ţwaqeblent ara.

AYEN YESSELMAD WEDLIS IQEDSEN: Σisa isselmed-​aɣ belli ur ilaq ara a neḥfeḍ tiẓalliwin-​nneɣ am waman w’a sent-​neţεawad. Inna-​d: “M’ara teţẓallam, ur sṭuqqutet ara lehduṛ am akken xeddmen at ddunit, ɣilen s lketṛa n imeslayen ara d-​ţwaqeblen.” (Matta 6:7) Ma nebɣa a ɣ-​d-​issemḥess Ṛebbi, ilaq-​aɣ a neẓẓall am wakken yebɣa neţţa. Γef wakka, ilaq-​aɣ a nelmed d acu-​t lebɣi-​s, w’a neẓẓall εlaḥsab n wayen neεlem. Neqqar di 1 Yuḥenna 5:14: “Ma nessuter-​as kra yellan di lebɣi-​s, yeţḥessis-​aɣ-​d.”

Walit diɣen Ahellil 65:2; Yuḥenna 14:6, 14 akk-​d 1 Yuḥenna 3:22.

IWACU ASTEQSI-​YAGI: Xilla n lɣaci i gumnen belli, idrimen, cciεa neɣ ccbaḥa a sen-​d-​awin sseεd. Ţnadin akk ɣef lecɣal-​a, lameεna sseεd irewwel fell-​asen.

AYEN YESSELMAD WEDLIS IQEDSEN: Σisa yefka-​d tasaruţ n sseεd s imeslayen-​a: “D iseεdiyen wid iẓran d imeɣban i yellan di leḥwayeǧ n ṛṛuḥ.” (Matta 5:3, Les Saintes Écritures. Traduction du monde nouveau). Sseεd-​nneɣ n ṣṣeḥ a ɣ-​d-​yas ma yella nesseqneε lmeḥwiǧa-​nneɣ yugaren akk tiyaḍ: Tamusni n tideţ ɣef Ṛebbi d lmeqsud-​is ɣur-​neɣ. Tideţ-​a tella deg Wedlis Iqedsen. Tamusni-​ines a ɣ-​tεiwen akken a neεqel ayen yesεan azal ameqran d wayen ur t-​nesεi ara. Ma neǧǧa tideţ n Wedlis Iqedsen a ɣ-​twelleh di lecɣal-​nneɣ akk-​d ṛṛay i neţţaṭṭaf, tudert-​nneɣ aţ-​ţesεu akteṛ n lmeεna.—Luqa 11:28.

Walit diɣen Lemtul 3:5, 6, 13-18 akk-​d 1 Timuti 6:9, 10.

 Drus kan n leǧwab i nmuqel deg Wedlis Iqedsen ɣef seţţa yesteqsiyen-​a. Tebɣam aţ-​ţlemdem akteṛ? Bla ccekk, ma tellam ger wid “iẓran d imeɣban i yellan di leḥwayeǧ n ṛṛuḥ”. Ahat testeqsayem diɣen: ‘Ma Ṛebbi yeţḥebbiṛ fell-​aɣ, ayɣer iεemmed i wannect-​a n cceṛ d lemḥayen seg wasmi i tebda ddunit? Amek ara seggmeɣ xiṛ tudert n twacult-​iw?’ Adlis Iqedsen yeţţarra-​d awal s lekmal u s leqneε i yesteqsiyen-​a d wiyaḍ meṛṛa.

Lameεna, aṭas n yemdanen i gkukran ad muqlen Adlis Iqedsen, axaṭer ur t-​ssinen ara yerna ur uɣen ara tannumi yid-​es. Tebɣam a ken-​nεiwen akken aţ-​ţafem leǧwab deg Wedlis Iqedsen i yesteqsiyen-​nwen meṛṛa? Inagan n Yahwa a wen-​d-​fken sin n ţţawilat.

Di tazwara, adlis Acu yesselmad s ṣṣeḥ Wedlis Iqedsen? yeţwaxdem akken ad iεiwen lεibad ur nesεi ara lweqt iwakken ad muqlen leǧwab isehlen i d-​yeţţak Wedlis Iqedsen ɣef temsal timeqranin. Ţţawil wis sin, ţ-​ţaɣuri n Wedlis Iqedsen iwulmen i lmeḥwiǧat-​nwen. Mebla lexlaṣ, yiwen n lǧaṛ-​nwen i gqefzen yezmer a d-​yas, yal dduṛt ɣer wexxam-​nwen neɣ ɣer wemḍiq nniḍen i ken-​isuεden, ad isεeddi cwiṭ n lweqt yid-​wen akken a wen-​d-​immeslay ɣef Wedlis Iqedsen. D imelyan n lɣaci di ddunit meṛṛa i gesfaydin s tɣuri-​yagi. Γer taggara, aṭas gar-​asen i gfeṛḥen u nnan: “Ufiɣ tideţ!”

Ulac agerruj i ţ-​yifen! Tideţ n Wedlis Iqedsen tessufuɣ-​aɣ-​d seg ukukru, si lexṛeb ţ-​ţugdi n diri. Teţţak-​aɣ-​d asirem d lmeεna i tudert-​nneɣ yerna teţţarra-​yaɣ d iseεdiyen. Σisa yefka-​d lemεahda-​ya: “Aţ-​ţissinem tideţ, tideţ ara kkun-​issufɣen ɣer tlelli.”—Yuḥenna 8:32.