Masha ni gaw Hkristu Yesu sharin achyin ya ai lam ni hpe akyu jashawn nna, “Hkristan” hpung amyu myu hpe hpawng de hpang wa ai. Raitim, teng man ai Hkristan hpung gaw langai sha nga ai ngu Chyum Laika hta tsun da ai. Hpa majaw dai hku tsun ai kun? Lam 3 hpe yu yu ga.

1.   “Teng man ai lam” hpe sharin ya wa ai ngu Yesu tsun wa ai. Shawng nnan na Hkristan ni mung shanhte a hpung hpe “teng man ai lam” re ngu tsun wa ai. (Yawhan 8:32; 2 Petru 2:2; 2 Yawhan 4; 3 Yawhan 3) Dai majaw, Yesu a sharin achyin ya ai lam ni hte n bung ai lam ni hpe sharin ya nga ai ni gaw, teng man ai Hkristan ni n re ai hpe chye lu ai.

2.   Hkristan yawng gaw, “ga langai sha tsun” ging ai ngu Chyum Laika hta tsun da ai. (1 Korinhtu 1:10) Raitim, Hkristan byin na matu hpyi shawn da ai lam ni hte seng ai madung sharin achyin lam ni hta pyi, Hkristan hpung ni myit n hkrum nga ma ai. Dai majaw, Hkristan hpung yawng hpe teng man ai Hkristan hpung re ngu n mai tsun ai.—1 Petru 2:​21.

3.   Hkristan re ai ngu tsun ai ni law malawng gaw, Yesu hkang da ai lam ni hpe hkan sa na n re ai majaw shanhte hpe shi hkap la na n re ngu Chyum Laika hta tau hkrau tsun da ai. (Mahte 7:21-23; Luka 6:46) Tinang akyu a matu teng man ai nawku daw jau lam hpe hten hkra galaw ai nawku htung ningbaw ni a majaw, masha nkau lam shai mat wa ma ai. (Mahte 7:15) Nkau gaw Chyum Laika teng man ai tara hta grau nna, shanhte na mayu ai lam ni hpe sharin ya ai n teng n man ai Hkristan hpung hpe ra sharawng ma ai.—2 Timohti 4:3, 4.

 Mam hte tsing ga shadawn hta, teng man ai Hkristan ni hpe gasat ai lam ni (htak mat ai lam) paw pru wa na ngu Yesu tau hkrau tsun wa ai. (Mahte 13:24-30, 36-43) Shaning grai law ai aten du hkra, teng man ai Hkristan hte, n teng n man ai Hkristan ni hpe atsawm n lu ginhka wa ai. Yesu tau hkrau tsun wa ai hte maren, kasa ni si mat ai hpang, htak mat ai lam ni byin wa ai. (Kasa 20:29, 30) Dai majaw, shut shai ai sharin achyin lam amyu myu paw pru wa ai. Dai sharin achyin lam ni hpe, sharin ya nga ai n teng n man ai Hkristan hpung yawng gaw, “teng man ai lam hta na yit mat wa” ai re.—2 Timohti 2:18.

 Hpang jahtum hta teng man ai Hkristan hte n teng n man ai Hkristan hpe, dan dan leng leng chye wa na ngu nna mung, Yesu tau hkrau tsun wa ai. Dai zawn sha, dai ni na ndai mungkan a jahtum aten laman dan dan leng leng chye wa sai.—Mahte 13:30, 39.