Adam yan Ewa a kasha alat re ai Ka-in hkungran la ai gaw, shi a kanau shing nrai shi a jinghku ni kaw na langai ngai byin mai ai. Ndai lam hpe, Ka-in hte shi a dinghku hte seng nna Chyum Laika hta tsun da ai lam ni hta madung nna tsun ai re.

Ka-in hte shi dinghku a lam

•   Shinggyim masha yawng gaw, Adam yan Ewa kaw nna yu hkrat wa ai re. Karai Kasang gaw “dinghta ga e nga pra na matu, masha amyu danghta hpe daju langai [Adam] hte sha hpan tawn da” ai. (Kasa 17:26) Adam a madu jan Ewa gaw, “hkrung mahkrung a kanu” byin wa ai. (Ningpawt 3:​20) Dai majaw, Ka-in gaw Adam yan Ewa kaw na yu hkrat wa ai langai ngai hte hkungran wa ai mai byin ai.

•   Ka-in hte shi a kanau Abela gaw, Ewa shawng nnan shangai ai kasha ni re. (Ningpawt 4:​1, 2) Ka-in shi kanau hpe sat kau ai majaw, gawt shapraw kau hkrum wa ai. Dai shaloi shi gaw: “ngai hpe mu hkrup ai wa kadai mung, ngai hpe sat kau na” re ngu tsun wa ai. (Ningpawt 4:​14) Shi kadai hpe hkrit nga ai kun? Adam gaw “shadang sha hte shayi sha hte hpe shi shaprat da” ai lam Chyum Laika hta tsun da ai. (Ningpawt 5:​4) Adam yan Ewa a kashu kasha ni kaw na langai ngai shi hpe lama ma sa galaw na hpe, Ka-in hkrit ai rai na re.

•   Shawng nnan na shinggyim masha labau hta sai ni ai jinghku shada hkungran ai gaw mauhpa n re. Ga shadawn, Karai Kasang hpe sadi dung ai Abraham gaw shi a kawa bung nna kanu n bung ai kanau hte hkungran wa ai. (Ningpawt 20:​12) Dai zawn sai ni ai jinghku shada hkungran ai hpe hkum pat ai lam gaw, Mawshe a Tara hta lawm nna, Ka-in a aten kaw nna shaning grai na ai hpang hta she, hkum pat wa ai re. (Jaw Jau 18:​9, 12, 13) Dai aten hta, sai ni ai jinghku shada lu wa ai ma ni gaw, ya aten hta sai ni ai jinghku shada lu wa ai ma ni zawn, n kung n kang ai hku shangai wa ai lam ni n nga ai.

•   Adam yan Ewa hte shanhte a dinghku hte seng ai lam hpe, teng man ai labau hku nna Chyum Laika hta tsun da ai. Adam a aru arat hte seng ai ahkri ahkrai hpe, Mawshe ka da ai Ningpawt Ninghpang laika hta sha n-ga, labau lam ni hpe ka ai Ezra hte Luka ni a laika ni hta mung mu lu ai. (Ningpawt 5:​3-5; 1 Hkawhkam Labau 1:​1-4; Luka 3:​38) Chyum Laika ka ai masha ni gaw Ka-in a mabyin masa hpe, labau shang ai lam langai hku nna ka wa ai re.​—Hebre 11:4; 1 Yawhan 3:​12; Yuda 11.