Shinggyim masha ni hta, Karai Kasang hpe myi hte mu ga ai wa kadai n nga ai. (Pru Mat 33:20; Yawhan 1:​18; 1 Yawhan 4:​12) Chyum Laika hta “Karai Kasang gaw Wenyi” hkum rai nna, masha a myi hte n mu lu ai ngu tsun da ai.​—Yawhan 4:​24; 1 Timohti 1:​17.

 Lamu kasa ni chyawm gaw, wenyi hkum re ai majaw Karai Kasang hpe dingtawk mu lu ai. (Mahte 18:10) Dai hta n-ga, shinggyim masha ni kaw na si mat ai masha nkau mi mung, sumsing lamu hta wenyi hkum hte asak bai hkrung ai shaloi, Karai Kasang hpe mu lu na re.​—Hpilipi 3:​20, 21; 1 Yawhan 3:2.

 Chyum Laika hta Karai Kasang hpe mu ai ngu nna tsun ai shaloi, kaja wa myi hte mu ai hpe tsun mayu ai n re. Karai Kasang a lam chye na lu ai hpe tsun mayu ai re. (Esaia 6:​10; Yeremia 5:​21; Yawhan 9:​39-​41) Marai langai gaw Karai Kasang hpe kamsham yang, Karai Kasang hpe chye ai, Karai a atsam ningja ni hpe manu shadan let hkan sa ai. Dai hku nna, shi a “kraw lawang na myi” hte Karai Kasang hpe mu lu ai. (Ehpesu 1:​18, 19) Dai zawn makam masham nga na matu, galaw ra ai ladat ni hpe Chyum Laika hta tsun da ai.

•   Karai Kasang a atsam ningja ni re ai tsawra myit, gam jaw gam ya ai myit, hpan da ai lam ni hta mu lu ai Karai Kasang a nyan hpaji, hpung atsam ni a lam hpe sharin la u. (Roma 1:​20) Karai Kasang hpe sadi dung ai Yoba gaw, hpan da ai lam ni hpe myit sumru yu ngut ai hpang, Karai Kasang hpe shi a myi hte mu ai zawn hkamsha wa ai.​—Yoba 42:5.

•   Karai Kasang hpe chye na matu, Chyum Laika hpe hkaja u. “Nang [Karai Kasang] hpe tam yang, mu na wu ai” ngu nna Chyum Laika hta ga sadi jaw da ai.​—1 Hkawhkam Labau 28:9; Shakawn 119:2; Yawhan 17:3.

•   Yesu a prat hkrun lam kaw nna Karai Kasang a lam sharin la u. Yesu gaw shi a Kawa Karai Kasang Yehowa a atsam ningja ni hpe, hkum tsup ai hku madun wa ai majaw, ndai hku lu tsun wa ai: “Ngai hpe mu yu ai wa gaw, Wa hpe mu yu nu ai.”​—Yawhan 14:9.

•   Karai Kasang ra sharawng ai hku asak hkrung u. Na akyu a matu shi galaw ya ai lam ni hpe chye hkra galaw u. Yesu ndai hku tsun ai: “Myit san seng ai ni gaw a lu ma ai: kaning rai nme law, shanhte gaw Karai Kasang hpe mu lu na ma ru ai.” Lahta kaw tsun wa sai hte maren, Karai Kasang ra sharawng ai hku nna asak hkrung ai masha nkau mi gaw, sumsing lamu de bai hkrung rawt nna, Karai Kasang a “myi man mu lu na” re.​—Mahte 5:8; Shakawn 11:7.

 Chyum Laika hta masha ni Karai Kasang hpe mu ai ngu tsun ai shaloi, lamu kasa shing nrai shingran hku nna shadan dan ai lam re ai hpe shawng hpang lachyum ni gaw madun nga ai.

 Lamu Kasa ni.

Chyum laika prat hta, Karai Kasang gaw masha ni hpe shadan dan na matu, shi a amying hte tsun shaga na matu, shi a malai lamu kasa ni hpe shangun ai. (Shakawn 103:20) Ga shadawn, kalang mi hta Karai Kasang gaw Mawshe hpe grung nga ai sumwum kaw na ga shaga ai. Chyum Laika hta “Karai Kasang hpe yu na hkrit wu ai majaw, shi a myi man magap da wu ai” ngu tsun da ai. (Pru Mat 3:​4, 6) Mawshe gaw Karai Kasang hpe myi hte chyaw n mu wa tim, “Karai Kasang a lamu kasa” hpe gaw teng sha mu ai lam shawng hpang Chyum daw ni gaw madun nga ai.​—Pru Mat 3:2.

 Dai zawn sha, Chyum Laika hta Karai Kasang gaw “Mawshe hte myi man hkrum rai nna shaga” ai ngu tsun ai shaloi, Karai Kasang gaw Mawshe hpe hku hku hkau hkau ga shaga ai hpe tsun nga ai re. (Pru Mat 4:​10, 11; 33:11) Mawshe gaw Karai Kasang a myi man hpe teng sha n mu wa tim, Karai Kasang kaw na shiga hpe “lamu kasa” ni hku nna lu wa ai. (Galati 3:​19; Kasa 7:​53) Dai hta n-ga, Mawshe gaw Karai Kasang hpe, “myi hte n mu lu ai wa hpe mu lu ai hpe zawn” grai kamsham ai lam Chyum Laika hta tsun da ai.​—Hebre 11:27

 Karai Kasang gaw Mawshe hte ga shaga ai zawn sha, Abraham hpe mung lamu kasa hku nna, matut mahkai wa ai. Chyum Laika hpe ntsa lam sha hti na nga yang, Karai Kasang hpe Abraham mung myi hte mu wa ai ngu nna sha chye na na re. (Ningpawt 18:​1, 33) Raitim, shawng hpang hti yu yang, Karai Kasang shangun dat ai lamu kasa ni she Abraham kaw “masha marai masum” hku nna sa wa ai lam chye lu ai. Abraham mung shanhte hpe Karai Kasang hku nna hkap la ai. Shi gaw shanhte hte ga shaga ai shaloi, Yehowa hte shi dingtawk ga shaga nga ai hku nna tsun dan da ai.​—Ningpawt 18:​2, 3, 22, 32; 19:1.

 Shingran ni.

Karai Kasang gaw masha ni hpe shingran shing nrai, hkum shadan dan ai hku nna mung shadan dan ai. Ga shadawn, Chyum Laika hta Mawshe hte Israela ni gaw “Israela a Karai Kasang hpe mu” ai ngu tsun ai shaloi, “Karai Kasang” hpe shingran hte teng sha mu wa ma ai. (Pru Mat 24:​9-​11) Dai zawn sha, Chyum Laika hta kalang lang myihtoi ni gaw “Madu (Yehowa, NW)” hpe mu ai ngu tsun ai. (Esaia 6:1; Daniela 7:9; Amo 9:1) Masa langai hpra hta, shanhte gaw Karai Kasang hpe ding tawk mu ai n re ai sha, shingran jaw hkrum nna mu ai lam hpe shawng hpang Chyum daw ni gaw madun nga ai.​—Esaia 1:1; Daniela 7:2; Amo 1:1.