Nga ai. Karai Kasang nga ai lam dan dawng ai madi madun lam ni hpe Chyum Laika hta madun da ai. Nawku htung ni sharin ya ai majaw, Karai Kasang nga ai ngu ai hpe kam kau ai baw n re ai sha, myit sawn sumru lu ai atsam, chye chyang ai nyan hpe akyu jashawn nna she kam na matu Chyum Laika hta tsun da ai. (Roma 12:1; 1 Yawhan 5:20) Karai Kasang hpe kam na matu, Chyum Laika hta madung tawn nna sanglang da ai ndai lam ni hpe myit yu u:

•   Hkrung mahkrung hte hpawn, atsawm sha kawai nga ai ninggawn tawa hpe yu yang, galaw da ai wa nga ai hpe madun nga ai. Chyum Laika hta ndai hku tsun da ai: “Nta ngu ai hpe marai langai ngai e de da nga ai; yawng mayawng hpe de da ai wa chyawm gaw, Karai Kasang rai nga ai.” (Hebre 3:4) Ndai sawn maram ai lam gaw, hpaji chye ai masha law law a matu lachyum rawng nna shanhte a myit ai lam ni hpe galai shai ya lu ai. a

•   Anhte hpa majaw asak hkrung nga ai kun? ngu ai ga san a mahtai hpe chye mayu ai myit gaw masha ni hta shangai ai kaw na lawm wa ai. Ra mara hpe lu la nga ai masha ni pyi dai ga san a mahtai hpe chye mayu ma ai. Dai zawn chye mayu ai myit gaw, “wenyi hta matsan mayan rai nga ai” ni re ngu Chyum Laika hta tsun da ai. Dai hta Karai Kasang hpe Chye mayu ai myit hte shi hpe nawku mayu ai myit ni lawm ai. (Mahte 5:3; Shingran 4:11) Karai Kasang hpe shamyet shanat ra ai ngu ai myit gaw, Karai Kasang nga ai hpe sakse madun nga ai. Dai sha n-ga, Karai Kasang mung dai myit hpe shadik ya mayu ai tsawra myit nga ai hpan da madu re ai hpe madun dan nga ai.​—Mahte 4:4.

•   Shaning law law kaw nna ahkri ahkrai myihtoi htoi tawn da ai Chyum Laika hta lawm ai mabyin ni gaw, tup hkrak hpring tsup wa ai. Tup hkrak tengman nna ahkri ahkrai re ai ndai myihtoi ga ni gaw, Karai kaw na re ai hpe sakse madun nga ai.​—2 Petru 1:21.

•   Chyum Laika ka ai ni gaw shanhte hte prat bung ai ni hta na, hpungtang hpaji hte seng ai machye machyang grau nga wa ai. Ga shadawn, Mungkan ga hpe magwi, wa du (sh) dumsum ala langai ngai gaw hpai da ai ngu moi na masha ni kam ma ai. Chyum Laika hta gaw “ginding aga hpe hpat wat e, noi da” ai ngu Karai Kasang tsun da ai. (Yoba 26:7) Mungkan ga gaw “din” ai ngu Chyum Laika hta tup hkrak tsun tawn da ai. (Esaia 40:22, NW) Dai lam ni hpe Karai Ksang kaw na chye wa ai majaw, hpungtang hpaji hte bung ai chye na lam ni hpe Chyum Laika ka ai ni ka lu wa ai re ngu nna masha law malawng hkap la ai.

•   Grai yak ai ga san ni a mahtai hpe Chyum Laika hta mu lu ai. Myit dik na mahtai hpe n lu yang, nawku htung n nga ai masha pyi byin mat shangun lu ai. Ga shadaw, Karai Kasang gaw tsawra myit nga ai wa re ai, hpung atsam kaba htum ai madu re ai nga yang, mungkan hta ruyak jamjau ai hte n kaja ai lam ni hpa majaw nga taw ai kun? Nawku htung ni gaw masha ni hpe kaja ai hta na n kaja ai ni hpe galaw na matu hpa majaw shingkang ka-up nga ai kun?​—Titu 1:16.