Mungkan galoi htum na ngu ai hpe chye na matu, “mungkan” ngu ai ga hpe Chyum Laika hta gara hku lang da ai lam chye na ra ai. Greek ga si koʹsmos hpe “mungkan” ngu ga gale da nna, law malawng gaw mungkan masha ni, laksan hku nna Karai Kasang hte shi a myit ra ai lam hte nhtan shai ai ni hpe tsun ai re. (Yawhan 15:18, 19; 2 Petru 2:5) Kalang lang gaw, koʹsmos hpe masha uhpung hpe tsun ai shaloi mung lang ai.​—1 Korinhtu 7:​31; 1 Yawhan 2:​15, 16. a

‘Mungkan a jahtum’ ngu ai gaw hpa rai kun?

 ‘Mungkan a jahtum’ ngu ai ga si hpe ga gale Chyum law malawng hta mu lu nna, “mungkan ga a htum wa na” shing nrai “mungkan ga htum mat na aten” ngu nna mung ga gale ma ai. (Mahte 24:3, JCLB) Dai gaw, mungkan ga (sh) masha yawng hpe jahten kau na ngu tsun mayu ai n re. Masha uhpung ni sha jahtum kau hkrum na hpe tsun mayu ai re.​—1 Yawhan 2:​17.

 Chyum Laika hta “n shawp ai ni kran kau ai hkrum” nna, kaja ai masha ni gaw mungkan ntsa hta, ngwi pyaw ai hte asak prat lu la na ngu tsun dan da ai. (Shakawn 37:​9-​11) Ndai jahten sharun na lam gaw, “ru tsang kaba” a jahtum re ai Hara Magedon majan hta byin wa na re.​—Mahte 24:21, 22; Shingran 16:14, 16.

Gara aten hta mungkan gaw htum mat na kun?

 “Dai shani hte ahkying hpe chyawm gaw kadai mung n chye lu ai: lamu kasa ni hte Kasha pyi, dai hpe n chye lu ai; Wa hkrai sha dai hpe chye lu ai” ngu Yesu tsun wa ai. (Mahte 24:36, 42) Dai jahtum aten gaw, “nanhte n dum n mi re ai ahkying” n myit mada da ai aten hta byin wa na ngu nna mung tsun wa ai.​​—Mahte 24:44.

 Ahkying aten, shani tup hkrak hpe anhte n chye tim, mungkan a jahtum du wa sai ngu ai hpe madun ai lamik “kumla” ni, mabyin ni hpe gaw Yesu tsun dan wa ai. (Mahte 24:​3, 7-​14) Chyum Laika hta dai ahkying aten hpe, “mungkan ga htum mat ai aten” hte “hpang jahtum na nhtoi ni” ngu tsun da ai.​—Daniela 12:4, JCLB; 2 Timohti 3:​1-5.

Mungkan htum mat yang hpa ni naw ngam nga na kun?

 Ginding ga gaw ndai kaw sha nga taw na re. Chyum Laika hta “dai gaw htani htana e shamu shamawt rai na n rai” ngu tsun da ai. (Shakawn 104:5) Chyum Laika hta “ding hpring ai ni gaw dai mungdan hpe madu lu nna, Dai hta e nan nawng e nga nga lu na ma ra ai” ngu ga sadi jaw da ai hte maren, ginding ga gaw masha ni hte hpring nga na re. (Shakawn 37:29) Karai Kasang gaw shawng nnan na shi a yaw shada lam hte maren, lawu na lam ni hpe bai galaw ya na re:

•   Hparadisu.​—Esaia 35:1; Luka 23:43.

•   Shing lum nna ngamu ngamai ai lam lu na.​—Malahki 4:4.

•   Masha yawng gaw lachyum rawng nna myit dik ai bungli lu na.​—Esaia 65:21-​23.

•   Ana ahkya hte asak kung ai lam ni kaw na lawt lu na.​—Yoba 33:25; Esaia 33:24.