Chyum Laika hta lawm ai “wenyi” ngu ai ga si hpe, Hebre ga si ni hpet hte Grik ga si pasihki kaw nna ga gale da ai re. Hebre ga si a dingtawk lachyum gaw “nsa sa ai hpan da ai arai,” hte Grik ga si a lachyum gaw “asak hkrung ai hkrung kanu” re. a Wenyi ngu ai gaw, hpan da ai arai langai mi ting rai nna, hkum hkrang si mat ai hpang hkrung ngam nga ai lama ma n re. Wenyi ngu ai gaw masha langai mi ting hpe tsun ai lam Chyum Laika madi madun lam ni hpe yu yu ga:

•   Shawng nnan na masha Adam hpe Yehowa hpan ngut ai hpang, Chyum Laika hta “masha gaw asak hkrung ai wenyi byin wa ai” ngu tsun da ai. (Ningpawt 2:7, King James Version) Adam gaw wenyi lu la wa ai n re. Asak hkrung ai wenyi (sh) masha byin wa ai.

•   Chyum Laika hta, wenyi gaw bungli galaw lu ai, lu shu ra marin lu ai, tara ni hpe hkan sa lu ai, si mang ni hpe hkra lu ai nga nna tsun da ai. (Jaw Jau 5:2; 7:20; 23:30; Tara Jahprang 12:20; Roma 13:1) Dai galaw ai lam ni hta masha langai mi ting lawm ai.

N si lu ai wenyi nga ai kun?

 N Nga ai. Wenyi gaw si lu ai. Wenyi gaw si lu ai lam Chyum daw law law hta madun da ai. Nkau mi hpe yu yu ga:

•   “Mara galaw ai wenyi gaw, si na ra ai.”​—Ezekela 18:4, 20, King James Version.

•   Moi na Israela ni hta, mara kaba galaw ai ni gaw si dam hkrum ai. (Pru Mat 12:15, 19; Jaw Jau 7:20, 21, 27; 19:8, King James Version) Masha gaw “si lu na rai nga ai.”​—Pru Mat 31:14.

•   Chyum daw nkau mi hta, masha langai mi si mat ai hpang si mang hpe “wenyi chyasi” ngu nna ding tawk lang da ai. (Jaw Jau 21:11; Bu Hkawm 6:6) Ndai Chyum daw hpe Chyum Laika law law hta “si mang” (sh) “masha chyasi” ngu lang da tim, madung Hebre hta, ni hpet, (sh) “wenyi” ngu nna lang da ai.

“Wenyi” ngu ai lachyum gaw “asak” mung re

 Chyum Laika hta “wenyi” hpe “asak” ngu nna mung lang da ai. Ga shadawn, Yoba 33:22 hta Hebre ga si “wenyi” (ni hpet) hpe “asak” hku nna lang da ai. Dai zawn sha, masha langai a wenyi (sh) asak shoi hpa nga ai (sh) sum mat chye ai lam Chyum Laika hta madun da ai.​—Pru Mat 4:19; Tara Agyi 9:17; Hpilipi 2:30.

 “Wenyi” a matu lang ai ndai ga si ni gaw, “nsoi nsa hkyet mat wa nga yang” ngu tsun da ai Chyum daw ni hpe chye na na matu anhte hpe karum ya ai. (Ningpawt 35:18) Ndai ka hkrang gaw, masha langai a asak htum mat ai hpe madun nga ai. Ga gale nkau mi gaw Ningpawt Ninghpang 35:18 hta lawm ai lam hpe “hpang jahtum nsa” ngu nna ga gale da ai.

Nsi chye ai wenyi makam masham gaw gara kaw na yu hkrat wa ai kun?

 Hkristan hpung ni kamsham nga ai n si chye ai wenyi sharin achyin lam gaw Chyum Laika kaw na n re ai sha, moi na Grik myit mang hpaji kaw na yu hkrat wa ai re. Laika buk langai (Encyclopædia Britannica) hta n dai hku tsun da ai: “Chyum Laika hta lakap nna tsun da ai wenyi gaw nsa sa ai, nsa shaw ai lam ni hpe tsun ai rai nna, mu lu ai wenyi hte, n mu lu ai wenyi ngu nna n ginhka da ai. Hkumhkrang hte wenyi ngu nna garan da ai hkristan makam masham gaw moi na Grik ni kaw na yu hkrat wa ai re.”

 N si chye ai wenyi zawn re ai masha ni a myit mang hpaji sharin achyin lam hte Karai Kasang a sharin achyin lam ni hpe kayau kau ai sharin achyin lam ni hpe Karai Kasang mara raw ya na n re. Chyum Laika hta, “mungkan ga a hkang ai tara hte masha a matsun maroi ga hkan ai zai byeng-ya hte lila rai nga ai hkalem hkalau ga hte, kadai mung nanhte hpe n hkalau lu u ga, sadi nga mu” ngu nna sadi jaw da ai.​—Kolose 2:8.