“Ngai asak 15 ning daram hta, nu yan wa jahkrat ai tara hpe myit hkrum ai. Raitim, ya gaw asak 19 ning rai sai majaw, grau nna wanglu wanglang lu nga ging sai ngu shadu ai.”​—Sibiya.

Sibiya zawn nang mung hkamsha ai kun? Rai yang, ndai sumhpa gaw kanu kawa ni hte bawngban yu na matu karum ya na re.

•  Chye da ging ai lam

•  Galaw mai ai lam

•  Ramma shada tsun ai lam

Nta a rit kawp tara hte seng nna nu yan wa hpe garai n tsun dan shi yang, lawu na lam ni hpe myit yu u:

• Rit kawp tara n nga yang, prat gaw kashuk kashak byin nga na re. Lai wa lai sa grai law ai mawdaw lam hta, masat kumla ni, hkring na, n hkring na hte seng nna masat tawn da ai wan ni, kade daram madang hte gawt ra na hpe n masat tawn da yang, gara hku rai nga na kun? Nta rit kawp tara hpe hkan sa ai gaw, mawdaw lam a matu jahkrat da ya ai tara ni hpe hkan sa ai hte bung ai.

• Kanu kawa ni gaw nang hpe lanu lahku ai majaw, nta rit kawp tara ni jahkrat da ya ai re. Tara ni n jahkrat da ya ai nga yang, nang hpe n tsawra ai ngu ai lachyum re. Kanu kawa ni gaw lanu lahku ya chye ai kanu kawa ni byin mayu na n re i?

NANG CHYE AI KUN? Kanu kawa ni hta mung hkan sa ra ai tara ni nga ai! Ningpawt Ninghpang 2:24; Tara Jahprang 6:6, 7; Ehpesu 6:4 hte 1 Timohti 5:8 ni hpe hti yu u.

Dai pyi naw, kanu kawa ni gaw grai tara ja ai ngu nna hkamsha nga ai rai yang gara hku kun?

N bawngban shi yang, shawng myit yu u. Nang gaw nta a rit kawp tara ni hpe galoi mung hkan sa ai kun? Tara ni hpe n hkan sa chye ai wa rai yang, lawt lu lam grau lu na matu hpyi shawn na aten n rai shi ai. Kanu kawa ni jahkrat da ai tara hpe shawng hkan sa chye hkra shakut ra ai.

Rit kawp tara ni hpe hkan sa ai wa rai yang gaw, kanu kawa ni hpe hpa tsun na hpe tau hkrau lajang da u. Tinang tsun mayu ai lam ni hpe ka matsing da ai rai yang, tinang hpyi shawn ai lam gaw htap htuk nna rap ra ai lam nga ai n nga ai hpe chye wa na re. Ngut yang, gara aten, gara shara hta bawngban na hpe kanu kawa ni hpe san u. Kanu kawa ni hte ga shaga yang, ndai lam ni hpe myit dum u:

Hkungga lara u. “Kajet kajau re ai ga chyawm gaw, pawt sindawng ai hpe sharawt ya nga ai” ngu nna Chyum Laika hta tsun da ai. (Ga Shagawp 15:1) Dai majaw, nu yan wa gaw n tara ai ngu tsun nna ningdang hkat ai rai yang, kanu kawa hte matut mahkai lam kaja sana n re.

“Nu yan wa hpe hkungga ai lam madun ai shaloi, shan mung ngai hpe hkungga ai lam grau nna madun wa ai. Shada da hkungga yang, myit hkrum ai lam lu na matu grau loi ai.”​—Biyanka, 19 ning.

Madat ya u. “Na la na matu lawan nga u ga; ga tsun na matu hkum tin nga u ga” nga nna Chyum Laika hta tsun da ai. (Yaku 1:19) Kanu Kawa ni hte bawngban nga ai majaw, nang mung madat ya ra ai hpe dum u.

“Asak kaba wa nna tinang gaw, kanu kawa ni hta grau chye wa sai ngu nna shadu chye ai. Kaja wa nga yang, gara hku mung n mai byin ai. Kanu kawa ni a lam matsun hte hpaji jaw ai lam ni hpe madat mara ging ai.”​—Deban, 20 ning.

Myit tau nna chye na ya u. Kanu kawa ni a shara hta shang nna myit ya u. “Langai hte langai tinang hte seng ai sha n rai, masha gale hte seng ai hpe mung, myit yu nga mu ga” ngu nna Chyum Laika hta tsun da ai.​—Hpilipi 2:4.

“Nu yan wa ngai hpe n madi shadaw ya ai, ngai hpe ninghkap nga ai ngu nna shadu wa ai. Tinang na lagaw tinang lu tsap hkra ngai galaw nga ai zawn, nu yan wa mung kaja ai kanu kawa byin hkra sharin la nga ai hpe, ya ngai chye na sai. Nu yan wa galaw ai yawng gaw ngai hpe tsawra nna, ngai na akyu a matu galaw ya ai she re.”​—Jawshawa, 21 ning.

Hparan lu na lam hpe hpyi shawn u. Ga shadawn, poi langai de nang sa mayu ai ngu saga. Dai shara de du na matu mawdaw hkying hkum mi gawt ra ai. Na nu yan wa gaw n sa shangun ai. Rai yang, hpa majaw n sa shangun ai hpe chye hkra galaw u. Grai tsan ai majaw kun? Shing nrai poi a majaw kun?

• Grai tsan ai majaw ngu saga. Mawdaw grai chye gawt ai wa hte arau sa yang, nu yan wa ahkang jaw na kun?

• Poi a majaw ngu saga. Poi hta kadai ni lawm na, kadai gaw woi awn na ngu ai hpe tsun dan yang sa shangun na kun?

Kanu kawa ni hpe hkungga lara let tsun na matu hte shanhte tsun ai hpe myit galu let madat ya ra ai hpe myit dum u. “Na nnu yan nwa hpe hkungga lara” ai lam hpe ga hte sha n-ga, akyang lailen ni hte mung madun u. (Ehpesu 6:2, 3) Shanhte ahkang jaw na kun? Jaw yang jaw chye ai. N jaw ai mung rai chye ai. Gara hku mi raitim, lawu na lam ni hpe galaw yu u . . .

Kanu kawa ni dawdan ai hpe hkungga let hkap la u. Dai gaw, hpang de kanu kawa ni nang hpe lawt lu lam jaw hkra karum ya lu ai majaw ahkyak ai. Nang galaw mayu ai hku n lu galaw ai majaw, kanu kawa ni hte ningdang hkat ai rai yang, hpang kalang bawngban hkat na matu yak mat chye ai. Dai majaw kanu kawa tsun ai hpe madat ya ai nga yang, nang hpe lawt lu lam grau jaw wa na hpe myit mada mai ai.