Gara gasan ni rai ta? Shinggyim masha ni san ma ai, ahkyak htum gasan nkau mi hte seng nga ai. Ndai gasan ni hpe nang san ga na re.

• Karai Kasang anhte hpe teng sha lanu lahku nga ai kun?

• Hpyen majan hte ruyak jamjau ai lam ni htum mat na kun?

• Anhte si mat ai hpang hpa byin mat ai rai ta?

• Si mat ai masha ni a matu hpa myit mada shara nga ai kun?

• Karai Kasang madat ya hkra, gara hku akyu hpyi ra na ta?

• Ngwi pyaw ai asak aprat hpe gara hku lu la mai na ta?

Ndai gasan ni a mahtai ni hpe nang gara kaw tam na rai ta? Nang masha amyu myu hpe san yang, mahtai mung amyu myu lu na re. Hpaji rawng ai ni hte, nang hkungga lara ai ni hpe san yang pyi, mahtai ni gaw naw shai nga na re. Mahtai nkau mi gaw aten ladaw langai hta, teng nga ai raitim, kade nna yang dai gaw prat ndep mat sai.

Raitim kamhpa mai ai mahtai ni lawm ai, laika buk langai nga ai. Dai hta tup hkrak teng ai lam ni lawm ai. Karai Kasang kaw Yesu Hkristu akyu hpyi ai shaloi “Na a mung ga gaw, teng man ai lam rai nga lit dai” nga nna tsun ai. (Yawhan 17:17) Daini dai Mungga hpe Chyoi Pra Ai Chyum Laika nga nna anhte chye da ma ai. Hpang na laika man ni hta, lahta na gasan ni a matu danleng ai, teng man ai Chyum Laika mahtai nkau mi hpe nang lu la na re.

NDAI GASAN PAW PRU WA AI LAM: Anhte gaw zingri zingrat ai lam, n tara ai lam ni hte, hpring nga ai mungkan hta asak hkrung nga ra ai. Nawku htung nkau mi gaw, anhte hkamsha nga ai yakhkak jamjau ai lam ni gaw, Karai Kasang ra sharawng ai hte maren byin nga ai, nga nna sharin ya ma ai.

CHYUM LAIKA HTA TSUN AI LAM: Karai Kasang gaw nhkru ai hpe, galoi mung n galaw ai. “Tara tawt lai ai gaw Karai Wa hte, shut hpyit ai gaw Chyahtum Chyalai n-gun rawng ai wa hte, tsan nga u ga” nga nna Yoba 34:10 hta tsun ai. Yehowa hta masha ni a matu, tsawra myit hte yaw shada da ai lam langai nga ai. Dai majaw Yesu gaw “Sumsing lamu na anhte a Wa e, . . . Na a mungdan du wa ru ga; Lamu tang hta, na a myit dik nga ai hte maren, ga ntsa e mung, dik lit ga law” nga nna akyu hpyi na matu sharin ya ai. (Mahte 6:​9, 10) Yehowa gaw anhte hpe lanu lahku nga nna, shi a yaw shada ai lam, teng sha hpring tsup hkra galaw lai wa sai.​​​—⁠​Yawhan 3:​16.

Ningpawt Ninghpang 1:​26-​28; Yaku 1:13; hte 1 Petru 5:​6, 7 ni hpe mung yu u.

NDAI GASAN PAW PRU WA AI LAM: Hpyen majan a majaw masha law law a asak sum nga ai. Ruyak jamjau ai lam hpe anhte yawng hkamsha nga ra ai.

CHYUM LAIKA HTA TSUN AI LAM: Mungkan ting simsa wa na aten hpe Yehowa tau hkrau tsun da ai. Shi a asuya Mungkan ga hpe uphkang ai shaloi, masha ni gaw “hpyen majan sharin sana, nrai.” De a malai, “shanhte gaw tinang a nhtu ni hpe najawn” galaw kau na ra ai. (Esaia 2:​4) Yehowa gaw n tara ai lam hte ruyak jamjau ai lam yawng hpe jahtum kau sana re. Chyum Laika hta ndai hku ga sadi jaw da ai: ‘Karai Kasang gaw shanhte a myi hta na myi prwi pru ma pru katsut kau ya na ra ai: htawm hpang e si hkrung si htan n nga lu na sai; sharung shayawt ai, hkrap ngu hkrap ngoi ai, hki si ba si ai mung, n nga lu na sai: shawng na lam nga manga hte gaw [ya prat na n tara ai lam ni hte ruyak jamjau lam ni lawm] lai mat wa sai.’​​​—⁠​Shingran 21:​3, 4.

Shakawn Kungdawn 37:​10, 11; 46:9; hte Mihka 4:​1-4 ni hpe mung yu u.

NDAI GASAN PAW PRU WA AI LAM: Mungkan hta nga ai nawku htung law malawng gaw, masha si ai hpang, hkum kata hta lama ma asak naw hkrung nga ai nga nna sharin ya ai. Si mat ai masha ni gaw, hkrung nga ai masha ni hpe, jamjau jaw lu ai, shing nrai, Karai Kasang gaw nhkru ai masha ni hpe ngarai hta, wan hte htani htana zingri nna, ari jaw ai nga nna kam ma ai.

CHYUM LAIKA HTA TSUN AI LAM: Masha ni si mat ai hpang tsep kawp mat mat ai. “Si mat ai ni chyawm gaw hpa n chye ma ai” nga nna Hpaji Ningli 9:5 hta tsun ai. Si mat ai ni gaw hpa mung nchye, n hkamsha lu ai majaw, asak hkrung nga ai masha ni hpe, jamjau n jaw lu, n karum ya lu sai.​​​—⁠​Shakawn 146:​3, 4.

Ningpawt Ninghpang 3:​19 hte Hpaji Ningli 9:​6, 10 hpe mung yu u.

NDAI GASAN PAW PRU WA AI LAM: Anhte gaw asak hkrung mayu ma ai. Anhte a tsawra ai masha ni hte angwi apyaw sha nga mayu ai. Anhte yawng gaw, si mat ai anhte tsawra ai masha ni hpe, bai hkrum mayu ma ai.

CHYUM LAIKA HTA TSUN AI LAM: Si mat ai masha ni gaw bai hkrung rawt wa na re. “Lup ni hta rawng nga ai ni nlang hte gaw . . . pru lu na” nga nna Yesu ga sadi jaw da ai. (Yawhan 5:​28, 29) Karai Kasang yaw shada ai lam hte maren, bai hkrung rawt wa ai ni gaw, ngwi pyaw tsawm htap ai mungkan hparadisu hta asak hkrung lu na re. (Esaia 65:​21-25) Dai hparadisu hta, madat mara ai masha ni gaw, hkum tsup ai hkam kaja lam hte, htani htana asak hkrung lu na re. Chyum Laika hta ndai hku tsun ai: “Ding hpring ai masha ni gaw lamu ga hpe madu lu na mara ai hte; dai lamu ga hta htani htana shanu nga na mara ai.”​​​—⁠​Shakawn 37:​29, Kabu Gara Shiga Chyum Laika.

Yoba 14:​14, 15; Luka 7:​11-​17; hte Kasa 24:15 ni hpe mung yu u.

NDAI GASAN PAW PRU WA AI LAM: Masha yawng ngu na daram gaw akyu hpyi ma ai. Raitim law malawng gaw, shanhte a akyu hpyi ga hpe, n madat ya ai nga nna hkamsha ma ai.

CHYUM LAIKA HTA TSUN AI LAM: Akyu hpyi ai shaloi, ga hkaw langai hpe sha, kahtap na n tsun na matu, Yesu sharin ya ai. “Nanhte akyu hpyi nga myit yang, . . . ga bai kahtap htap hkum rai nga myit” ngu nna shi tsun ai. (Mahte 6:​7) Anhte a akyu hpyi ga hpe, Karai Kasang madat ya na matu, shi ra sharawng ai hku hpyi ra ai. Dai hku galaw na matu, Karai Kasang ra sharawng ai hpe, sharin la nna dai hte maren, akyu hpyi ra ai. Langai Yawhan 5:​14 hta ndai hku tsun ai: “Karai Kasang a myit ai hku hte maren, anhte lama ma hpyi ga yang gaw, shi anhte hpe madat mara na ra ai.”

Shakawn Kungdawn 65:​2, Yawhan 14:​6; hte 1 Yawhan 3:​21, 22 ni hpe mung yu u.

NDAI GASAN PAW PRU WA AI LAM: Masha law malawng gaw ja gumhpraw, gumhkawng ai lam hte, gawng shingyan tsawm ai gaw, shanhte hpe ngwi pyaw ai lam jaw lu ai nga nna shadu ma ai. Dai lam ni hpe lu na matu hkan shakut tim, ngwi pyaw ai lam hpe nlu la ma ai.

CHYUM LAIKA HTA TSUN AI LAM: Ngwi pyaw ai lam lu na matu, gara hku galaw ra na hpe Yesu ndai hku tsun ai: “Karai Kasang a mungga madat la nna, hkan nang ai ni gaw a lu ma ai.” (Luka 11:28) Teng man ai ngwi pyaw lam lu na matu ahkyak htum gaw, Karai Kasang a lam hte, anhte a matu shi a yaw shada lam hpe, chye hkra galaw ra ai. Dai teng man ai lam hpe Chyum Laika hta mu lu ai. Dai hpe chye da ai gaw, kaja wa ahkyak ai lam hte, nau n ahkyak ai lam ni hpe, garan ginhka chye na matu, karum ya ai. Anhte daw dan ai lam ni hte galaw ai lam ni hta Chyum Laika lam matsun ya ai hku hkan yang, ngwi pyaw ai asak aprat lu la na re.

Ga Shagawp 3:​5, 6, 13-​18 hte 1 Timohti 6:​9, 10 hpe mung yu u.

 Shawng kaw madun da ai ni gaw, gasan kru a matu Chyum Laika mahtai ni hpe, kadun ai hku tsun dan ai re. Nang dai hta grau chye mayu a ni? Nang gaw “Karai Kasang a mungga madat la nna, hkan nang ai ni” hta lawm yang, teng sha chye mayu na re. ‘Anhte hpe Karai Kasang lanu lahku ai rai yang, hpa majaw nhkru ai lam hte, ruyak jamjau lam ni byin na ahkang jaw da a ta? Kun dinghku grau nna ngwi pyaw hkra gara hku galaw lu na ta?’ ngu ai ndai gasan ni hte seng nna mung nang chye mayu na re. Dai gasan ni hte kaga gasan law law a matu, hkum tsup ai hte myit shadik ya lu ai mahtai ni hpe, Chyum Laika hta madun da ai.

Raitim, daini masha law law gaw, Chyum Laika hpe hti nna hkaja na matu myit n lawm ma ai. Chyum Laika gaw moi prat na laika buk rai nna, kalang lang hta, chye na yak ai nga nna shadu ma ai. Chyum Laika kaw na mahtai ni hpe mu tam na matu, karum ya na hpe ra a ni? Yehowa Sakse Ni gaw, nang hpe karum ya lu ai lam lahkawng hkyen lajang da ai.

Langai gaw, Karai Kasang Kaw Na Kabu Gara Shiga laika buk re ai. Dai gaw, bungli law ai masha ni a matu, ahkyak ai gasan ni a Chyum Laika mahtai ni hpe, chye na hkra hkyen lajang da ai re. Lahkawng ngu na gaw, manu jahpu n jaw ra ai sha, Chyum Laika sharin la mai ai lamang re. Yehowa Sakse langai gaw, na nta hta shing n rai na a matu htap htuk ai shara hta, aten kachyi mi la nna nang hte arau, Chyum Laika hti dinglik mayu ai. Mungkan ting na masha wan law law gaw, dai lamang hta na akyu lu la ma ai. Shanhte hta na masha law law gaw “teng man ai lam hpe mu sai!” nga nna sharawng awng let tsun ma ai.

Dai hta grau manu dan ai hpa mung n nga sai. Chyum Laika a teng man ai lam gaw, anhte hpe shajan shalai kam sham ai lam, myit shuk na lam hte, myit tsang na lam ni kaw na, shalawt ya ai. Dai gaw anhte hpe yaw shada lam, myit mada lam hte, ngwi pyaw ai lam jaw ai. Yesu gaw “teng man ai lam mung nanhte chye lu na ma rin dai rai nna, dai teng man ai gaw, nanhte hpe shalawt dat na ra ai” nga nna tsun ai.​​​—⁠​Yawhan 8:​32.