Yuda masha ni gaw Yehowa hpe chyahkring hkring kau da nna, shut shai ai hpara ni hpe nawku ma ai. Dai pyi, Yehowa gaw shanhte hpe shaning law law matut nna, naw karum ya wa ai. Shanhte hpe sadi jaw na matu, myihtoi law law hpe shangun tim, shanhte n madat ya ma ai. Myihtoi ni hpe mung jahpoi asawng ma ai. Shanhte gawng ngu sumla nawku ai lam hpe Yehowa gara hku jahtum kau ya ai kun?

Babelon hkawhkam Nebuhkadneza gaw, mungdan langai hpang langai zing la nga ai. Yerusalem mare hpe shawng nnan gasat awng dang ai shaloi, Hkawhkam Yehoiahkin, hkawseng shadang sha ni, hpyen la ni hte lata hpaji chye ai ni hpe Babelon de rim mat wa ai. Yehowa a nawku htingnu kaw na, sut rai mahkra hpe mung zing la mat wa ai. Dai hpang, Nebuhkadneza gaw Zedekia hpe Yuda hkawhkam aya tang dat ai.

Shawng nnan hta, Zedekia gaw Nebuhkadneza a ga madat ai. Raitim, makau grup-yin na mungdan ni hte, myihtoi masu ni gaw Babelon hpe gumlau na matu, sa n-gun jaw ma ai. Yeremia gaw Zedekia hpe ndai hku sadi jaw ai: ‘Lama na nang gumlau yang, Yuda mung masha ni gaw ri nhtu, kawsi hpang gara ai lam hte ana zinli ni hkrum sha na re.’

Zedekia gaw 8 ning uphkang ngut ai hpang, Babelon hpe ninghkap nna gumlau na matu dawdan wa ai. Shi hpe karum na matu Egutu hpyen dap hpe karum hpyi ai. Dai majaw, Nebuhkadneza gaw Yerusalem mare hpe gasat na matu, shi a hpyen dap hpe shangun dat ai. Shanhte gaw mare hpe wang da nna dap jung nga ai. Dai shaloi, Yeremia gaw Zedekia hpe ndai hku tsun ai: ‘Lama na, Babelon hpe nang asum jaw na nga yang, nang hte na a mare gaw lawt lu na re. Asum n jaw yang, Babelon masha ni gaw mare hpe wan nat nna, nang hpe mung bawng masha hku rim mat wa na re nga nna Yehowa tsun ai.’  Raitim, Zedekia gaw: ‘Ngai asum n jaw ai!’ nga nna bai tsun ai.

Laning mi chyen na ai hpang, Babelon hpyen dap gaw Yerusalem mare bunghku hpe jahten sharun kau nna, mare hpe wan nat kau ai. Nawku htingnu hpe wan nat nna, masha law law hpe sat kau ai. Ngam ai masha law law hpe mung bawng masha hku nna rim woi mat wa ai.

Zedekia gaw Yerusalem kaw nna hprawng mat ai majaw, Babelon masha ni gaw shi hpe hkan rim ma ai. Shanhte gaw shi hpe Yerihko mare makau hta lu rim nna, Nebuhkadneza hpang de shaga sa mat ai. Babelon hkawhkam gaw, Zedekia a shadang sha ni hpe shi a man hta sha sat kau ai. Zedekia hpe mung myi baw kau ya nna, si ai du hkra htawng jahkrat da ai. Raitim, Yehowa gaw, Yuda masha ni hpe ndai hku ga sadi jaw ai: ‘Shaning 70 htum yang, nanhte hpe Yerusalem mare de bai wa shangun na.’

Babelon mare de bawng masha hku rim hkrum mat wa ai ramma ni hpa byin mat ai kun? Yehowa hpe shanhte matut sadi dung na kun?