Zakari yan Elisabet a shadang sha Yawhan gaw, kaba wa yang myihtoi byin wa ai. Meshia paw pru wa na lam masha ni hpe sharin ya na matu, Yehowa gaw Yawhan hpe akyu jashawn wa ai. Yawhan gaw tara jawng ni hte mare ni hta sharin ya na malai, nam mali hta hkaw tsun nna sharin ya wa ai. Masha ni gaw Yawhan kaw nna sharin la na matu, Yerusalem hte Yuda mung ting kaw nna sa wa ma ai. Yehowa a ra sharawng lam lu na matu, n kaja ai lam ni galaw nga ai hpe jahkring kau ra ai nga nna shanhte hpe Yawhan sharin ya ai. Yawhan tsun ai hpe madat la ngut ai hpang, masha law law gaw shanhte a mara ni a matu myit malai lu wa ma ai. Myit malai lu ai masha ni hpe Yawhan gaw Yawdan Hka hta hkalup hkam ya ai.

Yawhan gaw prat hpe asan sha nga ai. Shi gaw gawla-uk mun hte galaw da ai palawng hpe hpun nna, nam na lagat jahku hte dinggam-yaw hpe sha ai. Masha ni gaw Yawhan a lam grai chye mayu ma ai. Gumrawng ai myit rawng ai Hparishe hte Saduke ni pyi shi hpe sa yu ma ai. Yawhan gaw shanhte hpe ndai hku tsun ai: ‘Nanhte galai shai nna myit malai lu mu. Nanhte gaw Abraham a kashu kasha ni re ai majaw, laklai ai masha ni, Karai Kasang a kashu kasha ni ngu nna hkum shadu taw nga mu.’

Masha law law gaw Yawhan hpang de sa nna, ndai hku san ai: ‘Karai Kasang myit ra ai hku galaw lu na matu hpa galaw ra na kun?’ Yawhan gaw shanhte hpe ndai hku bai tsun ai: ‘Palawng lahkawng lu ai wa gaw n lu ai wa hpe garan jaw mu.’ Shi hpa majaw dai hku tsun ai kun? Karai Kasang a sharawng awng ai lam lu mayu yang, masha ni hpe tsawra ra ai lam shanhte hpe Yawhan chye shangun mayu ai majaw re.

Yawhan gaw kang hta ai ni hpe ndai hku tsun ai: ‘Myit dingman u. Masha ni hpe hkum maw sha.’ Hpyen la ni hpe mung ndai hku tsun ai: ‘Mayun kumhpa hkum la. Masu ga hkum tsun.’

 Hkinjawng ni hte Lewi masha ni gaw Yawhan hpang de ndai hku sa san ma ai: ‘Nang gaw kadai rai ta? Masha yawng chye mayu ma ai.’ Yawhan ndai hku tsun ai: ‘Esaia myihtoi htoi wa ai hte maren, dai Madu a lam shading mu, nga nna nam kaw jahtau ai wa a nsen gaw ngai rai nga nngai.’

Masha ni gaw Yawhan sharin achyin ya ai hpe grai ra sharawng ai. Yawhan gaw Meshia mahtang wa rai kun nga nna masha law law shadu ma ai. Raitim shi gaw shanhte hpe ndai hku tsun ai: ‘Ngai hta grau ai wa du wa sana re. Ngai gaw shi a hkyepdin sumri raw na pyi n ging dan ai. Ngai gaw nanhte hpe hka hte Baptisma jaw ai. Raitim, shi gaw chyoi pra ai wenyi hta nanhte hpe Baptisma jaw na ra ai.’